Jerimaya 38 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

E si Jerimaya nẹ Orhare Okokodo Rhe

¹ Rẹ Shefataya ọmọ ri Matan, Gidalaya ọmọ ri Pasho, Jukal ọmọ ri Shelemaya kugbe Pashọ ọmo ri Malkaya vwo nyo eta ri Jẹrimaya ta kẹ ihwo na ejobi,

² nẹ, Enẹ Orovwonwo tare, Ohwo ro chekọ ọrho nana ọlọkọ vẹ owẹvwe kugbe emiavwe che hwe; ẹkẹvuọvo ohwo rọ yan bru ihwo ri Kaldia cha rhọ, arhọ rọye cha dia kerẹ osa rẹ ofovwi, ọ me rhọ.

³ Enẹ Ọrovwuhwo tare, e che phi orere nana phihọ obọ rẹ unuofovwi rẹ ovie ri Babilọn rọ da reyọ.

⁴ Ọye isun na da ta kẹ ovie na, je hwe ohwo nana, kidie o re ruẹ abọ rẹ isodje ri chekọ vwẹ orere na lọhọ, vẹ abọ rẹ ihwo na ejobi, rọ vwọ ta eta nana kẹ ayen na. Kidie ohwo nana guọnọ ufuoma rẹ ihwo na-a, ẹkẹvuọvo umiovwo rayen.

⁵ Ovie Zedekaya da ta, Nighe, ọ hẹ abọ rẹ ovwan; kidie ovie na se ru emuọvo kpahe ovwa-an.

⁶ Eriyin ayen de mu Jerimaya phihọ orhare ri Malkaya, ọmọ rẹ ovie, ro hẹ evun rẹ ọguan rẹ ohẹrhe na, a da vwẹ ifi lọrọ Jerimaya kpo obotọ. Ame herọ-ọ, ẹkẹvuọvo ibrehre ọvo, Jerimaya de sheruẹ ibrehre na.

⁷ Ọke re Ebẹdmẹlẹk ohwo rẹ Ẹtiopia, oghwanran na, ohwo rọ herọ vwẹ evun rẹ uwevwi rẹ ovie na, vwo nyo nẹ ayen mu Jerimaya phihọ evun rẹ orhare na. Yẹn ovie na tidia vwẹ Anurhoro ri Benjamin–

⁸ Ebẹdmẹlẹk da yan nẹ uwevwi rẹ ovie na rhe, ra ta kẹ ovie,

⁹ Ọrovwovwe ovie mẹ, ihwo nana ru bra rẹ ayen vwo mu Jerimaya rẹ ọmraro na phihọ evun rẹ orhare, owẹvwe che hwe ghwẹ, kidie ikara gbi chekọ vwẹ orere na-a.

¹⁰ Ọye ovie na da vuẹ Ebẹdmẹlẹk, ohwo rẹ Ẹtiopia na, nẹ, Reyọ eshare erha nẹ etinẹ vwọ ba oma, ru wọ kpare Jerimaya re ọmraro na nẹ evun rẹ orhare na rhe re o ki ghwu.

¹¹ Eriyin na Ebẹdmẹlẹk da reyọ eshare na kugbe oma, ayen da yan kpo uwevwi rẹ ovie na, te uvun ra vwẹ emwa ya, ayen da dia etiyin reyọ ebẹre emwa re ghwore, e de phi ifi phihọ ayen kpo obotọ rhe Jerimaya vwẹ evun rẹ orhare na.

¹² Etiyin Ebẹdmẹlẹk ohwo rẹ Ẹtiopia na, da ta kẹ Jerimaya, phi ebẹre emwa na kugbe ifi na phihọ aviavwe wẹn Jerimaya de ru ọtiọye.

¹³ Ayen da vwẹ ifi na si Jerimaya kpo enu nẹ orhare na rhe. Jerimaya da dia ọguan rẹ ohẹrhẹ na.

Zedikaya Guọnọre nẹ Jerimaya nẹ Ọye Iroro

¹⁴ Ovie Zedikaya de ji ikọn re se Jerimaya rẹ ọmmro na a da reyọ vwọ wan unu rẹ erha rẹ uwevwi rẹ Ọrovwohwo na. Ovie da ta kẹ Jerimaya, Me nọ wẹ ono, wọ djahẹ emuọvo kẹ vwẹ-ẹ.

¹⁵ Jerimaya da ta kẹ Zedikaya nẹ, Me da vuẹ wẹ, wo rhe hwe vwe? Me da vwẹ iroro nẹ wẹ, wọ cha kerhọn mẹ-ẹ.

¹⁶ Ọye Ovie Zedikaya da bẹbẹ ve kẹ Jerimaya, kirobo rẹ Ọrovwohwo herọ na, rọ ma ẹnwẹn ejobi, mi che hwe we-e, me je reyọ o wẹn kẹ ihwo nana re guọnọ arhọ wẹn na-a.

¹⁷ Etiyin ọ da ta kẹ Zedikaya, Enẹ Ọrovwọhwo Ọghẹnẹ rẹ otuofovwi, Ọghẹnẹ rẹ Izrẹl tare, Wọ da vwẹ oma wẹn kẹ isun rẹ ovie ri Babilọn, ke sivwi arhọ wẹn, a rha vwẹ erhanre torhẹ orere na-a, wọ vẹ uwevwi wẹn ke rhọ.

¹⁸ Ẹkẹvuọvo wọ rha vwẹ oma wẹn kẹ isun rẹ ovie ri Babilọn na-a, ke che phi orere nana phihọ obọ rẹ ihwo ri Kaldia, ka cha vwẹ erhanre torhẹ, wọ gbe sa djẹ nẹ obọ raye-en.

¹⁹ Ovie Zedikaya da vuẹ Jerimaya, Oshọ ri Ju re djẹ bru ihwo ri Kaldia na ra mu vwe, ayen da rha reyọ ovwẹ kẹ ayen vwọ jehwẹ.

²⁰ Jerimaya da ta, A cha reyọ owẹ vwọ kẹ aye-en. Mu ọghọ kẹ urhuru rẹ Ọrovwohwo vwẹ obo re me vuẹ wẹ na, kọ yovwi kẹ wẹ, ke ji sivwi urhuarho wẹn.

²¹ Ẹkẹvuọvo wọ rha vwẹ oma wẹn kẹ aye-en, ọnana hẹ aroẹmrẹ rẹ Ọrovwohwo vwọ kẹ vwẹ:

²² Nighe, eya na ejobi ri chekọ vwẹ uwevwi rẹ ovie ri Juda re sun yanra bru isun rẹ ovie ri Babilọn herọ tanẹ, Igbeyan wẹn ru wọ vwẹ ẹro so phiẹn wẹ ayen phi we kparobọ; asakiephana rẹ awọ wẹn vwo she ro ibrehre na, ayen de chuko ku we.

²³ Eya wẹn kugbe emọ wẹn ejobi ke sun ayen rhe ihwo ri Kaldia, wẹ vẹ ekpuyovwi wẹn cha sa djẹ va ayen abọ-ọ, ẹkẹvuọvo ovie ri Babilọn che mu we; ra da vwẹ erhanre torhẹ orere na totọ.

²⁴ Etiyin Zẹdikaya da ta kẹ Jerimaya, Wo jẹ ohwo ovuọvọ riẹn eta nana-a yu wo rhe ghwu-u.

²⁵ Ọ da dianẹ isun na nyori nẹ mi nene uwe ta ota re ayen de bru we rhe ta ke we nẹ, Vuẹ avwanre emu ru wọ ta kẹ ovie vẹ obo rẹ ovie vuẹ wẹ, Wọ djahe emuọvo kẹ avwanre-e avwanre che hwe we-e,

²⁶ etiyin ko wọ vuẹ ayen, Me vwẹ oma kpotọ rẹ ovie nẹ ọ vwẹ ovwẹ rhivwi kpo uwevwi ri Jonatan re ghwu vwẹ etiyi-in.

²⁷ Etiyin Isun na ejobi de bru Jerimaya rhe rhe nọ, ọ da kpahe kẹ ayen kirobo rẹ ovie na vuẹrẹ jovwo. Ayen de je ota rẹ ayen vẹ ọye gba ta na vwọ, kidie enyo ikuegbe na-a.

²⁸ Jerimaya da dia ọguan rẹ ohẹrhe na bẹsiẹ ra rhe vwọ reyọ Jerusalẹm.