Jerimaya 48 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Aroẹmrẹ Kpahe Moab

¹ Kpahe Moab,. Enẹ Ọrovwohwo rẹ otuofovwi, Ọghẹnẹ rẹ Izrẹl tare: Ekan ki Nebo, kidie a ghwọerọ a vwẹ ọmavovwẹ kẹ Kiriataim, a reyerọ; ọgba na a vwẹ rọ jehwẹ a ghwọerọ te otọ;

² ihwo ri kperi usi vwi Moab gbe herọ ọfa-a. Vwi Hẹshbọn ayen da jẹ iroro umwemwu kpahọ; wa yanrhe, we ja nyavwọ kufia rọ vwọ jẹ ẹgborho ẹdia! Te owẹ rhe, E Madmẹn, ke che ru we fọtovwi; Ọlọkọ cha vwọ tua wẹ.

³ Kerhọn oviẹ nẹ Horonaim cha, Ofefe vẹ ẹghwọrọ rọde na!

⁴ Moab a ghwọerọ re; e nyo oviẹ vwẹ ogboko vwẹ obi Zoa.

⁵ Kidie vwẹ asan eyerekpenu ri Luhit ayen yanran kpenu jẹ ayen viẹ, kidie vwẹ asan ọghwrọrọ ri Horonaim ayen de nyo edo rẹ ẹghwọrọ.

⁶ Wa djẹ! sivwi omobọ rẹ ovwan! wa dia kerẹ ekẹtẹkẹtẹ rọ djoma rọ hẹ evun rẹ aton!

⁷ Kidie, fikirobo wa vwọ vwẹ ẹro so ogba ọgangan vẹ efe rẹ ovwan na, e ji che mu ovwan rhe; Chemosh ji che kpo imu rhe, te irherẹn rọye kugbe isun rọye.

⁸ Ọghwọrọ na cha ro orere korere, o gbi vwo orere ọvuọvo rọ cha vabọ-ọ, iyara na cha guọghọ, asan ophephẹ na ka cha ghwọrọ kirobo rẹ Ọrovwohwo tarọ na.

⁹ Vwẹ lbekpe kẹ Moab, kidie ọ guọnọ rhan yanran; irere rọye cha dia ifefe, ohwo cha dia aye-en.

¹⁰ Ekan kẹ ohwo ro ru iruo rẹ Ọrovwohwo na yoyodo; ekan kẹ ohwo rọ vwẹ ọlọkọ rọyẹ sun ọbara-a.

¹¹ Moab egbomọphẹ nẹ ọke emọ rhe ro tidia phihọ enu rẹ ikiẹn rọye eji kuọ nẹ ọche phihọ ochẹ-ẹ, eyẹ ọ je yanran kpo imu-u; ọtiọye ọdavwẹ rọye ji no obọ-ọ ọnrhe rọye je rhẹriẹ-ẹ.

¹² Vwẹ ọtiọye na, gbe nighe, ẹdẹ cha, eriyin Ọrovwohwo tare, ri mi che vwo ji ogele rhe ro che gele, o ku obo re hẹ echẹ na fia, ghwọrọ ichago rọye ibribro.

¹³ Kẹsiẹye oma rẹ Kẹmosh ke vo Moab, kirobo rẹ oma rẹ Bẹtẹl vo uwevwi rẹ Izrẹl rẹ ayen vwẹ ẹro so ye.

¹⁴ Mavọ wo tare, Avwanre egba kugbe ihwo egangan rẹ ofovwi?

¹⁵ Ọghwọrọ ri Moab vẹ irere rọye rhe nure, imighene esiri rọye na ayen yanran kpo ehwe, eriyin Ovie na tare, ọ rẹ odẹ rọye Ọrovwohwo rẹ otuofovwi na.

¹⁶ Okpetu ri Moab si kẹre otọ rẹ ọdjarhe rọye rọ cha kpata kpata.

¹⁷ We muomahọ kẹ, ovwan re yariẹrẹ phihọ, Ovwan ejobi re riẹn odẹ rọye; tanẹ, Mavọ ọkpọ ọgangan na ru vwirhi, ọkpọ rẹ urinrin na.

¹⁸ Wotọ rhe nẹ urinrin wẹn, wọ tidia vwẹ otọ ọyaya, E ihwo ri Dibọn! Kidie ọghwọrọ ri Moab rhi bru vwa wẹ re; ọ guọghọ ogba ọgangan wẹn nure.

¹⁹ Mudia vwẹ oma rẹ idjerhe wọ rhẹrẹ, E ihwo re dia Aroa! Nọ ọshare rọ djẹ vẹ aye rọ djẹ vabọ; nẹ, Die phiare vwo?

²⁰ Oma vo Moab re, kidie a ghwọerọ; kuenu wọ viẹ! Ta vwẹ oma rẹ Anọn nẹ a guọghọ Moab te otọ.

²¹ Orhiebro rhe ọkpare na re, enu ri Holọn, vẹ Jaza, vẹ Mefat,

²² vẹ Dibọn, vẹ Nebo, vẹ Bẹtdiblataim,

²³ vẹ Kariataim, vẹ Bẹtgamul, vẹ Bẹtmeọn,

²⁴ vẹ Keriọt vẹ Bọzra, kugbe irere ejobi rẹ hẹ otọ ri Moab, i ri sheri vẹ e re kẹre.

²⁵ Ighoro ri Moab e bru ayen kufia, ugbobọ rọye vwirhiri, eriyin Ọrovwohwo na tare.

²⁶ Ruo re idi muo, fikiridie ọ kpare oma kpenu kpahe Ọrovwohwo, ọtiọye Moab cha vwẹ obo rọkpare vwo ghworo oma, ekpuyovwi rọye rhe ka cha vwọ jehwẹ.

²⁷ Izrẹl rha dia ehwẹjẹ kẹ wẹ jovwo? A mrẹrẹ vwẹ ohri rẹ iji dẹvure, vwẹ ọke kọke wọ da ta ota rọye wo mie kpogho uyovwi?

²⁸ Yan jẹn irere na vwo, ra dia evun rẹ oragha na, E ihwo rẹ dia Moab! Gba họhọ inekuku rọ bọn ẹho vwẹ akakọ rẹ unu rẹ iyara.

²⁹ Avwanre nyo umri rẹ eheri ri Moab– O heri gangan– Oma emuokpenu rọye, eheri rọye, vẹ osẹvwe rọye, vẹ ẹwan rẹ udu rọye.

³⁰ Me riẹn arueyivwo rọye, eriyin Ọrovwohwo tare; omeyan rọye efiefian, iruemu rọye efiefian

³¹ Ọtiọye na ke me viẹ kẹ Moab, Mi kperi phia ke Moab ejobi, ihwo rẹ Kiheres mi muoma phihọ kẹ.

³² Me viẹ kẹ Jaza nọ wẹ E vain ri Sibma! Eghọn wẹn shariẹ abadi vrẹn rhiri re te obi Jaza; vwẹ enu rẹ emamọ rẹ ọkeuvo wẹn kugbe vain. Oghwọrọ na de she teyọ.

³³ Omavwerhovwẹ vẹ aghọghọ a reyọ ayen yanran nẹ otọ oyoyovwi ri Moab; Mẹvwẹ re da iwani ji vwẹ asan re de mio, ohwo ọvuọvo rha vwẹ aghọghọ chiyi aye-en, edo na gbe dia edo rẹ aghọghọ-ọ.

³⁴ Hẹsbọn vẹ Elealeh kperi phia, rhiri re te obi Jaza yẹ ayen ji kperẹ urhuru rayen, nẹ Zoa re te Họrọnaim vẹ Eglatshelishiya. Kidie ame ri Nimrim je kpọ nure.

³⁵ Ki mi che fue vwi Moab, ohwo ro ze izobo vwẹ asan ro kpenu na rọ je torhẹ ugboduma kẹ edjọ rọye, eriyin Ọrovwohwo tare.

³⁶ Ọtiọye na udu mẹ ko vwerhoma oma kẹ Moab kerẹ owanre, udu me je vwerhoma kerẹ owanre kẹ ihwo ri Kaheres; vwẹ ọtiọye na efe rẹ ayen kọn koko da ghwọrọ.

³⁷ Kidie kuyovwi kuyovwi a wanherọ, kẹtuegba kẹtuegba e bruro kufia, enu rẹ abo na ejobi erera, vwẹ ehun ejobi kẹ isisọn.

³⁸ Vwẹ enu rẹ uwevwi ri Moab ejobi kugbe afe rẹ irhuvwu na emu ọfa rha hẹ aye-en jokpa rẹ oviẹ ọvo; kidie me guọghọ Moab kerẹ ochẹ ra vwẹ ero te-e, eriyin Ọrovwohwo tare.

³⁹ Mavọ ọ guọgherọ vwo! Mavọ ayen viẹ vwọ! Mavọ Moab vwẹ omaẹvuọ chuko ku! Eriyin na Moab vwo hirhe phihọ ehwẹjẹ vẹ emuọshọ kẹ otu re yarierẹ phihọ ejobi.

⁴⁰ Kidie enẹ Ọrovwohwo tare: Nighe, ọvo cha rhan pherephere kerẹ ugo, kọ bẹrẹ ibekpe rọye sa Moab,

⁴¹ a cha reyọ irere na ogba ọgangan na ke che gborho. Udu rẹ ihwo rẹ ofovwi rẹ Moab cha dia vwẹ ẹdẹ yena kerẹ udu rẹ aye rọ chuẹ uvwiẹ,

⁴² a cha ghwọrọ Moab o gbe dia ihwo ọfa-a, fikiridie o muoma kpenu kpahe Ọrovwohwo.

⁴³ Oshoẹdjẹ, ọgọdọ, kugbe ufi e he obaro wẹn re, E ihwo re dia Moab! eriyin Ọrovwohwo tare.

⁴⁴ Ọ rọ djẹ vabọ re oshoẹdjẹ na che she phihọ ọgọdọ na rhe, ọ ro ji wotọ nẹ ọgọdọ na rhe che mu ufi na. Kidie me cha ghwẹ emu nana ejobi na rhurhu Moab vwẹ ukpe rẹ ehwe rayen, eriyin Ọrovwohwo tare.

⁴⁵ Vwẹ evun rẹ uhoho ri Hẹshbọn isoghoro rẹ oma rhọre ki mudia, kidie erhanre la phia nẹ Hẹshbọn rhe; ekuerhanre nẹ uwevwi ri Sihọn rhe, Ọ ghwọrọ arhare ri Moab, erhu rẹ uvie rẹ emọ rẹ edo na.

⁴⁶ Ekan kẹ wẹ, E Moab! Ihwo rẹ Kemosh ghwru nure; kidie e mu emọ wẹn ighuvwu e mu emetẹ wẹn kpo ighuvwu.

⁴⁷ Dede na me cha reyọ erhuvwu ri Moab rhivwi rhe vwẹ ẹdẹ rẹ okuko na, eriyin Ọrovwohwo tare Ọna hẹ oba rẹ orhiebro rẹ Moab.