Joshua 24 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ota rọ ka oba rẹ Joshua tare

¹ Etiyin Joshua de se orua rẹ Izrẹl koko vwi Shekẹm o de se ekpako na, igbuyovwi na, iguẹdjọ na, kugbe inotu rẹ Izrẹl; ayen da vwẹ oma rẹ ayen phia kẹ Ọghẹnẹ.

² Joshua da ta kẹ ihwo na ejobi. Enẹ Ọrovwohwo tare, Ọghẹnẹ rẹ Izrẹl, Vwẹ ọke rẹ awanre, obo ovrẹn ri Yufretis ọye esẹ rẹ ovwan diare, Terah, ọse rẹ Ebraham vi Nahọr; ayen da gọ edjọ efa.

³ Etiyin me da reyọ ọse rẹ ovwan Ebraham nẹ obo ovrẹn rẹ Urhie na rhe mi de suo wan otọ ri Kenan ejobi, mi de ru uvwiẹ rọye bu. Me da vwẹ Aizik kẹ;

⁴ me da rha vwẹ Jekọp vẹ Isọ kẹ Aizik. Me da vwẹ orere rẹ ugbenu ri Seir kẹ Isọ nẹ ọ reyọ, ẹkẹvuọvo Jekọp vẹ emo rọye de kpo Ijipt.

⁵ Mi de ji Mosis vẹ Erọn, me da vwẹ ọtiekọ rhe Ijipt vẹ emu buebu ri mi ruru vwẹ uherevie rọye, ukuko rọye mi de reyọ ovwan nẹ evun rọye.

⁶ Etiyin me da reyọ esẹ rẹ ovwan nẹ Ijipt rhe, we de rhi te abadi; ihwo rẹ Ijipt da vwẹ idjighere vẹ ihwo re gua iyesi vwọ tua esẹ rẹ ovwan re te Abadi Ọvwavware na.

⁷ Ọke rẹ ayen vwọ viẹ se Ọrovwohwo, o de phi ukori rẹ egho phihọ uvwre rẹ ovwan vẹ ihwo rẹ Ijipt, o de ru abadi na ọ da vwẹn rhurhu ayen, ẹro rẹ ovwan mrẹ obo ri mi ru kẹ Ijipt, ovwan da dia evun rẹ aghwa na ọke grogro.

⁸ Etiyin me da vwẹ ovwan rhe otọ rẹ ihwo rẹ Amọr, re dia abo oboyi ri Jọdan, ayen de nene ovwan họnre, mi de phi ayen phihọ obọ rẹ ovwan, wa da reyọ otọ rayen, me da ghwọrọ ayen nẹ obaro rẹ ovwan.

⁹ Etiyin Balak rẹ ọmọ ri Zippor, ovie ri Moab, de vrẹn ra họnre Izrẹl; o de ji ohwo re se Baalam ọmọ ri Beor rere ọ harhe ovwan,

¹⁰ ẹkẹvuọvo me gbe kerhọ ri Baalamu-u; fiki rẹ ọtiọye na kọ rhoma nẹ ẹrhovwo kẹ ovwan, kọye mi de sivwi ovwan nẹ obọ rọye.

¹¹ Wa da wanvrẹn Jọdan rhi te Jeriko, ihwo ri Jeriko da họnre ovwan, eriyin ji te ihwo rẹ Amọr, ihwo ri Beriz, ihwo ri Kenan, ihwo ri Het, ihwo ri Girgash, ihwo ri Hiv, kugbe ihwo ri Jebus; mi de phi ayen phihọ obọ rẹ ovwan.

¹² Mi de ji oro ka obaro kẹ ovwan, re djẹ ayen nẹ obaro rẹ ovwan, ivie ive re ihwo rẹ Amọr; ọ dianẹ kẹ ọlọkọ rẹ ovwan eyẹ umurhabọ rẹ ovwa-an.

¹³ Me vwẹ otọ rẹ ovwan wian phihọ-ọ kẹ ovwan, kugbe irere re wa bọnre-e, wa da dia evun rẹ ayen, wa re emamọ rẹ ogba ri vain vẹ ogba rẹ oliv re wa kọnre-e.

¹⁴ Asakiephana wa gba djẹ oshọ rẹ Ọrovwohwo, wa vwẹ evun esiri kugbe uyota vwọ ga, siobọ nẹ edjọ rẹ esẹ rẹ ovwan gọre vwẹ obo ovrẹn rẹ Urhie na, kugbe Ijipt, re wa ga Ọrovwohwo na.

¹⁵ O da dianẹ ovwan gbe sa rhọvwe ga Ọrovwohwo na-a, gba jẹ nonẹ na ohwo rẹ ovwan ga, kẹ edjọ rẹ esẹ rẹ ovwan gọre vwẹ ubrakpọ rọ obo ovrẹn rẹ Urhie na, eyẹ edjọ rẹ ihwo rẹ Amọr rẹ ovwan dia otọ rẹ ayen na; ẹkẹvuọvo vwọ kẹ vwẹ vẹ uwevwi mẹ, Ọrovwohwo ọvo ọye avwanre ga.

¹⁶ Etiyin ihwo na da kpahe, Kaka bẹdẹ avwanre cha sa siẹn Ọrovwohwo, ra go edjọ efa-a;

¹⁷ kidie Ọrovwohwo Ọghẹnẹ rẹ avwanre ọye reyọ esẹ rẹ avwanre nẹ otọ rẹ Ijipt rhe, nẹ uwevwi rẹ ọvien rhe, ọ de ru iruo rẹ igbunu yena vwẹ irharo rẹ avwanre, ọ da serọ rẹ avwanre vwẹ idjerhe rẹ avwanre wanre, kugbe ohri rẹ oghẹrẹ rẹ ihwo rẹ avwanre wanvrẹn;

¹⁸ Ọrovwohwo da djẹ ihwo na nẹ obaro rẹ avwanre, ihwo rẹ Amọr re dia otọ na; vwẹ ọtiọye na avwanre ke ga Ọrovwohwo rhe, kidie Ọghẹnẹ rẹ avwanre o ruẹ.

¹⁹ Ẹkẹvuọvo Joshua da ta kẹ ihwo na, Ovwan sa ga Ọrovwohwo na-a; kidie Ọghẹnẹ ọfuanfon o ruẹ; jẹ Ọghẹnẹ rọ rioma; ọ sa vwẹ ogbeku vẹ imwemwu rẹ ovwan vwo ghovwo ovwa-an.

²⁰ Ọ da dianẹ ovwan siẹn Ọrovwohwo na ra gọ edjọ erhorha ko kuoma rhẹriẹ re wan ovwan oma, kọ ghwọrọ ovwan, yo ru emu esiri kẹ ovwan nure.

²¹ Ihwo na da ta kẹ Joshua, A gha, ẹkẹvuọvo avwanre ga Ọrovwohwo na.

²² Etiyin Joshua da ta kẹ ihwo na, Ovwan se iseri kẹ oma rẹ ovwan nẹ wa jẹ Ọrovwohwo reyọ nure, re wa ga. Ayen da ta, Avwanre iseri.

²³ Ọ da ta, Vwẹ ọtiọye na we gbe ku edjọ erhorha na re hẹ ohri rẹ ovwan na kufia, re wa vwẹ udu kpotọ kẹ Ọrovwohwo na, Ọghẹnẹ rẹ Izrẹl.

²⁴ Ihwo na da ta Joshua, Ọrovwohwo Ọghẹnẹ rẹ avwanre ọye ma ga, urhuru rọye ọye me nyo.

²⁵ Etiyin Joshua vẹ ihwo na da re ọphọ vwẹ ẹdẹ yena, o de ji iji kugbe irhi vwọ kẹ ayen vwi Shekẹm.

²⁶ Joshua de si eta nana phihọ ọbe rẹ urhi rẹ Ọghẹnẹ, ọ da reyọ oragha rode, o de vwo vi vwẹ otọ rẹ ohahe vwẹ ẹshẹ rẹ Ọrovwohwo na.

²⁷ Joshua da ta kẹ ihwo na, Nighe, oragha nana ko che se iseri hwe avwanre; kidie o nyo eta rẹ Ọrovwohwo nana ejobi rọ ta kẹ avwanre na; fiki rẹ ọtiọye na ko che se iseri hwe we, wo de rhi ru ogbigbiru rhurhu Ọghẹnẹ wẹn.

²⁸ Etiyin Joshua de siobọ nẹ ihwo na kpo, dohwo dughwe rọye da ra.

Ughwu ri Joshua vẹ ọ rẹ Eleazar

²⁹ Re imu nana vwọ wan nu Joshua rẹ ọmọ ri Nọn, odibo rẹ Ọrovwohwo na, de ghwu, ikpe ujori gbẹ ihwe ọ ghwo te,

³⁰ ayen de sho phihọ ẹkẹn ukueriọ rọye vwi Timnatserah, rọ obo orere rẹ ugbenu rẹ Ifrem, obọhwẹre ọnre vwẹ ugbenu ri Gaash.

³¹ Izrẹl da ga Ọrovwohwo vwẹ ẹdẹ re akpọ ri Joshua ejobi kugbe ẹdẹ rẹ akpo rẹ ekpako na ejobi re tọn nọ Joshua re riẹn iruo rẹ Ọrovwohwo na ru kẹ Izrẹl.

³² Ibeku ri Josef rẹ ihwo rẹ Izrẹl ghwa nẹ Ijipt rhe e de shi ayen phihọ Shekẹm, vwẹ ẹbẹrotọ ri Jekọp de miẹ emọ ri Hamọr ọse ri Shekẹm esiso rẹ igho, o de rhi hirhe phihọ ẹkẹn uku rẹ emọ ri Jọsef.

³³ Eleazar re ọmọ rẹ Erọn de ghwu; ayen de shọ phihọ Gibeah, orho ri Finehas rẹ ọmọ rọye, ra vwọ kẹ vwẹ obo orere rẹ ugbenu rẹ Ifrem.