Joshua 4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

A reyọ Eragha Ihwivẹ nẹ Jọdan

¹ Ọke rẹ ẹgborho na ejobi vwọ wan Jọdan vrẹn nu, Ọrovwohwo da ta kẹ Joshua nẹ,

² Reyọ eshare ihwivẹ nẹ ohri re ihwo na rhe, orua ọvo ohwo ọvo,

³ gbe ji urhi kẹ ayen nẹ, Reyọ ibieragha ihwivẹ nẹ uherevie rẹ Jọdan na rhe, vwo nẹ asan na kpekpe na rẹ awọ rẹ irherẹn na mudia phihọ na, re wa ghwa ayen nene oma, re wa ghwẹ ayen phihọ otọ vwẹ asan ru we che won phihọ ason na.

⁴ Etiyin Joshua de se eshare ihwivẹ na nẹ ohri rẹ ihwo rẹ Izrẹl na rhe, ihwo ro vwo mu jovwo na, orua ọvo ohwo ọvo,

⁵ Joshua da ta kẹ ayen, Wanvrẹn re wa ka obaro kẹ ekpeti rẹ Ọrovwohwo Ọghẹnẹ wẹn na vwo kpo obo uherevie ri Jọdan, rere ohwo ọvuọvo mu ubioragha kpahe igabọ rọye, kirobo rẹ unu rẹ orua rẹ ihwo rẹ Izrẹl epha,

⁶ rere ọnana vwọ dia oka vwẹ ohri rẹ ovwan, vwẹ ọke rẹ emọ rẹ ovwan da cha nọ vwẹ ọke rọ cha nẹ, Kidie ibieragha nana fi kẹ ovwan

⁷ Ku wọ ta kẹ ayen nẹ ame ri Jọdan ghare ibro ivẹ vwẹ obaro rẹ ekpeti rẹ ọphọ rẹ Ọrovwohwo na; ọke rọ vwọ wan Jọdan vrẹn, ame ri Jọdan da ghare ibro ivẹ. Ọtiọye na ibieragha nana ke cha dia kẹ ihwo rẹ Izrẹl ẹkarophihọ bẹdẹ.

⁸ Ihwo rẹ Izrẹl de ru kirobo ri Joshua ji urhi kẹ ayen, ayen da tọrọ ibieragha ihwivẹ nẹ uherevie ri Jọdan rhe, kirobo rẹ unu rẹ orua rẹ ihwo rẹ Izrẹl epha, kirobo rẹ Ọrovwohwo ta kẹ Joshua ayen da ghwẹ ayen nene oma re te asan rẹ ayen won phihọ, ayen de mu ayen phihọ otọ vwẹ etiyin.

⁹ Joshua de mu ibieragha ihwivẹ na phihọ uherevie ri Jọdan, vwe asan re awọ re irherẹn re ghwa ekpeti rẹ ọphọ na mudia phihọ na, ayen ji hẹ etiyin rhi te nọne na.

¹⁰ Kidie irherẹn na re ghwa ekpeti na de mudia vwẹ uherevie ri Jọdan, bẹsiẹ re emu ejobi rẹ Ọrovwohwo ji urhi rọye kẹ Joshua nẹ ọ ta kẹ ihwo na rhi vwo re, kirobo ri Mosis ta kẹ Joshua ejobi. Okpakpa ihwo na vwọ wanvrẹn;

¹¹ ọke re ihwo na ejobi vwọ wanvrẹn nu, ekpeti rẹ Ọrovwohwo na kugbe irherẹn na da ka obaro kẹ ihwo na.

¹² Emeshare ri Ruben kugbe emeshare ri Gad kugbe ubro rẹ orua ri Manasse nabọ choma rẹ ofovwi, e da ka obaro kẹ ihwo rẹ Izrẹl, kirobo ri Mosis vuẹ ayen;

¹³ kere ihwo uriori ujuvẹ re choma rẹ ofovwi da ka obaro kẹ Ọrovwohwo re hẹrhẹ ofovwi, vwẹ uphephẹ ri Jeriko.

¹⁴ Vwẹ ẹdẹ yena Ọrovwohwo da kpare Joshua kpenu vwẹ obaro rẹ ihwo rẹ Izrẹl ejobi; kẹ ayen mudia phariẹ kẹ, kirobo rẹ ayen mudia phariẹ kẹ Mosis, vwẹ ẹdẹ rẹ akpọ rọye ejobi.

¹⁵ Ọrovwohwo na da ta kẹ Joshua,

¹⁶ Ji urhi kẹ irherẹn na re ghwa ekpeti rẹ iseri na ri wotọ nẹ obo Jọdan rhe.

¹⁷ Joshua de ghine ji urhi kẹ irherẹn na nẹ, Wotọ nẹ obo Jọdan na rhe.

¹⁸ Ọke rẹ irherẹn re ghwa ekpeti rẹ ọphọ rẹ Ọrovwohwo na vwo wotọ nẹ uherevie ri Jọdan na rhe, re awọ rẹ irherẹn na ghwe vwo te otọ ọyaya nure, ame ri Jọdan na de ghwe rhurie rhe ọ da vọn ro egben rọye reghe reghe kirobo rọ epha jovwo.

¹⁹ Ihwo na de wotọ nẹ Jọdan rhe vwẹ ẹdẹ rihwe rẹ emeranvwe rẹ ẹsosuọ, ayen de mu erhọn vwi Gilgal vwẹ obaro ọnre vwẹ ughwru ri Jeriko.

²⁰ Ibieragha ihwivẹ yena, rẹ ayen muru nẹ Jọdan rhe na, Jọshua de mu ayen vi vwi Gilgal.

²¹ Ọ da ta kẹ ihwo rẹ Izrẹl na, Ọke rẹ emọ rẹ ovwan da nọ esẹ rayen vwẹ ọke rọ cha nẹ, Die Ibieragha nana firi?

²² Ku wọ jẹn emọ na riẹn nẹ, Izrẹl wan Jọdan nana vrẹn vwẹ otọ ọyaya.

²³ Kidie Ọrovwohwo Ọghẹnẹ wẹn nẹrhẹ ame ri Jọdan na kpọ ya hirhe phihọ otọ ọyaya bẹsiẹ rẹ ovwan vwọ wanvrẹn nu, kirobo rẹ Ọrovwohwo Ọghẹnẹ wẹn ru kẹ Abadi Ọvwavware na, rọ nẹrhẹ ọ kpọ ya hirhe phihọ otọ ọyaya bẹsiẹ rẹ avwanre vwọ wanvrẹn nu,

²⁴ rere ihwo rẹ akpọ na ejobi vwọ riẹn nẹ obọ rẹ Ọrovwohwo re gan re; rere wọ vwọ sa djẹ oshọ rẹ Ọrovwohwo Ọghẹnẹ rẹ ovwan bẹdẹ.