Jerimaya 49 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Aroẹmrẹ Kpahe ihwo rẹ Ammọn

¹ Vwọ kpahe ihwo rẹ Amọn, Enẹ Ọrovwohwo tare: Izrẹl rhe vwo emọ-ọ? O vwo ọreuku-u? Die rha suọ ri Milkọm vwọ kua ihwo ri Gad, re ihwo rọye vwo yere vwẹ irere rọye?

² Ọtiọye na, gbe nighe, ede cha, eriyin Ọrovwohwo tare, ri mi che vwo ruo re de nyo edo rẹ ofovwi kpahe Rabba rẹ ihwo rẹ Amọn, ọ che hirhe phihọ ẹrhẹnre rẹ ekpẹn ofefe, a cha vwẹ erhanre torhẹ ighwre rọye, kẹsiẹye Izrẹl ke kua ihwo re kuarọ jovwo na, eriyin Ọrovwohwo tare.

³ Beroma, E Hẹshbọn, kidie a ghwọrọ Ai te otọ! Wa vie, E emetẹ ri Rabba! vwẹ isiso rhuo oma wẹn, viẹ, re wọ djẹrhe djẹkpo vwẹ ohri rẹ ogba na! Kidie e che mu Milkọm, kugbe irherẹn vẹ isun rọye kpo ighuvwu.

⁴ Die wọ vwọ vwẹ iyara wẹn vwọ yoma, E ọmọtẹ ro gbe igberadja na, rọ vwẹ ẹro so efe rọye, tanẹ, Ono sa rhe rhi mukpahe ovwẹ?

⁵ Nighe, me cha vwẹ oshọ ẹdjẹ vwo rhe we, eriyin Ọrovwohwo Ọghẹnẹ rẹ otuofovwi na tare, nẹ obọ rẹ otu re yariẹ owẹ phihọ ejobi, ka cha djẹ wẹ phia, dohwo dasa ro vwo gbe, o gbi vwo ohwo ro se koko isoghoro na-a.

⁶ Ẹkẹvuọvo ukuko rọye ke me cha rhoma vwẹ erhuvwu rẹ ihwo rẹ Amọn rhivwi rhe ayen, eriyin Ọrovwohwo tare.

Aroẹmrẹ Kpahe Idom

⁷ Vwọ kpahe Idọm: Enẹ Ọrovwohwo rẹ otuofovwi na tare: Aghwanre gbe hẹ Tẹman? Iroroejẹ ghwru nẹ obọ rẹ obuiroro re? Aghwanre rayen ravwiẹnre?

⁸ Djẹ, rhẹrioma, dia asan okokodo na, E ihwo ri Dedan! kidie me che mu okpetu rẹ Isọ rhurho ọke ri mi de che hwe.

⁹ Ọ da dianẹ otu re kọrọ otie de bru wẹ rhe, ayen rha kọrọ chekọ? Ọ da dianẹ iji rhere vwẹ asọn, Ọ dia ọ rọ te kẹ ayen ọvo ayen ghwọrọ?

¹⁰ Ẹkẹvuọvo me ban Isọ phihọ krodjo, mi rhie odjahọ rọyẹ phihọ, o gbi se si oma rọye nu-u. A ghwọrọ emọ rọyẹ, vẹ iniọvo rọye rẹ eshare, vẹ irivẹ rọye; ọ gbe herọ ọfa-a.

¹¹ Yan jẹ emephrorivwi wẹn vwo, me ghẹrẹ ayen rhọ kẹ wẹ, gbe jẹn eyauku wẹn vwẹ ẹro so vwẹ.

¹² Kidie enẹ Ọrovwohwo tare: Ọ da dianẹ otu ri fori re da uko na-a na da sa da, ku we se fiabọ rẹ ehwe? Wọ sa vabọ re ehwe-e, ẹkẹvuọvo wọ sa da.

¹³ Kidiẹ me vwẹ oma mẹ duvwuiyori nure, ẹriyin Ọrovwohwo tare, nẹ Bozra che hirhe phihọ emuọshọ, ohare ofefe kugbe ekan; irere rọye ejobi ke cha dia ifefe rhiri bẹdẹ.

¹⁴ Mi nyo ikun nẹ obọ rẹ Ọrovwohwo rhẹ, e ji ikọn ro ohri rẹ ẹgborho na nurẹ. Ghwẹ oma koko ru wa yanrhe rhe vwọ suọ, We vrẹn kpo ofovwi!

¹⁵ Kidie gbe no, mi che ru we hanvwe vwẹ ohri rẹ ẹgborho na, ra jẹfia vwẹ uherevie rẹ ihwo;

¹⁶ Oshọẹdjẹ ru wọ soro phiẹn wẹ re, kugbe eheri rẹ udu wẹn, wọwe rọ dia eghogho rẹ oragha, rọ yọnrọn enu rẹ ugbenu na Owenẹ wọ bọn ẹho wẹn kpenu kerẹ ugo dede, mi che si we nẹ etiyin rhiotọ, eriyin Ọrovwohwo tare.

¹⁷ Idọm che hirhe phihọ emuoshọ, oshọ che mu ohwo kohwo ro wan vrẹn ọ me fiẹ unu fiki rẹ ẹghwọrọ rọye ejobi.

¹⁸ Kerẹ ọke ra vwọ ghwọrọ Sodọm vẹ Gomora vẹ irere re kẹrẹ ayen na, eriyin Ọrovwohwo tare, ohwo cha dia etiyi-in, ohwo cha yan vwọ-ọ.

¹⁹ Kirobo rẹ okpohrokpo pho nẹ egbo ri Jọdan cha ro ogba ọgangan rẹ igegede ye, mi che ru ayen ra da djẹ jovwo kpregede, ohwo ro jevwe kọye me cha sanọ nọ re vwẹ enu rọye, Kidie ono re họhọ ovwẹ? Ono ri si ọbe se vwe?

²⁰ Didi osuigegede se mudia vwẹ obaro mẹ? Fiki rẹ ọtiọye na gbe nyo iroro rẹ Ọrovwohwo je kpahe Idọm vẹ obo rọ vwẹ evun vwọ kpahe ihwo ri Teman: Imigegede itete na dede e ji che kpono ayen yanran; omuẹro nẹ ogba rayen vẹ urhiẹvwe rayen che gbe ayen unu.

²¹ Vwẹ edo rẹ eshe rayen akpọ na ko che kpogho, edo rẹ ekperẹ rayen e che nyo vwẹ obo Abadi Ọvwavware na.

²² Nighe, ọvo cha kparoma rọ da rhan pherephere kerẹ ugo, ko rhie ibekpe rọye phihọ kpahe Bọzra, udu rẹ egbofovwi rẹ Idọm vwẹ ẹdẹ yena ke họhọ ọ rẹ aye rọ chuẹ uvwiẹ,

Aroẹmrẹ Kpahe Damaskos

²³ Vwọ kpahe Damaskọs Hamat vẹ Apad kpoghore, kidie ayen nyo ikun omiomiovwo re, Ayen ra wran vwẹ evun rẹ oshọ, kerẹ abadi rọ họnran rọ sa fon riẹi.

²⁴ Damaskọs hirhe phihọ ọvwiẹrẹ re, o kuoma rhẹriẹ kọ djẹ, uguegue de muo; uvwerhe vẹ oja gbarọ kokoroko, kerẹ aye rọ chuẹ uvwiẹ.

²⁵ Mavọ a vwọ siẹn orho ro kperi usi na, orho rẹ aghọghọ na!

²⁶ Ọtiọye na ighene rọye che she vwẹ ohwarha rọye, ihwo rẹ ofovwi rọye ejobi ka cha guọghọ ayen vwẹ ẹdẹ yena, Ọrovwohwo rẹ otuofovwi na re tarọ.

²⁷ Kimi che koko erhanre phihọ igbẹhẹ ri Damaskọs, ko cha guọghọ ogba rẹ ovie Bẹnhadad.

Aroẹmrẹ Kpahe Kedar kugbe Hazọ

²⁸ Vwọ kpahe Kedar vẹ uvie ri Hazọ ri Nebukadreza ovie ri Babilọn teyere na. Enẹ Ọrovwohwo na tare Vren, ra vwọ so Kidar! Guọghọ ihwo rẹ obaro ọnre na!

²⁹ Itughẹ rayen vẹ ekru rẹ igegede rayen na, emwa rẹ anurhoro vẹ ekuakua rayen ejobi kamel rayen ejobi e che mu ayen jẹn ayen vwo, ihwo ki che kperi kẹ ayen: Oshẹọdjẹ kọ dia vwẹ asan ejobi!

³⁰ Djẹ, ghoro sheri, dia asan okokodo, E ihwo ri Hezọ! eriyin Ọrovwohwo tare. Kidie Nebukadreza ovie ri Babilọn jẹ iroro kpahe owẹ, o vwo obo ro che ru kpahe owẹ.

³¹ Vrẹn, yanran ra vwọ so orere rẹ omafuru na, rọ herọ egbẹrhẹnẹdẹ na, eriyin Ọrovwohwo tare, ro vwo anurhoro-o eyẹ utehru-u na, rẹ ọye ọvo dia kpoghono na.

³² Kamẹl rayen ka cha kua ayen reyọ, ekru rẹ uchuru rayen ke gborho ayen reyọ. Me hra ayen kẹ odju kodju ayen otu ri bru akakọ rẹ ẹton rayen na, ke me cha vwẹ okpetu so ayen nẹ asan kasan ejobi rhe eriyin Ọrovwohwo tare.

³³ Hazọ che hirhe phihọ ẹdia rẹ ẹrha asan ofefe bẹdẹ; ohwo cha dia-a, ohwo cha sa ya vwọ-ọ.

Aroẹmrẹ Kpahe Elam

³⁴ Ota rẹ Ọrovwohwo ro bru Jerimaya rẹ ọmraro na rhe kpahe Elam, vwẹ ẹtuọhọ rẹ uvie eriọ ri Zẹdikaya ovie rẹ Juda.

³⁵ Enẹ Ọrovwohwo rẹ otuofovwi na tare: Nighe, mi che vwirhi umurhabọ rẹ Elam, egbe rẹ ogangan rọye;

³⁶ ke me cha reyọ odju ẹne nẹ igogo ẹne rẹ odjuvwu na rhe rhurhu Elam, me me hra ayen kẹ odju na, o rhe vwo ẹgborho ọvuọvo re ihwo ra djẹ nẹ Elam na che jẹ ra-a.

³⁷ Me vwẹ oshọ mu Elam vwẹ obaro rẹ ivwighrẹ rayen, vẹ obaro rẹ otu re guọnọ ayen hwe, me reyọ umiovwo mẹ vwo rhe ayen, ophu mẹ rode na, eriyin Ọrovwohwo tare, Mi ji ọlọkọ nene ayen, bẹsiẹ me vwọ ghwọrọ ayen nu,

³⁸ ke me cha vwẹ ekete mẹ viẹ vwẹ Elam, ke me guọghọ ivie vẹ isun rayen, eriyin Ọrovwohwo tare.

³⁹ Ẹkẹvuọvo vwẹ ẹdẹ rẹ okuko vwobo me cha rhoma vwẹ erhuvwu rẹ Elam rhivwi rhe, eriyin Ọrovwohwo tare.