Joshua 13 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Otọ ro chekọ ra cha reyọ

¹ Asakiepbana Joshua nabọ ghwore, Ọrovwohwo da ta ke, Wọ ghworo yẹyẹghẹ re, yẹ otọ buebu je herọ ra je kua-a.

² Ọnana kọye otọ ro ji chekọ: ubrakpọ ri Filistia ejobi, kugbe ubrakpọ re ihwo ri Geshur.

³ (Nẹ Shihọr rọ he obaro ọnre re Ijipt, vwe obọhwere ọnre rhiri re te Ekron, e kere phihọ kẹ ihwo ri Kenan, isun iyori ihwo ri Filistia vwori, osun ri Gaza, Ashdọd, Ashkelọn, Gat, kugbe Ekron), ọ vẹ e re Avvim,

⁴ Vwẹ obọrhe ọnre, otọ rẹ ihwo ri Kenan ejobi, kugbe Mera rẹ Sidọn, re te Afek rhiri re te ughwru rẹ Amọr.

⁵ Otọ rẹ Geba kugbe Lebanọn re tẹ ubrakpọ rẹ ọnre da vacha, nẹ Baalgad vwẹ obotọ rẹ Ugbenu ri Hermọn re te ughere ri Hamat.

⁶ Ihwo re dia obo orere rẹ ugbenu nẹ Lebanọn re te Misrefotmaim, tobọ ihwo ri Sidọn ejobi. Mẹvwẹ ọvo re cha dje ayen no kẹ ihwo rẹ Izrẹl, emu ọvo wo che ru ọ na, ku wọ ghare otọ na kẹ Izrẹl vwọ riuku, kirobo ri mi ji urhi kẹ wẹ.

⁷ Asakiephana gba ghare otọ nana rọ dia ukuẹriọ kẹ orua irhiri na kugbe ubro rẹ orua ri Manasse.

Ubroto ra vwọ kẹ Manasse Rubẹn kugbe Gad

⁸ Kugbe ubro rẹ orua ri Manasse ro chekọ ihwo ri Rubẹn ihwo ri Gad da reyọ ẹkẹn uku rayen, ri Mosis vwọ kẹ ayen, vwẹ obo ovrẹn ri Jọdan vwẹ obaro ọnre, kirobo ri Mosis odibo rẹ Ọrovwohwo vwọ kẹ ayen,

⁹ ne Aroer, rọ egbẹ re iyara re Anọn, kugbe orere rọ uherevie rẹ iyara na, kugbe ihwo re dia uphephẹ rẹ ubrotọ ri Medeba rhiri re te Dibọn;

¹⁰ kugbe irere ri Sihọn ejobi ovie rẹ ihwo re Amọr, rọ ria vwi Heshbọn, rhiri re te ughwru rẹ ihwo rẹ Ammon,

¹¹ kugbe Gilead, kugbe ubrakpọ ri Geshur vi Maakat, vẹ Ugbenu ri Hẹrmọn, vi Bashan ejobi re te Salekah,

¹² uvie rẹ Ọg ejobi vwi Bashan rọ rere vwe Ashtarọt vẹ Endrei (ọye ọvo ri chekọ vwẹ imihwo rẹ Refaim); enana eye Mosis phi kua ọ da djẹ ayen nẹ asan na.

¹³ Je ihwo re Izrẹl sa dje ihwo ri Geshur eye ihwo ri Maakat na no-o; ẹkẹvuọvo ihwo ri Geshur vi Maakat je dia uherevie re Izrẹl rhi te none na.

¹⁴ Orua ri Livae ọvo ọye Mosis jẹ uku ẹgharọ ke, izobo rẹ erhanre re ze kẹ Ọrovwohwo Ọghẹnẹ rẹ Izrẹl eye uku rẹ ayen, kirobo rọ ta kẹ.

¹⁵ Mosis da ghare uku kẹ orua ri Rubẹn kirobo rẹ ekru rayen epha.

¹⁶ Ọtiọye ubrotọ rayen da hẹre nẹ Aroer, ro egbẹ rẹ iyara rẹ Anọn, kugbe orere rọ uherevie rẹ iyara na, kugbe uphephẹ na ejobi rọ kẹrẹ Medeba,

¹⁷ vẹ Hẹshbọn, vẹ irere rọye ejobi re hẹ obo uphephẹ na, Dibọn, vi Bamotbaal, vẹ Bethaalmeon,

¹⁸ vẹ Jahaz, vẹ Kedemọt, vẹ Mephaat,

¹⁹ vẹ Kiriataim, vẹ Sibmah, vẹ Zeretshahar vwẹ enu rẹ ugbenu vwẹ obo iyara,

²⁰ vẹ Betpeọr, kugbe ọghwrọrọ ri Pisgah, Bet-jeshmot,

²¹ kọye irere ejobi ri obo uphephẹ na, kugbe uvie ri Sihọn ovie re Armọn, rọ rere vwi Hẹshbọn, ri Mosis phi kua vẹ isun ri Midian, Evi vẹ Rekẹm vẹ Zur vẹ Hur vẹ Reba emọ rẹ ivie ri Sihọn, re dia otọ na.

²² Ekpuyovwi ri Balaam ọmo ri Peọr rẹ ọbọepha, rẹ ihwo rẹ Izrẹl vwẹ ọlọkọ hwe vẹ usun rẹ ihwo ri chekọ vwẹ ohri rayen re hweri na.

²³ Ughwru rẹ ihwo ri Rubẹn da dia Jọdan. Ọnana kọye ukueriọ rẹ ihwo rẹ Rubẹn, kirobo rẹ ekru rayen epha vẹ irere rayen kugbe eko rayen.

²⁴ Mosis da ghare uku kẹ orua rẹ Gad, kirobo rẹ ekru rayen epha.

²⁵ Ubrotọ rayen ki Jaza, kugbe irere ri Gilead ejobi, kugbe ubro rẹ otọ rẹ ihwo rẹ Ammọn, re te Aroer, rọ obaro ọnre vwi Rabbah,

²⁶ nẹ Hẹshbọn re te Ramat-mizpeh vẹ Betonim, ji nẹ Mahanaim re te ubrakpọ ri Deba,

²⁷ vẹ iyara rẹ Betaram, Betnimrah, Sukkọt, vẹ Zafọn, kugbe ubro ro chekọ vwẹ uvie ri Sihọn ovie ri Hẹshbọn, Jọdan da rha dia ughwru rayen, re te obo oba rẹ ushekpoto rẹ Abadi ri Kinneret, ro ghwoma obaro ọnre vwẹ ovrẹn ri Jọdan.

²⁸ Ọnana kọye uku rẹ ihwo ri Gad kirobo rẹ orua rayen epha, vẹ irere rayen vẹ ẹko rayen.

²⁹ Mosis da ghare uku kẹ ubro rẹ orua rẹ Manasse e de dje ẹkẹnkẹn kẹ abọvo rẹ orua ri Manasse kirobo rẹ ekru rayen epha

³⁰ Ubrakpọ rayen da hẹre nẹ Mahanaim, ra wan Bashan ejobi, uvie rẹ Ọg ejobi ovie ri Bashan, kugbe irho ri Ja ejobi, ri Bashan, irere ujorha,

³¹ kugbe abọvo ri Gilead, kugbe Ashtarọt, vẹ Endrei, irere rẹ uvie rẹ Ọg vwi Bashan; enana keye a ghare ẹkẹnkẹn kẹ ihwo ri Maka ọmọ ri Manasse ra vwọ kẹ abọvo vwẹ ekru ri Maka kirobo rẹ ekru rayen epha.

³² Enana keye uku ri Mosis ghare vwẹ uphephẹ ri Moab, vwẹ ovrẹn ri Jọdan vwẹ obaro ọnre vwi Jeriko.

³³ Ẹkẹvuọvo Mosis ghare uku kẹ orua ri Livae-e, Ọrovwohwo Ọghẹnẹ rẹ Izrẹl ọye ukuẹriọ rayen, kirobo rọ ta ke ayen.