Jerimaya 52 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ẹriọ ri Zedakaya

¹ Zedikaya da dia ẹgbukpe uje gbẹ ọvo ọkpako te ro ke rhe dia ovie, ọ da re uvie ikpe uhwọvo vwi Jerusalẹm. Odẹ rẹ oni rọye da dia Hamuta ọmọtẹ ri Jerimaya ri Libna

² O de ru obo ri miovwiri vwẹ obaro rẹ Ọrovwohwo, kirobo rẹ Jehọiakim ruru ejobi.

³ Ghine uyota fiki rẹ ophu rẹ Ọrovwohwo na eravwọ da rhe gbaphihọ vwi Jerusalẹm vi Juda te obo ro de phi ayen kufia nẹ obaro rọye. Zedikaya de rhi mu kpahe ovie ri Babilọn.

Eshe ri Jerusalẹm

⁴ Vwẹ ẹgbukpe rẹ irhiri rẹ ẹriọ rọye, vwẹ emeranvwe rihwe, vwẹ ẹdẹ rihwe rẹ emeranvwe na, Nebukadreza ovie ri Babilọn da rhe vẹ otuofovwi rọye ejobi rhe vwọ so Jerusalẹm, ayen da yariẹ phihọ ayen de ke phihọ.

⁵ Ọtiọye e de ke orere na phihọ re te ẹgbukpe uhwọvo rẹ Ovie Zedikaya.

⁶ Ẹdẹ rirhiri rẹ emeranvwe rẹne owẹvwe da rhe gan gangan vwẹ orere na, rẹ emuọre rha herọ kẹ ihwo rẹ otọ na-a.

⁷ E de bru uphrophro phihọ ighẹhẹ rẹ orere na, eshare rẹ ofovwi na ejobi da djẹ nẹ orere na vwẹ ason ra wan anurhoro rọ hẹ uherevie rẹ igbẹhẹ ivẹ na, vwẹ oma rẹ ogba rẹ ovie na, ye ihwo ri Kaldia ke orere na phihọ. Ayen da ra wan obo Araba na.

⁸ Ẹkẹvuọvo unofovwi ri Kaldia da vwọ tua ovie na, ayen da vwa Zẹdikaya vwẹ uphephẹ ri Jerikọ, unofovwi rọye ejobi da hra jovwo.

⁹ Etiyin ayen de mu ovie na, ayen da reyọ vwo rhe ovie ri Babilọn vwẹ obi Ribla vwẹ otọ ri Hamat, o de brorhiẹ hwe.

¹⁰ Ovie ri Babilọn de hwe emeshare ri Zedikaya vwe irharo rọye, eriyin rhe o ji hwe isun ri Juda vwẹ obi Ribla.

¹¹ O yoghro ẹro ri Zẹdikaya nu ọ da vwẹ ejọnrọn gba, ovie ri Babilọn da reyọ kpo Babilọn, ọ de phio phihọ uwodi re te ẹdẹ ughwu rọye.

Juda Kpo Ighuvwu

¹² Vwẹ evun rẹ emeranvwe riyori, vwẹ ẹdẹ rihwe rẹ emeranvwe na–-rọ dia ẹgbukpe rihwe gbẹ irhiri rẹ Ovie Nebukadreza, ovie ri Babilọn–Nebuzaradan olotu rẹ ohẹrhẹ ohwo rọ ga ovie ri Babilọn na, da ro Jerusalẹm.

¹³ O da torhẹ uwevwi rẹ Ọrovwohwo na, te uwevwi rẹ ovie vẹ iwevwi ri Jerusalẹm ejobi; uwevwi kuwevwi rẹ rhoro ejobi ọ torherọ te otọ.

¹⁴ Unuofovwi ri Kaldia, vẹ olotu rẹ ohẹrhẹ re vẹ ọye gba herọ na, da guọghọ igbẹhẹ re yariẹ Jerusalẹm phihọ te otọ.

¹⁵ Ọye Nebuzaradan olotu rẹ ohẹrhẹ na de mu ihwo ẹvo re ma dia igbere vwẹ ihwo na vẹ otu ri chekọ vwẹ orere na kugbe otu rẹ djẹre na ighuvwu rhe ovie ri Babilọn, ji kugbe otu rẹ ewena ri chekọ.

¹⁶ Ẹkẹvuọvo Nebuzaradan olotu rẹ ohẹrhẹ na da yan jẹ evo rẹ otu ri ma dia ivwiogbere vwẹ otọ na vwọ re ayen vwọ dia eghwẹrẹ re vwẹ ẹro te otọ na.

¹⁷ Ichivwo rẹ ẹrovwo re uwevwi rẹ Ọrovwohwo na, imeje itete vẹ oze rẹ ẹrovwo re hẹ evun rẹ uwevwi rẹ Ọrovwohwo na, ihwo ri Kaldia da guọghọ ibribro, ayen da ghwẹ eravwo na ejobi kpo Babilọn.

¹⁸ Ayen da ghwa ichẹ na yanran, vẹ isaboro, vẹ ahwa vẹ ize ride vẹ ekanaka ra vwọ torhẹ izobo, kugbe ekuakua ra vwẹ ẹrovwo ku ejobi re vwo ru iruo vwẹ uwevwi na yanran;

¹⁹ ji te ize itete vẹ ize rẹ enyerhanre, vẹ ize ride, vẹ ichẹ, vẹ ogburhukpẹ, vẹ isete ra vwọ torhẹ izobo, kugbe iko ra vwọ jẹ udi. Obo ra vwẹ oro ru ejobi, onotu rẹ ohẹrhẹ na da ghwẹ ayen yanran kerẹ oro, obo rọ dia idọnọ kerẹ idọnọ.

²⁰ Vwọ kẹ uchivwo ivẹ na, ọvo abadi na, irhuẹn ihwivẹ rẹ ẹrovwo rẹ obotọ rẹ abadi na, vẹ awọ, ri Solomọn ovie na ru phihọ uwevwi rẹ Ọrovwohwo na, ẹrovwo rẹ ekuakua nana ejobi họhọ basa-a.

²¹ Vwọ kẹ ichivwo na, vwonẹ, enuẹra rẹ uchivwo ọvo gro te kubit ihwe gbẹ ẹrenre kiriariẹ rọye da dia kubit ihwivẹ, ọkpan rọye kẹ irhiabọ ẹne, ọ vẹ eghogho.

²² Vwẹ enu rọye ighere rẹ ẹrovwo herọ; ugrogro rẹ ighere ọvo da dia kubit iyori, erhuoro kugbe pomegranate, ejobi ẹrovwo, da he enu rẹ ighere na yariẹ. Uchivwo rivẹ ji vwẹ ọtiọye, kugbe pomegranate.

²³ Pomegranate ujọne gbẹ ihwe da hẹ akakọ rọye; pomegranate na ejobi ujori yariẹ vwẹ enu rẹ irhuerhuo na.

²⁴ Onotu rẹ ohẹrhẹ na da reyọ Seraya olori rẹ irherẹn na, vẹ Zefanaya orherẹn rivẹ na, kugbe erhẹrotọ erha rẹ anurhoro na;

²⁵ ọ da reyọ oruiruo ọvo ro suẹn ihwo rẹ ofovwi na nẹ orere na rhe, vẹ ediaguare ighwrẹ rẹ ovie, ra mrẹre vwẹ evun rẹ orere na, vẹ osiẹbe rẹ ohwo ro suẹn unuofovwi na ro siẹ ihwo rẹ otọ na koko na, vẹ eshare ujorha rẹ ihwo rẹ otọ na, ra mrẹre vwẹ uherevie rẹ orere na.

²⁶ Kọye Nebuzaradan olotu rẹ ohẹrhẹ na da reyọ ayen, ọ da vwẹ ayen rhe ovie ri Babilọn vwẹ Ribla.

²⁷ Ovie ri Babilọn de hwe ayen, o de hwe ayen ghwu vwẹ Ribla vwẹ evun rẹ otọ ri Hamat, eriyin na e de mu Juda ighuvwu nẹ otọ rẹ obọ rọye na.

²⁸ Ọnana hẹ unu rẹ ihwo ri Nebukadreza mu ighuvwu kpo vwẹ ẹgbukpe righwrẹ, uriori erha gbẹ uje gbẹ erha rẹ ihwo ri Ju.

²⁹ Ukpe rihwe gbẹ ẹrenre ri Nebukadreza o de mu ihwo ujori ẹrenre gbẹ ọgban gbẹ ivẹ ighuvwu nẹ Jerusalẹm yanran;

³⁰ vwẹ ukpe ruje gbẹ erha ri Nebukadreza, Nebuzaradan olotu rẹ ohẹrhẹ na da ghwẹ ihwo ri Ju ujori ighwrẹ gbẹ ujuvẹ gbẹ iyori ighuvwu kpo; ihwo na ejobi da dia uriori ẹne gbẹ ujori esan.

Esiobo nẹ Jehoyachin E de Mu Ọghọ kẹ vwi Babilọn

³¹ Vwẹ ukpe rẹ ọgban gbẹ ighwrẹ rẹ ighuvwu ri Jehoiachin ovie ri Juda, vwẹ emeranvwe rihwivẹ, vwẹ ẹdẹ uje gbẹ iyori rẹ emeranvwe na, Ivo-mẹrodak ovie ri Babilọn, vwẹ evun rẹ ukpe rọ ru uvie na, ọ da kparẹ uyovwi ri Jehoiachin ovie rẹ Juda kpenu o de sio nẹ uwodi rhe;

³² ọ da ta ota kẹ vwevwerhe, ọ da kẹ agbara ro kpenu nọ egbara rẹ ivie re vọye gba herọ vwi Babilọn na.

³³ Eriyin na Jehoiachin de ku iwun rẹ uwodi rọye kufia. Kẹdẹ kẹdẹ rẹ akpọ rọye kọye ọ vwọ re emu vwẹ emẹjẹ rẹ ovie na.

³⁴ Vwọ kpahe omobo rọ vwọ yọnrọn obọ, ovie na da kẹ igho kirobo rọ guọnọre kẹdẹ kẹdẹ, re te ẹdughwu rọye vwẹ uchọke rọ sa tọn krite.