Joẹl 1 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ekala Rhe Guọghọ Otọ na

¹ Ota rẹ Ọrovwohwo na rọ bru Joẹl rhe, rẹ ọmọ ri Pẹtuẹl.

² Nyo ọnana, ovwan emare, kerhọn, ovwan ihwo re dia otọ na ejobi! emu ọtiọnana ruru vwẹ ọke rẹ ovwan dẹvure, eyẹ ọke rẹ esẹ rẹ ovwan?

³ Gbe ikun rọye kẹ emọ rẹ ovwan, gbe jẹn emọ rẹ ovwan gbe kẹ emọ rayen, re emọ rayen rhe gbe kẹ uvwiẹ ọfa.

⁴ Obo rẹ igurube na re chekọ, ọye igurube re rhan rere. Obo rẹ igurube rha re chekọ, ọye ebaka ri phọ rere, obo re ebaka ri pho re chekọ ọye ebaka re ghwọrọ rere

⁵ Vrẹn, ovwan igbaudu, re wa viẹ; we beroma, ovwan ihwo ejobi re da udi, fiki rẹ udi rọ miẹmiẹ, kidie e kuro kufia nẹ unu wẹn.

⁶ Kidie ẹgborho ọvo rhe vwo so otọ Mẹ, gangan ọ bu basa-an; ako rọye ako rẹ okpohrokpo, ọ de vwọ ako rẹ okpohrokpo re aye.

⁷ Ọ da guọghọ vain mẹ ejobi, ọ da dia irhe ri fig mẹ; ọ da kpẹn ehọrọ rayen kuotọ e de ru eghọn rayen fon.

⁸ Viẹ kerẹ ọmọtobẹ ra vwẹ esiso rhuo re suẹn rhe ọshare rẹ ọtarhe rọye.

⁹ Izobo rẹ ọka kugbe izobo rẹ udi e bru ayen kufia nẹ uwevwi rẹ Ọrovwohwo na. Irherẹn na muomahọ, otu ri gbe odibo kẹ Ọrovwohwo na.

¹⁰ A ghwọrọ idju na ejobi fiotọ, otọ na muomahọ; fikiridie a ghwọrọ ọka na, udi na re fiotọ, Evwri na re beroma.

¹¹ Jo gbe we unu, E otu ri voro otọ, Beroma, E otu re rhuẹrẹ vain, fiki rẹ ọka vẹ irosun, fikiridie orhọ rẹ udju na ejobi ghwọrọ kufia.

¹² Vain na re vwioro urhc ri fig na ra fa ẹbe Pomegranate, oriẹ, kugbe orhomrẹ, irhe rẹ aghwa na ejobi fa ẹbe re, omavwerhovwẹ gbe herọ kẹ emọ rẹ ihwo-o

¹³ Vwẹ esiso rhuo re wọ viẹ, E irherẹn na berọma, E otu ri gbe odibo vwẹ enu rẹ agbada na Ro uwevwi, vwẹ esiso rhuo shevwerhẹ. E otu ri gbe odibo kẹ Ọghẹnẹ mẹ! Fikiridie izobo rẹ ọka vẹ izobo rẹ udi e si ayen nẹ uwevwi rẹ Ọghẹnẹ wẹn re.

¹⁴ Bru ẹdẹ orẹ, se ọghwẹgbe ri ruru Se ekpako na kugbe ihwo re dia otọ na ejobi re koko uwevwi rẹ Ọrovwohwo Ọghẹnẹ wẹn; re wa viẹ kẹ Ọrovwohwo.

¹⁵ Eghwo kẹ ẹdẹ na! Kidie ẹdẹ rẹ Ọrovwohwo na kerire, kerẹ ẹghwọrọ ro nẹ obọ rẹ Ọrovwoẹgba cha– eriyin ọ cha rhe.

¹⁶ Ọ dianẹ a ghwọrọ emuọre na kuẹfia vwẹ irharo rẹ ovwan na, te aghọghọ te omavwerhe nẹ uwevwi rẹ Ọghẹnẹ wẹn?

¹⁷ Emamọ na siẹ reyọ vwẹ otọ rẹ ukorekpẹn, Erhu na hirhe phihọ ofefe; erheri rẹ eka na guọghọ re fikiridie eka mọre-e.

¹⁸ Nighe obo rẹ eranvwe na guan! ekru rẹ uchuru na ofu dje ayen fikiridie egbri gbe herọ kẹ aye-en. vwevwe rẹ igegede na dede na mu opharo phihọ.

¹⁹ Wẹ, E Ọrovwohwo, Me viẹ se. Kidie erhanre rhe torhẹ egbri rọ hẹ evun rẹ aghwa, erhanre mu la ro irhe re hẹ evun rẹ aghwa ejobi.

²⁰ Vwevwe rẹ eranvwe rẹ aghwa na viẹ hwe we fikiridie ame rẹ ẹtẹrhe na ejobi kpọ yamu, yẹ erhanre ghwa torhẹ egbri rẹ aghwan na.