Jerimaya 46 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Aroẹmrẹ Kpahe Ijipt

¹ Ota rẹ Ọrovwohwo ro bru Jerimaya rẹ ọmraro na rhe kpahe ẹgborho na.

² Kpahe Ijipt. Ro she kpahe unuofovwi ri Fẹro Nẹko, ovie rẹ Ijipt, rọ kẹrẹ urhie ri Yufretis vwi Kakimish ri Nebukadreza ovie ri Babilọn phi kua vwẹ ukpe rẹnẹ ri Jihoiakim ọmọ ri Josaya, ovie ri Juda;

³ Rhuẹrẹ ogbẹn vẹ ekpọfia, wọ yanran kpo ofovwi!

⁴ Ghwẹ ifi phihọ iyesi na ruọ E eguiyesi. Mudia ẹdia wẹn vẹ erhu wẹn fa adjara wẹn, ku iwu rẹ itehru wẹn phihọ!

⁵ Die jabọ me vwọ mrẹ? ofu dje ayen ayen de rhivwi kpuko. E hwe egbofovwi rayen totọ, ayen da djẹ okpokpakpa, ayen gbi ni uko-o. Oshọ vwẹ asan ejobi: eriyin Ọrovwohwo na tare.

⁶ Ọdjonẹ sa rhan kpo-o ọgbofovwi sa vabọ-ọ; vwẹ obọrhe ọnre vwẹ oma rẹ urhie ri Yufretis ayen da kprowọ she.

⁷ Ọna ono, rọ kpara cha kerẹ Nile, kerẹ irhie rẹ ame rọyen vọn cha?

⁸ Ijipt kpare kerẹ Nile, kerẹ irhie rẹ ame rayen kpara cha. Ọ tare, me kpare, mi phoro otọ na, me guọghọ irere vẹ ihwo rayen.

⁹ Yan obaro E Iyesi mu ophu, E ekpẹrẹ! Jẹn egbofovwi na yan phia, ihwo rẹ Ẹtiopia vẹ Put re yọnrọn ekpọfia, ihwo ri Lud, re riẹn umurhabọ sa.

¹⁰ Ẹdẹ yena ẹdẹ rẹ Ọrovwohwo Ọghẹnẹ rẹ otuofovwi, ẹdẹ rẹ ihriẹriọ rọ vwọ reihri rẹ ivwighrẹ rọye. Ọlọkọ cha ghwọrọ rọ da bẹn tunu, rọ da da ọbara rayen vọn evun. Kidie Ọrovwohwo Ọghẹnẹ rẹ otuofovwi ze izobo vwẹ orere rẹ obọrhe ọnre rọ kẹrẹ urhie ri Yufretis.

¹¹ Yanran kpo obi Giliad, wọ reyọ adjija, E ọmọtobẹ rẹ Ijipt na! Wọ reyọ ihuvwu ibuebu wẹn na kufia; esivwo herọ kẹ wẹ-ẹ.

¹² Ẹgborho nyo umri rẹ omẹvuọ wẹn, oviẹ wẹn vọn akpọ na ejobi re; kidie ọgbofovwi yẹnghrẹ she teye ọgbofovwi; ayen ivẹ na de she ugbada.

¹³ Ota rẹ Ọrovwohwo ta kẹ Jerimaya rẹ omraro na kpahe echa ri Nebukadreza ovie ri Babilọn re ọ rhe kua otọ rẹ Ijipt na:

¹⁴ Ta phia vwẹ Ijipt, ji ghwoghwọ vwi Migdọl, ghwoghwo vwẹ Mẹmfis vẹ Tapanhes; Ta, Mudia muegbe wọ chọma, kidie ọlọkọ cha ghwọrọ yariẹ owẹ phihọ.

¹⁵ Die Apis rha vwọ djẹ? Die sorọ irhuẹn wẹn rhe mudia-a? Fikiridie Ọrovwohwo geire ghwiotọ.

¹⁶ Urogho wẹn yẹnghrẹn she, ayen da ta kẹ ohwohwo, E vrẹn, e je rhivwi bru ihwo rẹ avwanre kpo otọ re de vwiẹ avwanre, fiki rẹ ọlọkọ rẹ oshenyẹ na.

¹⁷ Se odẹ ri Fẹro, ovie rẹ Ijipt na, Odedo rọ nẹrhẹ ọke wan na.

¹⁸ Kirobo me herọ na, eriyin Ovie na tare, Ọ rẹ ọde rọye hẹ Ọrovwohwo rẹ otuofovwi na, kerẹ Tabọ vwẹ ohri rẹ igbenu na, je kerẹ Kamẹl vwẹ oma rẹ abadi na, ọvo cha rhe.

¹⁹ Rhuẹrẹ ekuakua kẹ oma rẹ ovwan ru we kpo imu, E ihwo rẹ Ijipt! Kidie Mẹmfis cha dia ofefe, erhurhu, o rhe vwo ohwo-o.

²⁰ Ijipt umuomuo rẹ erhuẹn ro yovwiri, ẹkẹvuọvo egbaregba che nẹ obọrhe ọnre bro cha.

²¹ Ihwo rẹ ofovwi rọye re durhieri vwẹ uherevie rọye re họhọ emọ rẹ erhuẹn sọkọ sọkọ, uyota, ayen kuoma rhẹriẹ ayen de koko djẹ, ayen se mudia-a, kidie ẹdẹ rẹ okpetu rayen gbare, ọke re ehwe rayen tere.

²² O kperi kerẹ ọrọdekọ ro kpanọ yanran, kidie ivwighrẹ rọye chihẹ nene gangan, a vwẹ ishurhe yan kpahọ, kerẹ ihwo ri she irhe.

²³ Ayen cha guọghọ egbo rọye te otọ, eriyin Ọrovwohwo tare, owenẹ e se dje uyovwi phihọ dede-e, fikiridie ayen bu nọ ebaka, e se kere aye-en.

²⁴ A cha vwẹ ọmọte rẹ Ijipt jehwẹ, e che phiọ phihọ obọ rẹ ihwo ri nẹ obọrhe ọnre cha.

²⁵ Ọrovwohwo rẹ otuofovwi Ọghẹnẹ rẹ Izrẹl, tare nẹ: Nighe, mi che hwe Amọn ri Tibis, vi Fẹro, te Ijipt vẹ edjọ rọye kugbe ivie rọye, vwẹ enu ri Fẹro vẹ ihwo re vwẹ ẹro suọ.

²⁶ Mi che phi ayen phihọ obọ rẹ otu re guọnọ ayen hwe, phihọ obọ ri Nebukadreza ovie ri Babilọn vẹ inotu rọye. Ukuko rọye ka cha dia Ijipt kerẹ ọke rẹ awanre ye, eriyin Ọrovwohwo tare.

²⁷ Ẹkẹvuọvo wọ djẹ oshọ-ọ, E Jekọp odibo mẹ, wo ji brudu-u, E Izrẹl; kidie gbe nighe, me cha dia ogboko de sivwi uwe, ivwrọmọ wẹn nẹ otọ rẹ ighuvwu rayen rhe. Jekọp che rhivwi rhe dẹndẹn vẹ omaefuo, ohwo rha nẹrhẹ phihọ oshọ-ọ.

²⁸ Wọ djẹ oshọ-ọ, E Jekọp odibo mẹ, eriyin Ọrovwohwo tare, kidie me vẹ owẹ herọ. Mi che furhie ẹgborho na ejobi re me cha djẹ ovwan ra na, ẹkẹvuọvo mi che furhie ovwa-an, ẹfa me cha fa wẹ mi che je ovwan vwo riẹrieriẹ-ẹ.