Jona 4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ivuemiovwo ri Jona Kugbe Arodọvwẹ rẹ Ọghẹnẹ

¹ Ẹkẹvuọvo ophu de mu Jona gangan, ivun de miovwo.

² Ọ da nẹ ẹrhovwo kẹ Ọrovwohwo ọ da ta, Me rẹ wẹ, Ọrovwohwo, ọnana dia obo re me tare re me vwọ obo orho mẹ? Ọye sorọ me vwọ djẹ kpo Tarshishi, Kidie me riẹnre nẹ wọwẹ Ọghẹnẹ rẹ ehrọre vẹ arodọvwẹ, wọ fobọ mu ophu-u, wọ vọnre vẹ ẹguọnọ ro jẹrhẹriẹ wọ me rha kparẹ ẹwẹn vrẹ emu ọbrabra ru wọ guọnọ ru.

³ Vwẹ ọtiọye na, E Orovwohwo, reyọ arhọ mẹ nẹ uvwe oma, me rẹ wẹ kidie o yoma kẹ vwẹ ri mi vwo ghwu nọ ọ re me da rhọ.

⁴ Ọrovwohwo da ta, Ku wọ riẹn ru rẹ ivun vwo miovwo uwe?

⁵ Etiyin Jona da yan nẹ evun rẹ orere na o de re tidia vwẹ obaro ọnre rẹ orere na, ọ da bọn ogarivi kẹ oma rọye vwẹ etiyin. O de tidia vwẹ evun rẹ ophie rọye, bẹsiẹ rọ cha vwọ mrẹ obo re cha phia kẹ orere na.

⁶ Ọrovwohwo Ọghẹnẹ da vwẹ okankọn ọvo rhe, re ọ rhi si rhurhu Jona, rere ophie rọye vwo rhurho uyovwi, rere oma vwo jẹ ẹbajẹ. Ọtiọye na oma da vwerhe Jona gangan fiki rẹ okankọn na.

⁷ Ẹkẹvuọvo ọke rẹ ọke vwo rhie vwẹ ẹdẹ rivẹ, Ọghẹnẹ da vwẹ ohori rhe, rhe riẹ okankọn na ọtiọye na o de vwioro.

⁸ Ọke rẹ ọnre vwọ varhe, Ọghẹnẹ da vwẹ odju ọyaya rẹ obaro ọnre rhe, uvo na ko rhovwa mu Jona uyovwi ọtiọye na oma ko ron, kọ guọnọ nẹ ughwu gbe ghwe hwe ọye sievo, ọ da ta O yoma kẹ vwẹ ri mi vwo ghwu nọ ọ re me vwọ rhọ.

⁹ Ẹkẹvuọvo Ọghẹnẹ da ta kẹ Jona, Ku wọ riẹn ru rẹ ivun vwo miovwo uwe fiki rẹ okankọn na? Ọ da ta, Me riẹn ru rẹ ivun vwo miovwo uvwe, ivun tobọ miovwo uvwe te ughwu dede.

¹⁰ Ọrovwohwo da ta, Wọ re ehrọre rẹ okankọn ru wọ wian phihọ-ọ, eyẹ re wọ nẹrhe ọ djẹ-ẹ, rọ dje nẹ otọ rhe vwẹ ason, ro de rhe ghwu vwẹ ason yena ọvo.

¹¹ O gbi rhe fo re me re ehrọre ri Ninivẹ, orere rode yena, rẹ ihwo rọye bunọ uriori ujosan re riẹn obọrhe eyẹ obọhwẹre raye-en, kugbe uchuru buebu na?