Joshua 17 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Etiyin a da ghare ẹkẹn kẹ orua ri Manasse, kidie ọye ọmọkpako ri Josef. Vwọ kẹ Maka ọmọkpako ri Manasse, ọsẹ ri Gilead, a da ghare Gilead kugbe Bashan kẹ, fikiridie ọgba ofovwi ọ ruẹ.

² A da ghare ẹkẹnkẹn vwọ kẹ orua ri Manasse ro chekọ, vwẹ oruorua rayen, Abieza, Helẹk, Asriel, Shekẹm, Hefa, kugbe Shemida, enana kẹ emeshare vwẹ uvwiẹ ri Manasse ọmọ ri Josef, vwẹ oruorua rayen.

³ Asakiephana Zelofehad re ọmọ ri Hefa, ọmọ ri Gilead, ọmọ ri Maka, ọmọ ri Manasse, rhe vwiẹ emeshare-e, ẹkẹvuọvo emetẹ o vwieri; enana keye edẹ rẹ emetẹ rọye. Mahlah, Noah, Hoglah, Milkah, kugbe Tirzah.

⁴ Ayen de bru Eleazar rẹ orherẹn na rhe kugbe Joshua rẹ ọmọ ri Nọn kugbe isun na, ayen da ta, Ọrovwohwo ji urhi kẹ Mosis nẹ ọ kẹ avwanre uku vwẹ ohri rẹ imoni rẹ avwanre. Kirobo rẹ Ọrovwohwo ji urhi kẹ na ọ da ghare uku kẹ ayen vwẹ ohri rẹ emọ rẹ esẹ rayen.

⁵ Kọye ẹkẹn ihwe soso ọye te Manasse, vwọ ba otọ ri Gilead kugbe Bashan, rẹ obo ovrẹn ri Jọdan;

⁶ kidie emete ri Manasse vẹ emeshare rọye re gba riuku na. Otọ ri Gilead a da gharọ kẹ emọ ri Manasse ri cheko.

⁷ Ubrotọ ri Manasse de nẹ Asha rhe rhi te Mikmetat, rẹ obaro ọnre vwi Shekẹm, etiyin ughwru na de rhe enu kpo obọrhe ọnre re te ihwo re dia Entappuah.

⁸ Oto ri Tappuah na ekru ri Manasse ri vworo, ẹkẹvuọvo orho ri Tappuah na rọ evun rẹ ughwru na emọ rẹ Ifrem kọye vworo.

⁹ Etiyin ughwru na ke rha wan re te ẹtẹrhe ri Kanah. Irere rẹ etinẹ na, vwẹ obọrhe ọnre vwẹ asan ẹtẹrhe na, vwẹ ohri rẹ irere ri Manasse na, evo e rẹ Ifrem vwọ. Etiyin ughwru ri Manasse de rhe nene kpo obọhwẹre ọnre rẹ ẹtẹrhe na o de re te oba vwẹ obo abadi na,

¹⁰ otọ rọ obọrhe ọnre kọ rẹ Ifrem ọ rọ obọhwẹre ọnre kọ ri Manasse, abadi na kọye ughwru rọye; vwẹ obọhwẹre ọnre kọ rẹ Asher, vwẹ obaro ọnre kẹ Issaka.

¹¹ Vwẹ evun rẹ otọ rẹ Issaka vẹ Asha na Manasse de rhe vwo Betshean vẹ ẹko rọye, kugbe Ibleam vẹ ẹko rọye, kugbe ihwo re dia. Dọ vẹ ẹko rọye, kugbe ihwo re dia Endor vẹ ẹko rọye, kugbe ihwo re dia Taanak vẹ ẹko rọye, kugbe ihwo re dia Megiddo vẹ eko rọye; ọrerha ki Nafat.

¹² Jẹ emọ ri Manasse sa reyọ irere yena-a, ẹkẹvuọvo yẹ ihwo ri Kenan ji churu mu otọ yena rẹ ayen dia.

¹³ Ẹkẹvuọvo ọke rẹ ihwo rẹ Izrẹl rhe vwọ gan oma re, kẹ ayen gba ihwo ri Kenan na vwọ wian owian, ayen gbe rha djẹ ayen no kakare-e.

¹⁴ Orua ri Josef da ta kẹ Joshua, tanẹ, Die nẹrhẹ wọ kẹ vwẹ ẹkẹn ọvuọvo kpoi nọ dia ẹkẹn uku mẹ, yu wọ mrẹ nẹ avwanre epha buebu, rẹ Ọrovwohwo vwo bruphihọ kẹ avwanre nure na?

¹⁵ Joshua da ta kẹ ayen, Ovwan da dia ihwo buebu, we gbe kpo obo egbo na, re we re she kẹ oma rẹ ovwan vwẹ obo otọ rẹ ihwo ri Periz kugbe Refaim, rẹ orho rẹ obo ugbenu rẹ Ifrem na vwọ hwa nọ kẹr ovwan na.

¹⁶ Orua ri Josẹf da ta nẹ, orho rẹ ugbenu na rho te kẹ avwanre-e, ye ihwo ri Kenan re dia obo uphephe na vwo idjighere rẹ utehru, te e rẹ Betshean vẹ ẹko rọye kugbe e rẹ obo iyara ri Jezreel.

¹⁷ Etiyin Joshua da ta kẹ uwevwi ri Josef, kẹ Ifrem vi Manasse, Ovwan ghine ihwo buebu, ovwan je gan oma gangan; ọ dia ẹkẹn ọvuọvo ri che te ovwa-an,

¹⁸ ẹkẹvuọvo orho rọ hẹ obenu rẹ ugbenu na ejobi kọ dia ọ rẹ ovwan owene ọ dia egbo dede, ovwan wan rere ọ dia ọ rẹ ovwan re duvwu asan re ughwru rọye bare; kidie wa cha dje ihwo ri Kenan na no, owene ayen vwo idjighere rẹ utehru dede, owene ayen gan oma.