Joshua 21 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Irere rẹ Ihwo rẹ Livae

¹ Etiyin igbuyovwi rẹ uwevwi rẹ esẹ re ihwo ri Livae de bru Eleazar rẹ orherẹn na rhe kugbe Joshua rẹ ọmọ ri Nọn kugbe igbuyọvwi rẹ uwevwi rẹ esẹ rẹ orua rẹ ihwo rẹ Izrẹl na;

² ayen da ta kẹ ayen vwi Shiloh vwẹ otọ ri Kenan nẹ, Ọrovwohwo ji urhi vwẹ unu ri Mosis nẹ a vwẹ irere kẹ avwanre re ma dia, kugbe otọ rẹ egbri fiki rẹ uchuru rẹ avwanre.

³ Fiki rẹ urhi rẹ Ọrovwohwo na ihwo rẹ Izrẹl da vwẹ irere nana vẹ etọ rẹ egbri vwọ kẹ ihwo ri Livae vwọ riuku.

⁴ Itẹ de mu ekru ri Kohat. Etiyin ihwo ri Livae rẹ uvwie rẹ Erọn rẹ orherẹn na da vwẹ itẹ na reyọ miẹ orua ri Juda, Simiọn, kugbe Bẹnjamin, irere ihwerha.

⁵ Ekru ri Kohat ri chekọ da vwẹ itẹ na reyọ mie ekru rẹ orua rẹ Ifrem, orua ri Dan kugbe abọvo vwẹ orua ri Manasse, irere ihwe.

⁶ Ihwo ri Gershọn da vwẹ itẹ na reyọ mie ekru rẹ orua rẹ Issaka, mie orua rẹ Asher, mie orua ri Naftali, mie abọvo rẹ orua ri Manasse vwi Bashan, irere ihwerha.

⁷ Ihwo ri Mẹra kirobo rẹ ekru rayen epha da vwẹ itẹ reyọ mie orua ri Rubẹn, orua ri Gad, kugbe orua ri Zẹbulọn, irere ihwivẹ.

⁸ Irere nana vẹ etọ rẹ egbri rayen ihwo rẹ Izrẹl vwọ kẹ ihwo ri Livae utute, kirobo rẹ Ọrovwohwo wan oma ri Mosis ji urhi kẹ ayen.

⁹ Orua ri Juda kugbe orua ri Simiọn de siobọ nẹ irere nana re che se ode rayen na,

¹⁰ re ayen siobọ nu kẹ uvwiẹ rẹ Erọn, ọvo vwẹ ekru ri Kohat vwẹ ihwo ri Livae na kidie ayen itẹ na ke mu.

¹¹ A da vwi Kiriatarba vwọ kẹ ayen, Arba kọye ọse rẹ Anak (kọye Hebrọn), vwẹ obo orere rẹ ugbenu ri Juda, vwẹ etọ rẹ egbri re riariẹ ayen phihọ.

¹² Ẹkẹvuọvo idju re orere na vẹ eko rọye ejobi a da vwẹ ayen kẹ Kalẹb rẹ ọmọ ri Jefunneh rere ọ dia ẹkẹn ute rọye.

¹³ Vwọ kẹ uvwiẹ rẹ Erọn rẹ orherẹn a da vwi Hebrọn vwọ kẹ, orere rẹ adjerhọ kẹ ohwo rẹ obọ chọre vẹ etọ rẹ egbri rọye, Libla vẹ etọ rẹ egbri rọye,

¹⁴ Jatta vẹ etọ rẹ egbri rọye, Eshtemoa vẹ etọ rẹ egbri rọye,

¹⁵ Holọn vẹ etọ rẹ egbri rọye, Deba vẹ etọ rẹ egbri rọye,

¹⁶ Ain vẹ etọ rẹ egbri rọye ejobi, Jutta vẹ eto rẹ egbri rọye, Bẹtshẹmẹsh vẹ etọ rẹ egbri rọye–irere irhiri vwẹ erua nana ivẹ na;

¹⁷ vwe orua ri Bẹnjamin, Gibeọn vẹ etọ rẹ egbri rọye, Geba vẹ etọ rẹ egbri rọye,

¹⁸ Anatọt vẹ etọ rẹ egbri rọye, Almọn vẹ etọ rẹ egbri rọye–irere ẹne.

¹⁹ Irere rẹ uvwiẹ rẹ Erọn, rẹ orherẹn na, ejobi da dia ihwerha vẹ etọ rẹ egbri rayen.

²⁰ Vwọ kẹ ihwo ri Kohat ri chekọ re dia ekru ri Kohat re uvwie ri Livae, irere ri te ayen evun re orua re Ifrem i nurhe.

²¹ Ayen a vwi Shikẹm kẹ, orere rẹ adjẹrhọ kẹ ohwo rẹ obọ chọre, vẹ etọ egbri rọye vwẹ obo orho rẹ ugbenu rẹ Ifrem, Geza vẹ etọ rẹ egbri rọye,

²² Kibzaim vẹ etọ rẹ egbri roye, Bẹthọrọn vẹ etọ re egbri rọye–irere ẹne;

²³ Vwẹ orua ri Dan, Elteke vẹ etọ rẹ egbri rọye, Gibbetọn vẹ etọ rẹ egbri rọye,

²⁴ Aijalọn vẹ etọ rẹ egbri rọye, Gatrimmọn ve etọ rẹ egbri rọye–irere ene;

²⁵ vwẹ ubrọ re orua ri Manasse, Taanak vẹ etọ rẹ egbri rọye, kugbe Gatrimmọn vẹ etọ rẹ egbri rọye–irere ivẹ.

²⁶ Irere rẹ ekru ri Kohat ri chekọ ejobi da dia ihwe vẹ etọ rẹ egbri rayen.

²⁷ Vwọ kẹ ihwo ri Gershọn, evo vwẹ ekru ri Livae, a da kẹ ayen vwẹ abọvo rẹ orua ri Manasse na, Golan vwi Bashan vẹ etọ rẹ egbri rọye, orho rẹ adjẹrhọ ke ohwo rẹ obọ chọre, kugbe Beeshteran vẹ etọ rẹ egbri rọye–irere ivẹ,

²⁸ vwẹ orua rẹ Issaka, Kishiọn vẹ etọ rẹ egbri rọye, Daberat vẹ etọ rẹ egbri rọye.

²⁹ Jarmut vẹ etọ rẹ egbri rọye, Engannim vẹ etọ rẹ egbri rọye–irere ẹne;

³⁰ vwẹ orua rẹ Asha, Mishal vẹ etọ rẹ egbri rọye, Abdọn vẹ etọ rẹ egbri rọye,

³¹ Helkat vẹ etọ rẹ egbri rọye, kugbe Rehob vẹ etọ rẹ egbri rọye–irere ẹne;

³² vwẹ orua ri Naftali, Kedẹsh vwi Galili vẹ etọ rẹ egbri rọye, orere rẹ adjerhọ kẹ ohwo rẹ obọ chọre, Hammọtdọ vẹ etọ egbri rọye, kugbe Kartan vẹ etọ rẹ egbri rọye–irere erha.

³³ Irere rẹ ekrekru rẹ ihwo ri Gershọn ejobi da dia ihwerha vẹ etọ rẹ egbri rayen.

³⁴ Vwọ kẹ ihwo ri Livae ri chekọ, ekru ri Mera, a da kẹ ayen vwẹ orua ri Zẹbulọn, Jokneam vẹ eto rẹ egbri rọye, Kata vẹ etọ rẹ egbri rọye.

³⁵ Dimnah vẹ etọ rẹ egbri rọye, Nahalal vẹ etọ rẹ egbri rọye–irere ẹne;

³⁶ vwẹ orua ri Rubẹn, Bẹza vẹ etọ rẹ egbri rọye, Jahaz vẹ etọ rẹ egbri rọye,

³⁷ Kedemọt vẹ etọ rẹ egbri rọye, kugbe Mefaar vẹ etọ rẹ egbri rọye–irere ẹne;

³⁸ vwẹ orua ri Gad, Ramot vwi Gilead vẹ etọ rẹ egbri rọye, orere rẹ adjẹrhọ kẹ ohwo rẹ obọ chọre, Mahanaim vẹ etọ rẹ egbri rọye,

³⁹ Heshbọn vẹ etọ rẹ egbri rọye, Jaza vẹ etọ rẹ egbri rọye–ayen ejobi irere ẹne.

⁴⁰ Vwọ kẹ irere rẹ ekru ri Mera buebu na, kọye ihwo ri Livae ri chekọ, ute ro te ayen ejobi da dia irere ihwivẹ.

⁴¹ Irere rẹ ihwo ri Livae re hẹ uherevie rẹ ughwẹ rẹ ihwo rẹ Izrẹl da dia irere ujuvẹ gbẹ ẹrenre vẹ etọ rẹ egbri rayen.

⁴² Irere nana dorere dotọ rẹ egbri rọye rọ riarierẹ phihọ; etiyin ọ epha kẹ irere nana ejobi.

Izrẹl reyọ otọ na

⁴³ Enẹ kọye Ọrovwohwo vwọ kẹ Izrẹl etọ na ejobi ro ve phihọ kẹ esẹ rayen, re ayen vwọ reyọ etọ na nure, kẹ etiyin ayen diare.

⁴⁴ Ọrovwohwo da vwẹ ufuoma kẹ ayen vwi kabọ kabọ kirobo ro veri kẹ esẹ rayen, ọvweghrẹn rayen ọvuọvo ro se hirhe opharo ku ayen herọ-ọ, kidie Ọrovwohwo phi ivwighrẹn na ejobi phihọ obọ rayen.

⁴⁵ Ọvuọvo rẹ ive esiri rẹ Ọrovwohwo veri kẹ uwevwi rẹ Izrẹl ro je ruo gba herọ-ọ, ayen ejobi ru ghare kpae.