Joshua 20 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌIrere ra Djẹrhọ re vwo mu ( Ukeri 35.6-34 ; Urhi Rivẹ 4.41-43 ; 19.1-13 ) 1 Etiyin Ọrovwohwo da ta kẹ Joshua nẹ, 2 Ta kẹ ihwo rẹ Izrẹl, Wa bọn irere rẹ adjẹrhọ, re me wan unu ri Mosis ta kẹ ovwan na, 3 rere ohwo rẹ obọ chọre hwe ohwo vwọ djẹ kpo etiyin, irere na ke dia asan rẹ adjẹrhọ kẹ ohwo rẹ ọ reihri rẹ ọbara. 4 Kọ djẹ kpo ọvo vwẹ irere na ko mudia ughere rẹ orere na, ko gu ẹkunu rọye kẹ ekpako rẹ orere yena; ayen ke reyọ ro evun rẹ orere na, ka vwẹ asan kẹ dia, ọ vẹ ayen ke dia. 5 Ohwo rọ ọreihri rẹ ọbara na da vwọ tua rhe, ayen siobọ nẹ ohwo rẹ obọ chọre na kẹ-ẹ; fikiridie obọ chọrọ hwe ọrivẹ rọye na, ọ vẹ ọye ghwọre jovwo-o. 6 Kọ dia evun rẹ orere na bẹsiẹ ro che vwo mudia vwẹ obaro rẹ ukoko na vwẹ ẹdjọ, bẹsiẹ rẹ orherẹn rode rọ herọ vwẹ ọke yena vwo ghwu; kẹsiẹye ohwo rẹ obọ chọre na ki rhivwi kpo orho rọye vẹ uwevwi rọye, rọ dje nurhe. 7 Etiyin ayen de phi Kedẹsh vwi Galili vwẹ obo orho rẹ ugbenu ri Naftali phihọ ovwanrhe, kugbe Shikẹm vwẹ obo orho rẹ ugbenu vwẹ Ifrem, kugbe Kiriatarba kọye Hebrọn vwẹ obo orho rẹ ugbenu ri Juda. 8 Vwẹ obo ovren ri Jọdan vwẹ obaro ọnre vwi Jeriko, ayen de phi Bezer rọ obo aghwa vwẹ uphephe na phihọ ovwanrhe, vwẹ orua ri Rubẹn, ayen de rhe phi Ramọt vwi Gilead phihọ otọ, vwẹ orua ri Gad, ayen de rhe phi Golan vwi Bashan phihọ otọ, vwẹ orua ri Manasse. 9 Enana keye irere re phihọ otọ kẹ ihwo rẹ Izrẹl, kugbe erhorha re dia ohri rẹ ayen, rere kohwo kohwo rẹ obọ chọre hwe ohwo vwọ dje kpo etiyin, rere ohwo rọ ọreihri rẹ ọbara na vwo je hwe, bẹsiẹ ro vwo mudia vwẹ obaro rẹ ukoko. |
Bible in Urhobo © United Bible Societies, 1977.
Bible Society of Nigeria