Joshua 14 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Avwẹ itẹ ghare Kenan

¹ Enana keye uku re Ihwo rẹ izrẹl ghware vwẹ otọ ri Kenan, rẹ Eleazar rẹ orherẹn na, kugbe Joshua rẹ ọmọ ri Nun, vẹ igbuyovwi rẹ uwevwi rẹ esẹ rẹ orua rẹ ihwo rẹ Izrẹl ghare kẹ ayen.

² Uku rayen na ite a vwọ gharọ, kirobo rẹ Ọrovwohwo ji urhi ki Mosis nọ gharọ kẹ orua irhiri gbe ubro na;

³ Kidie Mosis ghare uku kẹ erua ivẹ gbẹ ubro vwẹ obo ovrẹn ri Jọdan nure, ẹkẹvuọvo vwọ kẹ orua rẹ ihwo ri Livae a ghare uku kẹ aye-en.

⁴ Kidie ekru ri Josef orua ive, Manasse kugbe Ifrem, ẹkẹn ọvuọvo rhe te ihwo ri Livae vwẹ otọ na-a, ẹkẹvuọvo irere re ayen dia na ọvo, kugbe otọ rẹ egbri rẹ uchuru rẹ ayen dia ọvo vẹ ekuakua rayen.

⁵ Ihwo rẹ Izrẹl de ru kirobo rẹ Ọrovwohwo ji urhi kẹ Mosis, ayen da ghare otọ na ẹkẹnkẹn.

Avwẹ Hẹbrọn kẹ Kalẹb

⁶ Etiyin ihwo ri Juda de bru Joshua rhe vwi Gilgal, Kalẹb rẹ ọmọ ri Jefunneh ohwo ri Keniz da ta kẹ, Wọ riẹn obo rẹ Ọrovwohwo ta kẹ Mosis ohwo rẹ Ọghẹnẹ na vwi Kadesh-barnea kpahe owẹ vẹ ovwẹ.

⁷ Ikpe ujuvẹ me epha ri Mosis odibo rẹ Ọrovwohwo na vwo ji vwe nẹ Kadesh-barnea ni mi re dorhẹ rẹ otọ na, me da nẹ iyẹnrẹn rẹ udu mẹ ejobi vwọ kẹ.

⁸ Ẹkẹvuọvo iniọvo mẹ re vẹ ovwẹ gba ra da nẹrhẹ udu rẹ ihwo na rhan, ye me da vwẹ udu mẹ ejobi nene Ọrovwohwo Ọghẹnẹ mẹ.

⁹ Mosis de duvwu iyori vwẹ ẹdẹ yena, tanẹ, Uyota, otọ ru wo chiyiri na kọ dia ukueriọ kẹ wẹ vẹ emọ wẹn bẹdẹ, fikiridie wọ vwẹ udu wẹn nene Ọrovwohwo Ọghẹnẹ mẹ.

¹⁰ Asakiephana, nighere, Ọrovwohwo je sẹro mẹ rhi te ọke nana, kirobo rọ tare, ikpe ujuvẹ gbẹ iyori nana nẹ ọke rẹ Ọrovwohwo vwọ ta ota nana kẹ Mosis, ọke rẹ Izrẹl vwọ yan vwẹ evun rẹ aghwa na, gbe nighe, asakiephana, mẹvwẹ kẹ ohwo rẹ ikpe ujọne gbẹ iyori.

¹¹ Me je epha gangan rhi te nonẹ kirobo re me epha vwẹ ẹdẹ ri Mosis vwo ji vwe, ẹgba mẹ nonẹ na epha kirobo rọ epha vwẹ ọke yena, vwọ kẹ ofovwi, tẹ ẹra tẹ ẹcha.

¹² Ọtiọye na gba kẹ vwẹ orho rẹ ugbenu na rẹ Ọrovwohwo tare vwẹ ẹdẹ yena; kidie we nyori nẹ ihwo rẹ Anak re dia etiyin, vẹ irere ride ra gba ogba riariẹ, o mu vwẹ ẹro nẹ Ọrovwohwo vẹ ovwẹ herọ, ke me djẹ ayen no kirobo rẹ Ọrovwohwo tare na.

¹³ Etiyin Joshua da nẹ ẹrhovwo kẹ, ọ da vwẹ Hebrọn kẹ Kalẹb rẹ ọmọ ri Jefunneh vwọ riuku.

¹⁴ Etiyin Hebrọn da rhe dia ẹkẹ ukuẹriọ ri Kalẹb rẹ ọmọ ri Jefunneh ohwo ri Keniz rhi te nonẹ na, kidie ọ vwẹ udu rọye ejobi vwo nene Ọrovwohwo na, Ọghẹnẹ rẹ Izrẹl.

¹⁵ Asakiephana odẹ ri Hebrọn jovwo da dia Kiriatarba; Arba nana ọye ọgba rode vwẹ ohri rẹ ihwo rẹ Anak na. Oma de rhi fu otọ na.