Joshua 10 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ephiokua rẹ ihwo rẹ Amọr

¹ Ọke rẹ Adonizẹdẹk ovie ri Jerusalẹm vwo nyo nẹ Joshua reyọ Ai, nẹ ọ guọgherọ kakare, nẹ o ru kẹ Ai vẹ ovie rọye kirobo ro ru kẹ Jeriko vẹ ovie rọye, kugbe obo re ihwo ri Gibeọn vẹ Izrẹl vwọ rhuẹrẹ kugbe ke dia ohri rẹ ayen,

² oshọ de muo gangan, fikiridie Gibeọn orere rode, kerẹ ọvo vwẹ orere rẹ ivie, ọ ke rha rho nọ Ai, ihwo rọye ke je dia egba.

³ Etiyin Adonizẹdẹk ovie ri Jerusalẹm de ji ikọn bru Hoham ovie ri Hebrọn, bru Piram ovie ri Jarmut, bru Jafia ovie ri Lakish, rhe Dibir ovie rẹ Eglọn, tanẹ,

⁴ Bru vwe rhe, wa rhe cha vwẹ uko, rere e hwe Gibeọn, kidie ọ vẹ Joshua rhuẹre kugbe ji kugbe ihwo rẹ Izrẹl ejobi.

⁵ Etiyin ivie iyori rẹ Amọr, ovie ri Jerusalẹm, ovie ri Hebrọn, ovie ri Jarmut, ovie ri Lakish, kugbe ovie rẹ Eglọn, da ghwẹ unuofovwi rayen koko, ayen vẹ unuofovwi rayen de re mu erhọn vwi Gibeọn, ayen da vwẹ ofovwi suọ.

⁶ Ihwo ri Gibeọn de ji ohwo bru Joshua vwẹ erhọn ri Gilgal, tanẹ, Wo rogho obọ kẹ idibo wẹ-ẹn, bru avwanre rhe phẹrẹkpẹ, wo rhi sivwi avwanre, wọ cha avwanre uko, kidie ivie rẹ ihwo rẹ Amọr ejobi re dia obo orho rẹ ugbenu na rhe ghwẹ koko vwọ so avwanre.

⁷ Etiyin Joshua de vrẹn vwi Gilgal, te ọye vẹ ihwo rẹ ofovwi re vẹ ọye gba herọ, kugbe egba ri yivwaro ejobi.

⁸ Ọrovwohwo da ta kẹ Joshua, Wọ djẹ oshọ rẹ aye-en, kidie mi phi ayen phihọ obọ wẹn nure, o vwo ohwo ọvo vwẹ usun rayen ro che se hirhe aro ku we-e

⁹ Etiyin Joshua da ra ro ayen kpregede, rẹ ayen vwo mu oyan phihọ vwẹ ason vwi Gilgal.

¹⁰ Ọrovwohwo da djẹ uguegue phihọ ayen oma vwẹ obaro rẹ Izrẹl, e de hwe ayen buebu vwi Gibeọn, a da djẹ ayen wan idjerhe rẹ ọghwrọrọ ri Bethọrọn e de hwe ayen rhiri re te Azekah vi Makedah.

¹¹ Rẹ ayen vwọ djẹ nẹ obọ rẹ Izrẹl na, rẹ ayen vwọ djẹ nene ọghwrọrọ ri Bẹthọrọn, Ọrovwohwo de si eragha ride nẹ enu rhe ri she teye ayen rhiri rhi te Azekah, ayen de ghwu; e rẹ osio rẹ ibieragha na hweri bu vrẹn e rẹ ihwo rẹ Izrẹl na vwẹ ọlọkọ hwe.

¹² Eriyin Joshua da ta ota kẹ Ọrovwohwo vwẹ ọke rọ vwọ vwẹ ihwo rẹ Amọr kẹ Izrẹl hwe nu; ọ da ta vwẹ obaro rẹ Izrẹl ejobi. Ọnre, mudia gbiei vwi Gibeọn, wẹ rẹ emeranvwe vwẹ iyara ri Aijalọr.

¹³ Ọnre de mudia gbiei, emeranvwe na da daji, bẹsiẹ rẹ ẹgborho na vwọ vwẹ ivwighrẹn rayen reihri, E rhe si ọnana phihọ ọbe ri Jasha? Ọnre de mudia vwẹ irharheghe, o gbi se she kpotọ vwẹ ẹdẹ yena-a.

¹⁴ O rhe vwo ẹdẹ re vwo dje ẹdọke yena rhabae na-a, rẹ Ọrovwohwo vwo nyo urhuru rẹ ohwo rẹ akpọ ọtiọye-e, kidie Ọrovwohwo họnre kẹ Izrẹl.

¹⁵ Etiyin Joshua de rhivwi, ọ vẹ ihwo rẹ Izrẹl ejobi, kpo obo erhọn ri Gilgal.

¹⁶ Ivie nana iyori na da djẹ, re sioma nu vwẹ ẹmwa ri Makedah.

¹⁷ A da rhe vuẹ Joshua nẹ, A mrẹ ivie iyori na, ri sioma nu vwẹ ẹmwa ri Makedah.

¹⁸ Joshua da ta, Eghorie eragha ride nyẹ unu rẹ emwa na, ra vwẹ ihwo phihọ etiyin re rhẹrẹ ayen;

¹⁹ ẹkẹvuọvo ovwan ọvo dia etiyi-in, wa vwọ tua ivwighrẹn rẹ ovwan, we re bruro ayen vwẹ obuko, wo jẹn ayen vwẹriẹ irere raye-en; kidie Ọrovwohwo Ọghẹnẹ phi ayen phihọ obọ rẹ ovwan nure.

²⁰ Ọke ri Joshua vẹ ihwo rẹ Izrẹl na vwo hwe ihwo na gangan nure, bẹsiẹ re rhi vwo hwe ayen ejobi re, ọke rẹ umuku rẹ ihwo ri chekọ rhi vwo rhivwi ro irere rayen nu;

²¹ ihwo na ejobi de rhivwi egbẹrhẹnẹdẹ bru Joshua rhe vwẹ obo erhọn ri Makadah, o vwo ohwo ọvuọvo rọ kpahe ota kẹ ihwo rẹ Izrẹl na-a.

²² Etiyin Joshua da ta, Rhie unu rẹ ẹmwa na, wa reyọ ivie iyori na nẹ evun rẹ ẹmwa na rhe.

²³ Ayen de ru ọtiọye, ayen da reyọ ivie iyori na nẹ unu rẹ ẹmwa na vwo rhe, ovie ri Jerusalẹm, ovie ri Hebrọn, ovie ri Jarmut, ovie ri Lakish, kugbe ovie rẹ Eglọn.

²⁴ Ọke rẹ ayen vwọ vwẹ ivie na rhe Joshua, Joshua de se ihwo rẹ Izrẹl ejobi, ọ da ta kẹ igbuyovwi rẹ ofovwi na ri nenire ra na, We bi kẹrẹ ovwẹ, wa vwẹ awọ rẹ ovwan vwo chiyi ohọre rẹ ivie nana. Etiyin ayen de ghine bi kẹrẹ, ayen da vwẹ awọ chiyi ehọre rayen.

²⁵ Joshua da ta kẹ ayen, We jẹ oshọ eyẹ ofu rẹ ayen dje ovwa-an; wa goma re we yivwaro; kidie enẹ Ọrovwohwo che ru kẹ ivwighrẹn rẹ ovwan ejobi re họnre ovwan.

²⁶ Ukuko rọye Joshua da teye ayen hwe, ọ da vwẹ ayen ya irhe iyori. A da vwẹ ayen ya etiyin re te ovwọnvwọn;

²⁷ ẹkẹvuọvo rẹ ọnre vwo she kpotọ re, Joshua da ta kẹ ayen, ayen de si ayen nẹ irhe na te otọ, a da kpare ayen phihọ evun rẹ ẹmwa rẹ ayen de sioma nu vẹrhẹ na, ayen da vwẹ eragha ride gbe unu rẹ ẹmwa na, rọ je herọ rhi te nonẹ na.

²⁸ Joshua da reyọ Makadah vwẹ ẹdẹ yena, ọ da vwẹ ọlọkọ nyavwọ vẹ ovie rọye hwe; ọ da ghwọrọ kohwo kohwo rọ herọ, o jẹ ọvuọvo vwo-o; o de ru kẹ ovie ri Makedah kirobo ro ru kẹ ovie ri Jeriko.

²⁹ Joshua da wanvrẹn Makedah, Izrẹl ejobi de nene, kpo Libnah, ayen da họnre Libnah;

³⁰ Ọrovwohwo de ji phio vẹ ovie rọye phihọ obọ rẹ Izrẹl; ọ da vwẹ ọlọkọ nyavwọ hwe, kohwo kohwo rọ herọ ejobi; ọvuọvo chekọ-ọ, o de ji ru ovie rọye kirobo ro ru kẹ ovie ri Jeriko.

³¹ Joshua da wanvrẹn Libnah, ọ vẹ Izrẹl ejobi, re te Lakish, ọ da gba yariẹ; ọ da họnrọ;

³² Ọrovwohwo de phi Lakish phihọ obọ rẹ Izrẹl, vwẹ ẹdẹ rivẹ ayen da ruọ, ayen da vwẹ oda nyavwọ hwe, vẹ ohwo ọvuọvo rọ herọ, kirobo ro ru kẹ Libnah.

³³ Etiyin Horam ovie ri Gezer da rhe rhe cha Lakish uko; Joshua da ghwiẹ hwe vẹ ihwo rọye, ọvuọvo rayen chekọ-ọ.

³⁴ Joshua vẹ ihwo rẹ Izrẹl da wanvrẹn Lakish kpo Eglọn, ayen da gba yariẹ, ayen da họnrọ;

³⁵ ayen da reyọ vwẹ ẹdẹ yena, ayen da vwẹ ọlọkọ ghwọrọ; kohwo kohwo rọ herọ ọye ọ ghwọre vwẹ ẹdẹ yena, kirobo ro ru kẹ Lakish.

³⁶ Joshua vẹ Izrẹl ejobi de vrẹn nẹ Eglọn kpo Hebrọn; ayen da họnrọ

³⁷ ayen da reyọ, ayen da vwẹ ọlọkọ nyavwọ hwe, ovie rọye vẹ irho rọye kugbe kohwo kohwo rọ herọ; ọvuọvo chekọ-ọ, kirobo ro ru kẹ Ẹglọn, ọ da ghwọrọ kakare vi kohwo kohwo rọ herọ.

³⁸ Etiyin Joshua vẹ Izrẹl ejobi, de rhivwi kpo Debir ra họnrọ,

³⁹ ọ da reyọ vẹ ovie rọye vẹ irho rọye ejobi; ayen da vwẹ ọlọkọ nyavwe ayen hwe, ayen da ghwọrọ kohwo kohwo rọ herọ kakare, ọ yan jẹ ohwo ọvuọvo vwo-o; kirobo ro ru Hebrọn vi Libnah vẹ ivie rayen, ọtiọye o ru Debir vẹ ovie rọye.

⁴⁰ Ọtiọye Joshua phi otọ na ejobi kua, orho rọ obenu rẹ ugbenu na kugbe Negẹb vẹ etọ rẹ hẹ obo ọghwrọrọ na, vẹ ivie rayen, ọ yan jẹ ọvuọvo vwo-o, ẹkẹvuọvo ọ da guọghọ obo re nwẹn vwo ejobi, kirobo rẹ Ọrovwohwo Ọghẹnẹ rẹ Izrẹl ji urhi kẹ.

⁴¹ Joshua de phi ayen kua nẹ Kadeshbarnea re te Geza, vẹ orho ri Goshẹn ejobi, rhiri re te Gebeọn.

⁴² Etiyin Joshua da reyọ ivie nana ejobi vẹ etọ rayen ẹsiẹvuọvo, fikiridie Ọrovwohwo rẹ Ọghẹnẹ rẹ Izrẹl họnre kẹ Izrẹl.

⁴³ Etiyin Joshua de rhivwi, ọ vẹ Izrẹl ejobi, kpo obo erhọn vwi Gilgal.