Jerimaya 30 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

E ve kẹ Ayen nẹ Ayen Che Rhivwi nẹ Ighuvwu Kpo

¹ Ota ro nẹ obọ rẹ Ọrovwohwo bru Jerimaya rhe.

² Enẹ Ọrovwohwo, Ọghẹnẹ rẹ Izrẹl tare. Si eta me ta kẹ owẹ na ejobi phihọ ọbe

³ Kidie nighe, ẹdẹ cha, eriyin Ọrovwohwo tare, re me cha vwọ reyọ ughwẹ rẹ ihwo mẹ rhivwi rhe, Izrẹl vi Juda, eriyin Ọrovwohwo tare, ke me vwẹ ayen rhe otọ re me vwọ kẹ esẹ rayen, ayen ke reyọ.

⁴ Ena eta rẹ Ọrovwohwo ta kpahe Izrẹl vi Juda:

⁵ Enẹ Ọrovwohwo tare: Avwanre nyo edo rẹ ogidi rode na, rẹ imuoshọ, ufuoma herọ-ọ.

⁶ Gba nọ asakiephana, re wọ mrẹ, Die sorọ me vwọ mrẹ ọshare kọshare rọ vwẹ abọ rọye cha ehun rọye kere aye rọ chuẹ uvwiẹ die sorọ rẹ opharo kopharo vwo wene?

⁷ Eghwo! ẹdẹ yena rhoro gangan. A mrẹ ẹdẹ re vwo dje-e; ọke rẹ okpetu kẹ Jekọp, dede na e che sivwo no.

⁸ O de rhi te vwẹ ẹdẹ yena vwo obọ, eriyin Ọrovwohwo rẹ otuofovwi na tare, ke me cha ghwọrọ ọghwa na nẹ ayen ohọre, ke me savwe igoni rayen kufia, erhọrha gbe vwẹ ayen ru idibo ọfa-a.

⁹ Ẹkẹvuọvo ayen ke ga Ọrovwohwo Ọghẹnẹ rayen vẹ Devid ovie rayen, ohwo re me cha kpare ke ayen.

¹⁰ Wọ gbe djẹ oshọ-ọ, E Jekọp odibo mẹ, eriyin Ọrovwohwo tare, wo bru udu-u, E Izrẹl, kidie gbe no, mi che sivwi we nẹ ogboko rhe, emọ wẹn nẹ otọ rẹ ighuvwu rhe. Jekọp che rhivwi rhe o mi vwo ofuvwegbe, ohwo ro djẹ osho muo gbe dia-a.

¹¹ Kidie mi nene uwe dia vwo sivwi uwe, eriyin Ọrovwohwo tare, mi che guẹ irere na ejobi ẹdjọ ohri rẹ ihwo re me hra ovwan ra na, ẹkẹvuọvo mi che ghwọrọ ovwa-an re-e. Me cha ghwọ umuchẹghwọ ku ovwan O vwo obo re sorọ ri mi vwo je ovwan ehwe-e.

¹² Kidie enẹ Ọrovwohwo tare. Omaẹwan rẹ ovwan dia ọ re se sivwi-i, ora rẹ ovwan ọrhuarho.

¹³ Ohwo ro kerhọn rẹ ovwan herọ-ọ, uhuvwu herọ kẹ ora rẹ ovwa-an; esivwo herọ kẹ ovwa-an.

¹⁴ Ovwan chọrọ ese rẹ ovwan ẹro; ayen gbe kerhọn rẹ ovwa-an; kidie me vwe ẹghwiẹ rẹ ọvweghrẹ ghwiẹ ovwan, ehwe rẹ ọvweghrẹ ro vwo aruẹdọ-ọ, fikiridie abe rẹ ovwan ọrhuarho, fikiridie imwemwu rẹ ovwan gbori gangan.

¹⁵ Die nẹrhẹ omaewan rẹ ovwan da ovwan? ọ davwẹ rẹ ovwan vwo ehworokpo-o. Fikiridie abe rẹ ovwan rhoro, fikiridie umwemwu rẹ ovwan gbori gangan, mẹvwẹ ri ru ovwan imu nana.

¹⁶ Ọtiọye na ihwo ri mu ovwan rọ ejobi ke ji mu ayen rọ ivwighrẹ rẹ ovwan ejobi, ọvuọvo rayen, ki kpo imu, otu re ghwa ovwan reyọ ejobi ka je ghwa ayen reyọ, iri shenyẹ ovwan ejobi ke ji shenyẹ ayen rhe.

¹⁷ Kidie me cha vwẹ omakpokpọ rhivwi rhe ovwan, mi ji sivwi era rẹ ovwan, eriyin Ọrovwohwo tare, fikiridie ayen se ovwan erasere, ọye Zayọn rẹ ohwo ọvuọvo vwẹ ẹro te-e!

¹⁸ Enẹ Ọrovwohwo tare: Nighe, me vwẹ erhieyovwo rhivwi rhe itughẹ ri Jekọp, Ke me re ehrọre kẹ ẹdia rọye; a cha rhoma bọn orere na phihọ ugbenu rọye, ighẹn ke dia asan rọ dia jovwo.

¹⁹ Evun rayen ine rẹ ẹkpẹvwẹ nurhe, vẹ urhuru rẹ otu re ghọghọ. Mi che ru ayen buẹ phihọ, ayen gbe cha havwe-e, ki mi ru ayen vwo ọghọ, ayen cha dia ihwo itete-e.

²⁰ Emọ rayen na ke cha dia obo re ayen epha vwẹ awanre, ukoko rayen ko mudia vwẹ obaro mẹ, otu re nyẹ ayen muotọ ejobi mi che ru ayen ghwaghwa.

²¹ Ovie rayen kọ dia ohwo ro nẹ ohri rayen rhe, uherevie rayen osun rayen nurhe. Mi sio kẹro oma, ko si kẹrẹ ovwẹ, kidie ono sa vwẹ ọhọrobọ rọye si kẹrẹ ovwẹ? eriyin Ọrovwohwo tare.

²² Ku wa dia ihwo mẹ, ke me dia Ọghẹnẹ rẹ ovwan.

²³ Gbe ni ogiribo rẹ Ọrovwohwo! Ophu rọye duvwu phia re, odju rode na; O cha bẹrẹ ku uyovwi rẹ oruimwemwu.

²⁴ Ophu ọgangan rẹ Ọrovwohwo na se rhivwi-i bẹsiẹ ro vwo ru iroro rọ jẹre vwẹ udu rọye na gba. Wa cha riẹn ọnana vwẹ ẹdẹ rẹ ukuko na.