Jerimaya 43 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ayen Ghwiẹ Kpo Ijipt

¹ Ọke ri Jerimaya vwọ ta eta nana ejobi rẹ Ọrovwohwo rẹ Ọghẹnẹ rayen jiro bru ayen ra na nu,

² Azaraya ọmọ ri Hoshaya kugbe Johanan ọmọ ri Karia kugbe iduota na ejobi da ta kẹ Jerimaya nẹ, Wọ vwọrefian. Ọrovwohwo Ọghẹnẹ rẹ avwanre ji we ra vuẹ avwanre-e nẹ, Wa yanran kpo Ijipt re wa ra dia oboyi-i;

³ ẹkẹvuọvo Barọk ọmọ ri Neraya ru we vwo mu kpahe avwanre rere wo vwo phi avwanre phihọ obọ rẹ ihwo ri Kaldia, re ayen mrasan hwe avwanre eyẹ vwo mu avwanre ighuvwu kpo Babilọn.

⁴ Eriyin na Johanan ọmọ ri Karia vẹ isun rẹ ofovwi na ejobi kugbe ihwo na ejobi rhe nyo urhuru rẹ Ọrovwohwo-o, vwọ dia otọ ri Juda na-a.

⁵ Ẹkẹvuọvo Johanan ọmọ ri Karia vẹ isun rẹ ofovwi na ejobi da reyọ umuku rẹ ihwo ri chekọ vwi Juda na ejobi i ri rhivwi rhe nẹ uvwiẹ kuvwiẹ ra djẹ ayen ra jovwo rhe vwọ dia otọ ri Juda na–

⁶ eshare na, eya na, emetẹ rẹ ivie na, kugbe ohwo kohwo ri Nebuzaradan onotu rẹ ohẹrhẹ na jovwo kugbe Gẹdalaya ọmọ ri Ahikam, ọmọ rẹ Shafan; eriyin ji te Jerimaya rẹ ọmraro na vẹ Baruk ọmọ rẹ Neraya.

⁷ Ayen da rhe otọ rẹ Ijipt, kidie ayen nyo urhuru rẹ Ọrovwohwo-o. Ayen de rhi te Tapanhes.

⁸ Etiyin ota rẹ Ọrovwohwo ki bru Jerimaya vwi Tapanhes;

⁹ Vwẹ abọ wẹn reyọ elalọ ride, wo si ayen nu vwẹ evun rẹ urho vwẹ evun rẹ asan ra mare na rọ hẹ anurhoro rẹ ighẹn ri Fero vwi Tapanhes, vwẹ aro rẹ ihwo ri Juda na,

¹⁰ ọ da ta kẹ ayen nẹ, Enẹ Ọrovwohwo rẹ otuofovwi, Ọghẹnẹ rẹ Izrẹl tare, Nighe, mi che ji ikọn ra reyọ Nebukadreza ovie ri Babilọn, odibo mẹ, rhe, o che phi ekete rẹ uvie rọye phihọ enu rẹ elalọ nana ri mi sinu na, kọ bẹrẹ eharha rẹ uvie rọye sa enu rọye.

¹¹ Kọ cha rhe rhe teyọ otọ rẹ Ijipt, i re vwo ze kẹ ọtiekọ vwọ kẹ ọtiekọ, i re vwo ze kẹ imu ọ me vwe ayen kẹ imu, i re vwo ze kẹ ọlọkọ ọ me vwẹ ayen kẹ ọlọkọ.

¹² Ko che koko erhanre phihọ uwevwi rẹ edjọ rẹ Ijipt, kọ torhẹ ayen o mi mu ayen ighuvwu yanran, ọ cha hworhe otọ rẹ Ijipt, kirobo rẹ osuigegede hworhẹ ewun rọye ro vwo ishu; ufuoma kọye o vwo nẹ etiyin kpo.

¹³ O cha guọghọ orisẹ ri Heliopolis rọ evun rẹ otọ rẹ Ijipt, uwevwi rẹ edjọ rẹ Ijipt erhanre kọye ọ vwọ torhẹ ayen.