Jerimaya 34 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Jerimaya Kpogho Obo Phihọ Zẹdikaya Ẹro

¹ Ota rọ nẹ obọ rẹ Ọrovwohwo bru Jẹrimaya rhe, vwẹ ọke ri Nebukadreza ovie ri Babilọn vẹ otuofovwi rọye ejobi kugbe uvie rẹ akpọ na ejobi re hẹ otọ rẹ isuesun rọye vẹ ihwo na ejobi vwọ họnre Jerusalẹm vẹ irere rọye ejobi.

² Enẹ Ọrovwohwo Ọghẹnẹ rẹ Izrẹl, tare: Yanra wọ ra ta kẹ Zẹdikaya ovie ri Juda re wọ vuẹ nẹ, Enẹ Ọrovwọhwo tare: Nighe, mi che phi orere nana phihọ obọ rẹ ovie ri Babilọn, kọ vwẹ erhanre torhe.

³ Wọ sa djẹ nẹ obọ rọye-e, ẹkẹvuọvo vwẹ ọruyota e che mu we re de phi we phihọ obọ rọye; ku wọ vẹ ovie ri Babilọn cha vwẹ ẹro mrẹ ohwohwo ji hirhe aro ku ohwohwo ta ota, ku wo kpo Babilọn.

⁴ Dede na gbe nyo ota rẹ Ọrovwohwo na, E Zẹdikaya ovie ri Juda! Enẹ Ọrovwohwo ta kpahe owẹ: A cha vwẹ ọlọkọ hwe we-e.

⁵ Wo che ghwu vwẹ ufuoma. Kirobo ra torhẹ adjija kẹ esẹ wẹn ye, eriyin ihwo je cha torhẹ adjija kẹ wẹ ra da je viẹ kẹ wẹ, ta nẹ, Eghwo, orovwori! Kidie me ta ota na nure, eriyin Ọrovwohwo tare.

⁶ Jerimaya rẹ ọmraro na da ta eta nana kẹ Zẹdikaya ovie ri Juda, vwi Jerusalẹm,

⁷ ọke rẹ otu rẹ ofovwi rẹ ovie ri Babilọn vwọ họnra Jerusalẹm kugbe irere ri Juda ejobi ri chekọ Lakish vẹ Azeka; kidie enana evo vwẹ irere ri Juda ra gba ogba yariẹ ri cheko.

A Cho Urhi rẹ Ọphọ Vwẹ Oma rẹ Eviẹn rẹ Ihwo ri Hibru

⁸ Ota ro nẹ obọ rẹ Ọrovwohwo bru Jẹrimaya rhe, vwẹ ọke rẹ ovie Zẹdikaya vwo nene ihwo ri Jerusalẹm ejobi re ọphọ nu vwo ghwoghwo ufuoma kẹ ayen nu,

⁹ nẹ ohwo kohwo siobọ nẹ ọviẹn rọye re ohwo ri Hibru kpo ọphẹ te ọ rẹ ọshare vẹ ọ rẹ aye, rere ohwo vwo jẹ ohwo ri Ju rẹ oniọvo rọye evwo ru ọviẹn.

¹⁰ Ayen da rhọvwe ota na, isun ejobi vẹ ihwo na ejobi re re ọphọ na nẹ ohwo kohwo siobọ nẹ oviẹn rọye ọ rẹ ọshare eyẹ ọ rẹ aye, rere e je ayen evwo ru eviẹn ofa, ayen rhọvwere e de siobọ nẹ ayen kpo ọphẹ.

¹¹ Ẹkẹvuọvo ukuko rọye ayen de kurhẹriẹ rhivwi ra reyọ eshare vẹ eya rẹ ayen siobọ nu na, ayen da rhoma vwẹ ayen ru eviẹn.

¹² Ota rẹ Ọrovwohwo de nẹ obọ rẹ Ọrovwohwo bru Jerimaya rhe.

¹³ Enẹ Ọrovwohwo, Ọghẹnẹ rẹ Izrẹl tare: Mi nene esẹ rẹ ovwan re ọphọ re me vwọ reyọ ayen nẹ otọ rẹ Ijipt cha nẹ uwevwi rẹ ọviẹn, tanẹ:

¹⁴ Oba rẹ ikpe esan ohwo kohwo mi siobọ nẹ ohwo ri Hibru rọ dẹre rọ garọ ikpe esan nure; sio nẹ iruo wẹn ro ruẹ kẹ wẹ Ẹkẹvuọvo esẹ rẹ ovwan kerhọ-ọn e je davwerhọn mẹ-ẹ.

¹⁵ Ovwan de kurhẹriẹ ọmọke rọ wanre na vwo ru obo ri she phihọ vwẹ obaro mẹ re ovwan de ghwoghwo ofuvwegbe obesiono, ovwan da re ọphọ vwẹ obaro mẹ vwẹ evun rẹ uwevwi ra vwẹ odẹ mẹ se na.

¹⁶ Ẹkẹvuọvo wa da rha rhẹrioma kpo uko vwo miovwi ode mẹ wa rhoma reyọ dohwo dọviẹn rẹ ọshare vẹ ọ rẹ aye rọye, e re wo siobọ nu kerẹ obo rẹ ayen guọnọre, wa da nyẹ ayen phihọ otọ vwọ ru eviẹn rẹ ovwan.

¹⁷ Ọtioye na, enẹ Ọrovwohwo tare ovwan mu ọghọ kẹ vwẹ vwẹ ofuvwegbe ri mi ghwoghwori kẹ dohwo doniọvo rọye kugbe dohwo dọrivẹ rọye-en, nighe, mi ghwoghwo kẹ ovwan ofuvwogbe rẹ ọlọkọ vẹ otiekọ kugbe owẹvwe, eriyin Ọrovwohwo tare. Mi che ru ovwan vwo dia imuoshọ kẹ ivie rẹ akpọ na ejobi.

¹⁸ Ihwo re chọ urhi rẹ ọphọ mẹ na re gbe yọnrọn obo re si phihọ ọphọ rẹ ayen rere vwẹ obaro mẹ na-a, ki mi che ruo kerẹ ọmọ rẹ erhuẹn ra vare ẹbẹre ivẹ ra da wan uherevie rọye vrẹ.

¹⁹ Isun ri Juda, isun ri Jerusalẹm, eghwanra na, irherẹn na, vẹ ihwo rẹ otọ na ejobi re wan uherevie rẹ ọmọ rẹ erhuẹn ra vare na vrẹn,

²⁰ ki mi che phi ayen phihọ obọ rẹ ivwighrẹ rayen kugbe obọ rẹ otu re guọnọ urhuarhọ rayen. Irivwi rayen ke cha dia emuọre kẹ emephran rẹ obenu vẹ eranvwe rẹ akpọ na.

²¹ Zẹdikaya ovie ri Juda vẹ isun rọye mi che phi ayen phihọ obọ rẹ ivwighrẹ rayen ji te obọ rẹ otu re guọnọ urhuarhọ rayen, phihọ obọ rẹ otuofovwi rẹ ovie ri Babilọn rọ yan jẹn ovwan vwo jovwo nu na.

²² Nighe, mi che ji urhi, eriyin Ọrovwohwo tare, me cha rhoma reyọ ayen rhe orere nana; ayen cha họnrọ rẹ ayen da reyọ, ra da vwẹ erhanre torhẹ. Mi che ru irere ri Juda ifefe rẹ ihwo de jẹn ayen ẹdia.