Jerimaya 6 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ẹghwọrọ ri Jerusalẹm kugbe Juda

¹ Djẹ kẹ arhọ wẹn, E ovwan ihwo ri Bẹnjamin, nẹ uherevie ri Jerusalẹm! Hworo ọgban vwi Tekoa, dje oka phia vwi Betakcherem; kidie umiovwo re ghwie nẹ obohwẹre ọnre cha, kugbe eghwọrọ rode.

² E ra pẹpẹre vẹ i ri siurhuru na ejobi me cha ghwọrọ, Ọmọte ri Zayọn na.

³ Isiugegede vẹ igegede rayen cha họnrọ ayen cha tọn itughẹ rayen riariẹ phihọ dohwo dasan rọye ye cha re odi.

⁴ Choma rẹ ofovwi vwọ suọ; vrẹn, we je kpo imu na vwẹ oghẹruvo. Ekan kẹ avwanre kidie ọke re kpo, Uhoho re ovwọnvwọn re gro!

⁵ Vrẹn re a ra họnrọ vwẹ asọn ra ghwọrọ ighẹn rọye!

⁶ E nẹ Ọrovwohwo rẹ otuofovwi na tare. She irhe rọye ghwiotọ wa gba ohẹrhẹ kpahe Jerusalẹm. Ọnana orere ro fo ehwe gangan; emuọvo hẹ evun rọye-e jọkpa rẹ oshenyẹ.

⁷ Obo rẹ orhare sẹro rẹ ame rọye djidjidji ye, ọtioye ọ sẹro rẹ orukuruku rọye djidjidji; omuru gidigidi vẹ eghwọrọ ọye enyo vwẹ evun rọye; emiavwe vẹ oma ẹnwan eye me mrẹre vwẹ obaro mẹ vwẹ ọke ejobi.

⁸ Noma te, E Jerusalẹm, mi de rhe sioma nu we, mi de rhe ru we dia ofefe, rhe dia otọ re jẹ dia.

⁹ Enẹ Ọrovwohwo rẹ otuofovwi na tare. Gbo otu ri chekọ vwẹ Izrẹl; Ọtiobo re gbo vain, gba vwẹ obọ wẹn wan rhe kerẹ ohwo rọ kọrọ otiẹ vwẹ enu rẹ eghọn rọye.

¹⁰ Kono me vuẹ ono me je kpokpa kẹ, rere ayen vwo nyo? Nighe, erhọn rayen rhurhuru, ayen sa kerhọ-ọn nighe, ota rẹ Ọrovwohwo kọ họhọ ehwẹjẹ kẹ ayen, oma rọye vwerha aye-en.

¹¹ Ọtiọye na ophu rẹ Ọrovwohwo da vọn vwẹ evun, oma rhọvwẹ udu me sa gba-a. Kuọ phihọ enu rẹ emọ na vwẹ evun rẹ urhuvwu na kugbe enu rẹ ukoko rẹ imighene na rhe; te ọshare te aye, a cha reyọ otu re ghwanre kugbe ekpako.

¹² A cha vwẹ uwevwi rayen kẹ ihwo efa, te udju vẹ eya rayen ejobi, kidie me cha riẹn obọ mẹ kpahọ kpahe ihwo rẹ otọ na eriyin, Ọrovwohwo na tare.

¹³ Kidie nẹ omotete re te ọkpako rayẹn, vwo urhuru rẹ igho re eku; nẹ ọmraro re te orherẹn ruẹ emu rẹ egbẹnẹkẹ.

¹⁴ Ayen sivwi era rẹ ihwo mẹ te-e, ta nẹ, Ufuoma, ufuoma, yẹ ufuoma herọ-ọ.

¹⁵ Oma vo ayen vwẹ ọke rẹ ayen de gbe ẹgua? Ejo, oma vo aye kakaka-a ayen riẹn obo re muẹ opharo phihọ. Vẹ ọtiọye na ayen she phihọ ohri rẹ otu ri sheri, vwẹ ọke ri mi de hwe ayen ke phi ayen wan, eriyin Ọrovwohwo na tare.

¹⁶ Enẹ Ọrovwohwo na tare, Mudia vwẹ oma rẹ idjerhe, wo ni, wọ nọ ekpen re idjerhe rẹ awanre na asan rẹ omamọ rẹ idjerhe epha, ru wa yan phihọ, re wọ mrẹ urovwoma vwọ kẹ ẹnwẹn rẹ ovwan Ẹkevuọvo ayen da ta nẹ, Avwanre cha yan phihọ-ọ.

¹⁷ Me da vwẹ erhẹrotọ mu kẹ ovwan, ta nẹ, Kerhọn rẹ edo rẹ ọgban na! Ẹkẹvuọvo ayen tare nẹ, Ma cha kerhọ-ọn.

¹⁸ Ọtiọye na gbe nyo, E ẹgborho, gba riẹn, E ukoko, obo re cha phia ke ayen.

¹⁹ Nyo, E akpọ, nighe, me herọ ghwa umiovwo rhe ihwo nana re, ekankọn rẹ ayen kọnre kidie ayen kerhọn rẹ eta mẹ-ẹ; ayen sẹro rẹ urhi mẹ-ẹ.

²⁰ Adjija ri nẹ Sheba bru vwe cha na die ifiri, eyẹ uhwerhe ọ miẹmiẹmiẹ rọ nẹ ogboko cha na? Izobo rẹ ẹtorhẹ wẹn na a reyọ aye-en eye izobo wẹn na je vwe-e.

²¹ Ọtiọye na enẹ Ọrovwohwo na tare; Nighe, mi che mu uchukurhe umwemwu phihọ idjerhe rọ kprọ ihwo nana awọ she; te ese te emọ ejobi te oko te ugbeyan cha ghwọrọ

²² Enẹ Ọrovwohwo na tare: Nighe, ihwo evo nẹ obọhwẹre ọnre cha ẹgborho rode na ri tue nẹ ogboko, oba rẹ akpo na cha.

²³ Ayen yọnrọn umurhabọ vẹ oshuẹ, ihwo umwemwu ri nẹ aruedọ-ọ, edo rayen họhọ ohọnre rẹ abadi ayen gua vwẹ enu re iyesi e nabo hwa phihọ kerẹ ihwo re hẹrhẹ ofovwi e hwa kpahe owẹ, E ọmọtẹ ri Zayọn!

²⁴ Avwanre nyo ikun rọye, abọ re avwanre ke ghwrọghọ odjadja te avwanre unu, odjadja kerẹ aye rọ chuẹ uvwiẹ.

²⁵ Wa yan kpo evun rẹ aghwa na rẹ, wa je yan vwẹ idjerhe na-a, kidie ọvweghrẹ na yọnrọn ọlọkọ vwẹ obọ oshọ herọ vwi kabọ kabọ.

²⁶ Vwẹ esiso rhuo, E ọmọtẹ rẹ ihwo mẹ, wo gbule vwẹ iwurhie; muomahọ kerẹ ohwo ro vwerhe ọmọ ọvuọvo rọyen, omamọ rẹ oviẹ ro muenu korokoro kidie kpregede na ọye oghwọrọ na che vwo bru avwanre rhe.

²⁷ Me vwẹ owẹ mu kerẹ ovwanvwọ vwẹ ohri rẹ ihwo mẹ rere wọ riẹn vwo vughe idjerhe rayen,

²⁸ Ayen ejobi gan udu ayen vwọ so vwẹ ayen ihwo ri miovwo ihwo ẹrovwo vẹ utehru ayen ruẹ, ayen ejobi miovwi re tototo.

²⁹ Ogun ro djuẹ owanvwe na vughu vughu odje na ra wran vwẹ erhanre, Ọ rọ fa ẹrovwo na de fa ghevweghe, Kidie ohwo umwemwu na ji no-o.

³⁰ Isọn re igho ọye e se ayen, kidie Ọrovwohwo siẹn ayen.