Joshua 22 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Agbada rọ hẹ oma rẹ Jọdan

¹ Etiyin Joshua de se ihwo ri Rubẹn rhe, kugbe ihwo ri Gad, kugbe abọvo rẹ orua ri Manasse,

² ọ da ta kẹ ayen, Ovwan yọnrọn urhi ejobi ri Mosis odibo rẹ Ọrovwohwo na ji kẹ ovwan, we ki ji mu ọghọ kẹ ota mẹ vwẹ urhi ejobi ri mi ji kẹ ovwan;

³ wa je sa siẹn imoni rẹ ovwan vwẹ ọke nana ejobi na-a, rhiri rhi te nonẹ na-a, ẹkẹvuọvo wa nabọ vwẹ ẹro te otọ vwọ yọnrọn iji rẹ Ọrovwohwo Ọghẹnẹ wẹn na.

⁴ Asakiephana Ọrovwohwo Ọghẹnẹ wẹn na vwẹ omaerovwo kẹ imoni wẹn, kirobo ro ve kẹ ayen; fiki rẹ ọtiọye na we gbe rhivwi we kpo uwevwi rẹ ovwan vwẹ obo otọ rẹ ughwẹ rẹ ovwan epha, ri Mosis odibo rẹ Ọrovwohwo na vwọ kẹ ovwan vwẹ obo ovrẹn ri Jọdan.

⁵ Nabọ vwẹ oma kpotọ yọnre urhi ri Mosis odibo rẹ Ọrovwohwo na ji kẹ ovwan, re wa guọnọ Ọrovwohwo Ọghẹnẹ wẹn, re wa yan phihọ idjerhe rọye, re wa sẹro rẹ irhi rọye, rere we churu muo, rere wa vwẹ udu rẹ ovwan ejobi vwọ ga kugbe ẹnwẹ rẹ ovwan ejobi.

⁶ Ọtiọye na Joshua da nẹ ẹrhovwo kẹ ayen, o de siobọ nẹ ayen kpo; ayen da yanran kpo uwevwi rayen.

⁷ Vwẹ ọke yena Mosis da vwẹ ughwẹ ọvo rọ hẹ Bashan vwọ kẹ abọvo rẹ orua ri Manasse; ẹkẹvuọvo abọvo ro chekọ Joshua da ghare ughwẹ kẹ ayen vwọ kẹrẹ imoni rayen vwẹ otọ rọ hẹ obuko ọnre vwi Jọdan. Ọke ri Joshua vwo siobọ nẹ ayen kpo uwevwi rayen rọ vwọ nẹ ẹrhovwo kẹ ayen nu,

⁸ ọ da ta kẹ ayen, We rhivwi kpo uwevwi rẹ ovwan vẹ efe buebu kugbe uchuru buebu, vẹ idọnọ efuanfon, oro, ẹrovwo, vẹ emwa buebu; wa vẹ imoni rẹ ovwan ghare ekuakua ru we gborho mie ivwighrẹn rẹ ovwan na.

⁹ Etiyin ihwo ri Rubẹn vẹ ihwo ri Gad kugbe abọvo vwẹ orua ri Manasse de rhivwi kpo, ayen da hẹriẹ oma nẹ ihwo rẹ Izrẹl vwi Shiloh, rọ hẹ otọ ri Kenan, vwo kpo otọ ri Gilead, otọ rẹ obọ rayen re ayen vwọ kẹ omobọ rayen vwẹ urhi rẹ Ọrovwohwo wan unu ri Mosis ji.

¹⁰ Ọke rẹ ayen rhi vwo te ubrakpọ ri Jọdan, ro fi otọ ri Kenan, ihwo ri Rubẹn vẹ ihwo ri Gad kugbe abọvo rẹ orua ri Manasse da so agbada pliho oma ri Jọdan, agbada rode gangan.

¹¹ Ihwo rẹ Izrẹl de nyo nẹ, Nighere, ihwo ri Rubẹn vi Gad kugbe abọvo rẹ orua ri Manasse so agbada phihọ ughwru vwẹ otọ ri Kenan, vwẹ ubrakpọ ri Jọdan, vwẹ abo rẹ ihwo rẹ Izrẹl vwori.

¹² Ọke rẹ ihwo Izrẹl vwo nyo, ọghwẹgbe rẹ lzrẹl ejobi de rhi koko vwi Shiloh, rere a ra họnrọ ayen.

¹³ Etiyin ihwo rẹ Izrẹl de ji Finehas ọmọ reẹ Eleazar rẹ orherẹn na bru ihwo ri Rubẹn vi Gad kugbe abọvo rẹ orua ri Manasse, vwẹ obo otọ ri Gilead,

¹⁴ ehọnvwọre ihwe vwọ ba, ọvuọvo nẹ orua rẹ Izrẹl ọvuọvo rhe, ọvuọvo igbuyovwi rẹ ekru ọvuọvo vwẹ orua rẹ Izrẹl na.

¹⁵ Ayen de rhi te asan rẹ ihwo ri Rubẹn, vẹ ihwo ri Gad, kugbe abọvo rẹ ihwo ri Manasse epha, vwẹ otọ ri Gilead, ayen da ta ke ayen,

¹⁶ Enẹ ukoko rẹ ihwo rẹ Ọrovwohwo tare, Didi ogbigbiru ovwan ruru kpahe Ọghẹnẹ rẹ Izrẹl ru we vwo hirhe uko ku Ọrovwohwo nonẹ na, re wa vwo so agbada kẹ oma rẹ ovwan ru we vwo muẹkpahe Ọrovwohwo nonẹ na?

¹⁷ Avwanre je sa ho oma fon nẹ umwemwu ri Peọr rẹ avwanre ruru-u, rọ so ọtiekọ vwẹ ukoko rẹ ihwo rẹ Ọrovwohwo,

¹⁸ ye ovwan rhe chuko kue Ọrovwohwo kirobo rọ epha nonẹ na? We de mukpahe Ọrovwohwo nonẹ na ivun ki miovwo kpahe ukoko rẹ Izrẹl ejobi vwẹ odẹ rọ cha na.

¹⁹ Ẹkẹvuọvo asakiephana, ọ da dianẹ otọ rẹ ovwan rha fo-on, wa gba wanvrẹn kpo otọ rẹ Ọrovwohwo asan rẹ ọgarivi rẹ Ọrovwohwo na epha na, re we re bru otọ reyọ kẹ oma rẹ ovwan vwẹ ohri rẹ avwanre, takpe we muẹkpahe Ọrovwohwo-o eyẹ wo ruẹ avwanre vwo muẹkpahọ-ọ rere wa so agbada kẹ oma rẹ ovwa-an nọ agbada ra so kẹ Ọrovwohwo Ọghẹnẹ rẹ avwanre na.

²⁰ Ọ dianẹ Akan rẹ ọmọ ri Zerah chọ urhi vwẹ oma rẹ ekuakua re vwo ghweri ise, ophu rẹ ukoko rẹ Izrẹl na ejobi de muo? O dia ọye ọvo ri ghwu phihọ orukuruku na-a.

²¹ Etiyin ihwo ri Rubẹn, ihwo ri Gad, kugbe abọvo rẹ orua ri Manasse da kpahe kẹ igbuyovwi rẹ ekru rẹ Izrẹl na!

²² Ọgba ọvuọvo na, Ọghẹnẹ, Ọrovwohwo na! Ọgba Ọvuọvo na, Ọghẹnẹ, Ọrovwohwo na! Ọ riẹnre, ọ je nẹrhẹ okpuyovwi rẹ Izrẹl riẹn! Ọ da dianẹ fiki rẹ omukpahe eyẹ fiki rẹ urhi rẹ Ọrovwohwo egbe, wo gbi jẹ avwanre rho nonẹ-ẹ

²³ fiki rẹ agbada ra soro re vwo chuko ku Ọrovwohwo na, eyẹ avwanre da suọ re vwo chuko ku Ọrovwohwo na, eyẹ avwanre da suo re vwo ze izobo rẹ ẹtorhẹ eyẹ izobo rẹ ọka eyẹ izobo rẹ ufuoma vwẹ enu rọye, gbe jẹ Ọrovwohwo ọvo tobọ reihri na.

²⁴ Ẹjo, ẹkẹvuọvo avwanre ruro fiki rẹ oshọ nẹ ọke rọ cha emọ rẹ ovwan cha ta kẹ emọ rẹ avwanre nẹ, Die ovwan vẹ Ọrovwohwo na, Ọghẹnẹ rẹ Izrẹl gbe ru kugbe?

²⁵ Kidie Ọrovwohwo na vwi Jọdan vwọ ghare ughwru kẹ avwanre vẹ ovwan, ovwan ihwo ri Rubẹn vẹ ihwo ri Gad, we gbi vwo ẹkẹn vwẹ oma rẹ Ọrovwohwo-o. Ọtiọye na emẹ rẹ ovwan gbi che jẹ emọ re avwanre ga Ọrovwohwo-o.

²⁶ Fiki rẹ ọtiọye na avwanre vwọ tanẹ, Gbe jẹ avwanre so agbada ọvo, ọ dia ọ rẹ izobo rẹ ẹtorhẹ-ẹ, eyẹ fiki rẹ izobo-o,

²⁷ ẹkẹvuọvo rere ọ vwọ dia iseri kẹ avwanre vẹ ovwan kugbe uvwre rẹ avwanre vẹ uvwiẹ rọ cha, nẹ avwanre ga ẹga nana vwe irharo rẹ Ọrovwohwo fiki rẹ izobo rẹ ẹtorhẹ rẹ avwanre kugbe izobo rẹ ufuoma, emọ rẹ ovwan da rha ta kẹ emọ rẹ avwanre vwẹ ọke rọ cha nẹ, We vwo ẹkẹn vwẹ oma rẹ Ọrovwohwo-o.

²⁸ Avwanre ki rori nẹ, Ọ da dianẹ a ta ọnana kẹ avwanre eyẹ uvwiẹ rẹ avwanre vwẹ ọke rọ cha, avwanre ke ta, Nighere, ọkpọ rẹ agbada rẹ Ọrovwohwo na, rẹ esẹ rẹ avwanre soro, o dianẹ fiki rẹ izobo rẹ ẹtorhẹ-ẹ eyẹ fiki rẹ izobo-o, ẹkẹvuọvo rere ọ vwọ dia iseri kẹ avwanre vẹ ovwan.

²⁹ Avwanre se yivwi mukpahe Ọrovwohwo-o, re avwanre chuko kuo vwo jẹ Ọrovwohwo e nene kirobo rọ epha nonẹ na vwọ sọ agbada rẹ izobo rẹ ẹtorhẹ, izobo rẹ ọka, eyẹ izobo, vwọ nọ agbada rẹ Ọrovwohwo Ọghẹnẹ rẹ avwanre ro mudia vwẹ obaro rẹ ogarivi rọye.

³⁰ Ọke ri Finehas rẹ orherẹn na kugbe ehọnvwọre rẹ ukoko na, igbuyovwi rẹ ekru rẹ Izrẹl re vẹ ọye gba herọ, vwo nyo eta rẹ ihwo ri Rubẹn na kugbe ihwo ri Gad kugbe ihwo ri Manasse tare, o de je ayen gangan.

³¹ Finehas rẹ ọmọ rẹ Eleazar rẹ orherẹn na da ta kẹ ihwo ri Ruben kugbe ihwo ri Gad kugbe ihwo ri Manasse nẹ, Nonẹ avwanre vwọ riẹn nẹ Ọrovwohwo na uherevie rẹ avwanre, fikiridie ovwan gbe ozighi nana kpahe Ọrovwohwo na-a; asakiephana we sivwi ihwo rẹ Izrẹl nẹ obọ rẹ Ọrovwohwo na.

³² Etiyin Finehas rẹ ọmọ rẹ Eleazar rẹ orherẹn na, kugbe ehọnvwore na, de rhivwi jẹ ihwo ri Rubẹn na vwo kugbe ihwo ri Gad vwẹ otọ ri Gilead ayen de kpo otọ ri Kenan, bru ihwo rẹ Izrẹl, ayen da rhe nẹ iyẹnrẹn kẹ ayen.

³³ Iyẹnrẹn na de je ihwo rẹ Izrẹl ihwo rẹ Izrẹl da nẹ ẹrhovwo kẹ Ọghẹnẹ ayen gbe ta ota rẹ ofovwi ephio kpahe aye-en, rẹ a vwọ guọghọ otọ rẹ ihwo ri Rubẹn kugbe ihwo ri Gad dia.

³⁴ Ihwo ri Rubẹn kugbe ihwo ri Gad de se agbada na iseri, Kidie, ayen tare nẹ, iseri ọ epha vwẹ uvwre rẹ avwanre nẹ Ọrovwohwo ọye Ọghẹnẹ.