Jerimaya 5 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Umwemwu ri Jerusalẹm Kugbe Juda

¹ Djẹ kpenẹ kpenẹ wan irhuvwu ri Jerusalẹm, no wo roro te! nabọ guọnọ ọgua rọye se wọ mrẹ ohwo ọvo rọ dia ọsoso ohwo rọ guonọ uyota; ki mi vwo ghovwo.

² Owenẹ ayen tanẹ, kirobo rẹ Ọrovwohwo herọ na yẹ ayen duvwu iyori rẹ efian.

³ E Ọrovwohwo ẹro wẹn gbe rha mrẹ uyota? wọ teyọ ayen she, ẹkẹvuọvo yọ miavwẹ aye-en. Wọ guọghọ ayen yẹ ayen kuobọ rhẹriẹ-ẹ, ayen ru opharo rayen gan nọ oragha ayen rhọvwe kurhẹriẹ-ẹ.

⁴ Etiyin me da ta, Enana wọ de mrẹ na igbere, ayen vwo iroro-o, kidie ayen riẹn idjerhe rẹ Ọrovwohwo na-a, ayen riẹn urhi rẹ Ọghẹnẹ raye-en.

⁵ Mi bru ihwo ride ra, re me je ta kẹ ayen, kidie ayen riẹn idjerhe rẹ Ọrovwohwo, kugbe urhi rẹ Ọghẹnẹ rayen ẹkẹvuọvo ayen ejobi koko vwirhi urhekpe na, ayen da sanvwe ejọrọn na vwie.

⁶ Eriyin na okpohrokpo che nẹ aghwa rhi ri hwe ayen, ubido che nẹ atọn cha rhe ghwọrọ ayen. Edjẹnẹkpo ra rhẹrẹ irere rayen, ohwo kohwo rọ ro uphephẹ ka sanvwọ ibribro, kidie ọyanchọ rayen buru gangan, eshe rayen rhoro gangan.

⁷ Mavọ mi se vwo ghovwo ovwan? emọ rẹ ovwan sen vwẹ, e re dia eghẹnẹ-ẹ keye ayen vwo duvwu iyori. Me ghẹrẹ ayen evun vọn nu, ayen ki gbe igberadja kẹ ayen tẹrẹ usun kpo uvwevwi rẹ igberadja.

⁸ Ayen họhọ iyesi ra nabọ ghẹre ohwohwo de re nene aye rẹ ọrivẹ rọye.

⁹ Mi gbi hwe ayen vwi fiki rẹ imu nana-a eriyin Ọrovwohwo tare; me gbe re ihri kẹ oma mẹ kpahe orere ọtiọnana?

¹⁰ Yan wan urhiẹ ri vain rọye re wọ guọghọ, ẹkẹvuọvo wo ghwe furhie re-e, kpare eghọn rọye no, kidie ayen dia e re Ọrovwohwo-o.

¹¹ Fikiridie uwevwi rẹ Izrẹl kugbe uwevwi ri Juda gbe ọfarhiẹ rhurhu vwe miomiovwi, eriyin Ọrovwohwo tare.

¹² Ayen vwọnrọn efian kpahe Ọrovwohwo, ayen da tanẹ, O se ru emuọvo-o, umiovwo se te avwanre oma-a eyẹn avwanre sa mrẹ ọlọkọ eyẹrẹ owẹvwe-e.

¹³ Emraro na che hirhe phihọ aphopho, ota na hẹ evun raye-en. Eriyin e che ru kẹ ayen!

¹⁴ Vwe ọtiọye na enẹ Ọrovwohwo na tare, Ọghẹnẹ rẹ otuofovwi na: Fikirobo rẹ ayen vwọ ta ota nana na, nighe, mi che ru ota mẹ rọ hẹ unu wẹn phihọ erhanre ihwo nana kẹ urhe, erhanre na kọ tọrhẹ ayen.

¹⁵ Nighe, mi che ji orere nẹ ogboko rhe E uwevwi rẹ Izrẹl, eriyin Ọrovwohwo na tare. Orere na kri otọ re orere rẹ awanre oruẹ, orere ru wọ riẹn ephẹrẹ rọye-e, eyẹ wọ se nyo obo rẹ ayen ta-a.

¹⁶ Ekpu rẹ edada rayen họhọ ushi ro rhie phihọ, ayen ejobi egba re ihwo.

¹⁷ Ayen cha re orhọ wẹn vẹ emuọre wẹn, ayen cha re emeshare wẹn vẹ emetẹ wẹn, ayen cha re igegede wẹn vẹ ichuru wẹn; ayen cha re vain wẹn vẹ owe wẹn; irere ra gba ogba phihọ ru wọ vwẹ ẹro so na, ayen cha vwẹ ọlọkọ ghwọrọ ayen.

¹⁸ Dede na vwẹ ẹdẹ yena, eriyin Ọrovwohwo tare, mi ghwe che furhie ovwa-an.

¹⁹ Ọke rẹ ihwo wẹn da ta nẹ, Die sorọ rẹ Ọrovwohwo rẹ Ọghẹnẹ vwo ru avwanre imu? ku wọ ta kẹ ayen nẹ, Ọtiobo rẹ ovwan sen vwẹ re wa da ga edjọ erhorha vwẹ otọ rẹ ovwan na, ọtiọye ovwan je ga erhorha vwẹ otọ rọ dia ọ rẹ ovwa-an

²⁰ Ghwoghwo ọnana vwẹ uwevwi ri Jekọp, ghwoghwo vwi Juda.

²¹ Nyo ọnana, E ẹkpa ighenghẹn ri vwo ẹro, ye mrorẹ-ẹ ri vwo erhọn yi nyo ẹme-e na.

²² Wa djẹ oshọ me-e? eriyin Ọrovwohwo na tare ovwan rha phariẹ vwẹ obaro mẹ-ẹ? Me vwẹ ubu na jẹn ugbwru kẹ abadi ugbere ri bẹdẹ ro jẹ sa wan vrẹn; owenẹ abadi na họnre dede, ayen sa shariẹ-ẹ, owenẹ omimi na kpare ayen sa wan vrẹ-ẹn.

²³ Ẹkẹvuọvo ihwo nana vwo udu ọgangan ra vwọ chọ urhi, ayen chuko ku ayen da yanran.

²⁴ Ayen sa ta vwẹ udu raye-en, E jẹn avwanre djẹ oshọ rẹ Ọrovwohwo rẹ Ọghẹnẹ rẹ avwanre, rọ rho osio vwẹ ọke rọye, osio rẹ oghwe vẹ osio rẹ ọkeuvo, ọ da yọnrọn kẹ avwanre ẹdẹ ro bru kẹ orhọ.

²⁵ Orukuruku rẹ ovwan djẹ enana yanran, imwemwu wẹn si emu esiri nu we obọ.

²⁶ Kidie a mrẹ ihwo umwemwu vwẹ ohri rẹ ihwo mẹ; ayen rhẹrẹ pẹpẹ kerẹ ọkpaufi rẹ ọphran rọ rhẹrẹ. Ayen kpahe ufi, ayen mu Ihwo.

²⁷ Kerẹ obere rọ vọnre vẹ ephran, uwevwi rayen vọnre vẹ ọphiẹvwẹ; kọye ayen da rhe dia ikpihwo ride ri feri,

²⁸ oma da rhe ro ayen sọkọ sọkọ. Ayen riẹn ughwru vwẹ uruemu rẹ orukuruku-u, ayen brorhiẹ rẹ esiri-i ayen nyo ota rẹ ọmọphrorivwi re vwo ruo yovwi-i, ayen je chọ ochọ rẹ ọrakpọbẹ kẹ-ẹ.

²⁹ Mi gbe hwe ayen fiki rẹ imu nana? eriyin Ọrovwohwo na tare, orere ọtionana me gbe reihri kẹ oma mẹ kaphẹ orere ọtiọna na-a?

³⁰ Emu rẹ igbunu kugbe emu rọ muoshọ rhi ru vwe vwẹ evun rẹ otọ na:

³¹ emraro na mraro rẹ efian irherẹn na ki nene idjedje rayen ihwo mẹ ghwa reyọ wan ọtiọye, komavọ ovwan ru vwẹ ọke rẹ oba de te?