Jerimaya 40 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Jerimaya kugbe Umuku ri Chekọ vẹ Gedalaya

¹ Ota rẹ Ọrovwohwo ro bru Jerimaya rhe rẹ Nebuzaradan onotu rẹ ohẹrhẹ na vwo siobọ no nọ yanran nẹ Rama nu, rọ vwọ vwẹ ejọnrọn gba, vwọ yan nene ighuvwu ri Jerusalẹm vi Juda re mu kpo Babilọn

² Onotu rẹ ohẹrhẹ na da reyọ Jerimaya ọ da ta kẹ nẹ, Ọrovwohwo rẹ Ọghẹnẹ wẹn na ghwoghwo umiovwo nana kpahe etinẹ,

³ Ọrovwohwo ruro, o ru obo rọ tare. Fikiridie we ru umwemwu kpahe Ọrovwohwo, we mu ọghọ kẹ urhuru rọye-e, kọye nẹrhẹ emu nana bru ovwan rhire na.

⁴ Asakiephana gbe nighe, nonẹ na me rhan ejọnrọn nẹ abọ wẹn. Ọ da dianẹ oyovwi kẹ wẹ rere wo nene uvwe kpo Babilọn, gba yanrhe, ke me vwẹ ẹro te we yoyovwi; ẹkẹvuọvo o gbi fo kẹ wẹ rere wo nene uvwe kpo Babilọn na-a, wo jovwo. Gbe ni otọ na soso ọ hẹ obaro wẹ, gba yan kpo asan kasan wo rori no yovwiri ro ji shehọ ru wọ ra.

⁵ Ọ da dianẹ wọ domaji, gbe rhivwi bru Gẹdalaya ọmọ re Alukam, ọmọ ri Shafan, ohwo rẹ ovie ri Babilọn vwo mu osun rẹ irere ri Juda na, re wọ dia uherevie rẹ ihwo na; eyẹrẹ gbe kpo asan kasan wo rori no shehọ nu wọ ra. Kọye onotu rẹ ohẹrhe na da kẹ okẹ rẹ emuọre ọ de ji ru ẹse kẹ, o de siobọ nọ yanran.

⁶ Etiyin Jermiaya da yan bru Gedalaya ọmọ rẹ Ahikam, vwẹ Mizpa, o de nene dia vwẹ uherevie rẹ ihwo ri cheko vwẹ otọ na.

⁷ Oke rẹ onotu rẹ ofovwi vẹ ihwo rayen re herọ vwẹ obọ uphephẹ vwo nyo nẹ a vwẹ Gedalaya ọmọ rẹ Ahikam ma osun rẹ otọ na, nẹ a vwẹ eshare vẹ eya gbe emọ na phihọ obọ nure, nẹ e mu otu re ma dia igbere vwẹ otọ na ighuvwu kpo Babilọni-i,

⁸ ayen da yan kpo Mizpah bru Jerimaya ra–-Ishmaẹl ọmọ ri Netanaya, Jahanan ọmọ ri Karia, Siraya ọmọ ri Tanhumẹt, emọ rẹ Efai ohwo ri Makat, ayen vẹ ihwo rayen.

⁹ Gedalaya ọmọ rẹ Ahikam, ọmọ ri Shafan, de ve kẹ ayen vẹ ihwo rayen, tanẹ, Wa djẹ oshọ rẹ ovwan vwọ ga ihwo ri Kaldia na-a. Wa dia otọ na, re wa ga ovie ri Babilọn, kọ che yovwẹ kẹ ovwan.

¹⁰ Vwọ kẹ vwẹ, Mizpa me cha dia, re mi mudia kẹ ovwan vwẹ obaro rẹ ihwo ri Kaldia na ri che bru avwanre rhe; ẹkẹvuọvo vwọ kẹ ovwan, we koko wain vẹ emamọ rẹ ọkeuvo kugbe evwri, wa sẹro rayen vwẹ evun rẹ ekuakua rẹ ovwan, re wa dia irere rẹ ovwan re wa reyọre nure na.

¹¹ Eriyin rhe, ọke rẹ ihwo ri Ju re hẹ obi Moab, vẹ uherevie rẹ ihwo rẹ Amọn vẹ e re hẹ obi Idọm kugbe e re hẹ obo etọ efa vwo nyo nẹ ovie ri Babilọn yan jẹ ihwo evo vwo vwẹ evun ri Juda nẹ ọ vwẹ Gedalaya ọmọ rẹ Ahikam rẹ ọmọ in Shafan mu osun vwẹ enu rayen,

¹² etiyin ihwo ri Ju na ejobi de rhivwi nẹ asan ra djẹ ayen ra rhe otọ ri Juda, bru Gẹdalaya rhe vwẹ obi Mizpa; ayen de koko wain vẹ emamọ rẹ ọkeuvo buebu.

Ishmaẹl Ro Ero Kpahe Gedalaya

¹³ Ọke nana Johanan ọmọ ri Karia vẹ isun rẹ ofovwi rẹ orere rọ hẹ obo uphephẹ na ejobi de bru Gedalaya rhe obi Mizpa,

¹⁴ ayen da ta kẹ nẹ, Wọ riẹre nẹ Baalis ovie rẹ ihwo rẹ Amọn ji Ishmaẹl ọmọ ri Netanaya rhi hwe we? Ẹkẹvuọvo Gedalaya ọmọ rẹ Ahikam se ayen gbuyota-a.

¹⁵ Etiyin Johanan ọmọ ri Karia ke bẹbẹ ta kẹ Gẹdalaya vwẹ Mizpa, Ju vwe yanran re mi hwe Ishmaẹl ọmọ ri Netanaya ghwu, ohwo ọvuọvo sa riẹ-ẹn. Die sorọ o vwo hwe we, rẹ ihwo ri Ju na ejobi re yariẹ owẹ phihọ na vwọ hra, rẹ ihwo ri chekọ kẹ Juda na vwọ ghwọrọ?

¹⁶ Ẹkẹvuọvo Gedalaya ọmọ rẹ Ahikam ke ta kẹ Johanan ọmọ ri Karia nẹ, Wo che ru emu nana-a, kidie wọ mu efia barẹ Ishmẹl.