Joshua 19 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ubrotọ ra vwọ kẹ Simiọn

¹ Ẹkẹn rivẹ de nẹ ute ri Simiọn rhe, ra ghare kẹ orua ri Simiọn, kirobo rẹ ekru rọye epha, ẹkẹn uku rọye da evun rẹ uku rẹ orua ri Juda.

² Enana keye ẹkẹn uku rọye Beersheba, Sheba, Molada,

³ Hazarshual, Bala, Ezem,

⁴ Eholad, Betul, Họrmah,

⁵ Ziklag, Betmarkabọt, Hazar-susa,

⁶ Bẹtlẹbaot, kugbe Sharuhen–irere ihwerha vẹ eko rayen;

⁷ Ẹnrimọn, Eta, kugbe Ashan-irere ẹne vẹ eko rayen;

⁸ je vwọ ba eko ejobi re yariẹ irere na phihọ rhiri re te Baalatbeer, Ramah vwẹ obi Negẹb. Ọnana kọye ẹkẹn uku rẹ orua ri Simiọn kirobo rẹ ekru rayen epha.

⁹ Uku rẹ orua ri Simiọn je vwẹ abọvo vwẹ ubrotọ ri Juda, kidie ẹkẹn rẹ orua ri Juda na rho nọ kẹ ayen, orua ri Simiọn de vwo uku vwẹ uherevie rẹ ukuẹriọ rayen.

Ubrotọ ra vwọ kẹ Zẹbulọn

¹⁰ Ute rerha de rhi te orua ri Zẹbulọn, kirobo rẹ ekru rọye epha. Ubrotọ ro vwọ riuku na de rhi te Sarid,

¹¹ etiyin ughwru rọye de mu kpenu vwẹ abọ rẹ obuko ọnre, re te Mareal, o ji te Dabbeshet, rhi re te ẹtẹrhe rọ obaro ọnre vwi Jokneam;

¹² rhi nẹ Sarid o de rhe kpo abọ ofa vwẹ obaro ọnre vwẹ abọ rẹ ọnre da vacha na re te ughwru ri Chislọt-tabọ,

¹³ ke etiyin o nu kpo Daberat, re duvwu fi Jafia, ke etiyin ọ wan nu kpo abọ rẹ obaro ọnre re te Gathefa, re te Ethkazin, yanran rhiri re te Rimmọn o ki gunu kpo Nea,

¹⁴ vwẹ abọ obọhwẹre ọnre ughwru na de ki riariẹ re te Hannatọn, o de rhi vwo oba vwẹ iyara rẹ Iftahẹl,

¹⁵ Kattah, Kahalal, Shimrọn, Idalah, kugbe Bẹtlẹhẹm–irere ihwivẹ vẹ eko rayen.

¹⁶ Ọnana kọye ẹkẹn uku rẹ orua ri Zẹbulọn, kirobo rẹ ekru rọye epha–irere nana vẹ eko rayen.

Ubrotọ ra vwọ kẹ Isaka

¹⁷ Ute rẹne de rhi te Isaka, vwọ kẹ orua rẹ Isaka, kirobo rẹ ekru rọye epha.

¹⁸ Ubrotọ roye etiyin enana epha Jezrẹl, Chesollot, Shunẹm,

¹⁹ Hafaraim, Shiọn, Anaharat,

²⁰ Rabit, Kishiọn, Ebez,

²¹ Remet, Engannim, Enhaddah, Betpazzer

²² ughwru na de ji te Tabor, Shahazumah, kugbe Bẹtshẹmẹsh, ughwru rọye de vwo oba vwi Jọdan–irere ihwe gbẹ esan vẹ eko rayen.

²³ Ọnana koye uku rẹ orua rẹ Issaka, kirobo rẹ ikru rọye epha–irere na vẹ eko rayen.

Ubrotọ ra vwọ kẹ Asher

²⁴ Ute riyori kẹ orua rẹ Asher kirobo rẹ ikru rọye epha.

²⁵ Evun rẹ ubrotọ rọye oye Helkat, Hali, Beten, Achshaf

²⁶ Allam-melek, Amad, kugbe Mishal epha; vwẹ obuko ọnre re te Karmel kugbe Shihorlibnat,

²⁷ o de rhe gunu kpo obaro ọnre, o de re te Betdagọn, re te Zẹbulọn kugbe iyara rẹ Iftahel vwẹ obọhwẹre ọnre re te Bẹtẹmẹk vi Neiel, nene obọhwẹre ọnre na rhiri re te Kabul,

²⁸ Ebrọn, Rehob, Hammon, Kanah, rhiri re te Sidọn Rode.

²⁹ Etiyin ughwru na da rha gẹre kpo Ramah, re te orere ra gba ogba phihọ vwi Taya; etiyin ughwru na de rhe gunu kpo Hosah, o de re vwo oba vwẹ obo abadi, Mahalab, Akzib,

³⁰ Ummah, Afek vi Rehob–irere uje gbẹ ivẹ vẹ eko rayen.

³¹ Ọnana kọye uku rẹ Asher kirobo rẹ ikru rọye epha–irere na vẹ eko rayen.

Ubrotọ ra vwọ kẹ Naftali

³² Ute resan kọ rẹ orua ri Naftali, kirobo rẹ ikru rọye epha.

³³ Ughwru rọye de nẹ Helẹf, vwẹ ohahe ri Zaanannim, vẹ Adami-nekeb, vi Jabneel, re te Lakkọm, o de re vwo oba vwẹ Jọdan;

³⁴ ughwru na da rha gẹre kpo obuko ọnre re te Aznottabọn, o de nẹ etiyin re te Hukkọk, re te Zẹbulọn vwẹ obọrhe ọnre, kugbe Asher vwẹ obuko ọnre, kugbe Juda vwẹ obaro ọnre vwi Jọdan.

³⁵ Irere ra gba ogba phihọ na ki Ziddim Za, Hammat, Rakat, Chinneret,

³⁶ Adamah, Ramah, Hazo,

³⁷ Kedẹsh, Edrei, Enhazọr

³⁸ Yirọn, Migdalel, Horẹm, Betanat, vi Betshemesh–irere ihwe gbẹ irhiri vẹ eko rayen.

³⁹ Ọnana uku ri Naftali kirobo rẹ ikru rọye epha–irere na vẹ eko rayen.

Ubrotọ ra vwọ kẹ Dan

⁴⁰ Ute righwrẹn kọ ri Dan, kirobo rẹ ikru rọye epha.

⁴¹ Vwẹ ubrotọ rẹ uku rọye na irere re herọ Zorah, Eshtaol, Irshemesh,

⁴² Shaalabbin, Aijalọn, Itlah,

⁴³ Elon, Timnah, Ekron,

⁴⁴ Eltekeh, Gibbetọn, Baalat,

⁴⁵ Jehud, Beneberak, Gatrimmọn,

⁴⁶ vi Mejarkọn vi Rakon vẹ ubrakpọ ri Joppa.

⁴⁷ Ọke re vwo mie ihwo ri Dan otọ, ihwo ri Dan da ra họnre Lẹshẹm, rẹ ayen vwọ reyọ nu, ayen de hwe ihwo rọye nu ayen da rọye otọ na kẹ etiyin ayen diare, ayen de se Lẹshẹm Dan, vwẹ ẹkarohọ ri Dan ọde rẹ ọse rayen rode.

⁴⁸ Ọnana kọye uku rẹ orua ri Dan, kirobo rẹ ikru rayen epha–irere nana vẹ eko rayen.

Ubrotọ ra vwọ kẹ Joshua

⁴⁹ Ọke rẹ ayen vwọ ghare otọ rẹ ubrurakpọ yena ejobi vwọ riuku nu, ihwo rẹ Izrẹl de siobọ nẹ ẹkẹn uku rayen vwọ kẹ Joshua rẹ ọmọ rẹ Nọn.

⁵⁰ Fiki rẹ urhi rẹ Ọrovwohwo, ayen da kẹ orere rọ nọ ekpẹn rọye na, Timnatserah vwẹ obo orho rẹ ugbenu rẹ Ifrem; ọ da rhoma bọn orere na, ọ da dia.

⁵¹ Enana keye uku rẹ Eleazar rẹ orherẹn kugbe Joshua rẹ ọmọ ri Nọn kugbe igbuyovwi rẹ esẹ rẹ iwevwi rẹ orua rẹ ihwo rẹ Izrẹl vwẹ itẹ ghare vwi Shiloh vwẹ obaro rẹ Ọrovwohwo vwẹ anurhoro rẹ utughẹ ra da vwa oma na. Etiyin ayen da ghare otọ na ejobi re.