Jerimaya 3 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Ọ da dianẹ ohwo siẹn aye rọye ro de no obọ rọ da rọvwọ ohwo ọfa, kẹ ọshare na se rhivwi bro ra? Kẹ otọ yena gbi miovwi gangan? we nene esen buebu gbe igberadja, ovwan gbi rhivwi bru vwe rhe? Eriyin Ọrovwohwo na tare.

² Kpare opharo wẹn kpenu rẹ ugbenu phrephre na, ru wọ mrẹ Tivọ a vo wẹ de je oma ẹmrẹ vwo. Vwẹ orhoma rẹ idjerhe etiyin wo tidia da hẹrhẹ esen wẹn, kerẹ ohwo rẹ Arebia vwẹ evun rẹ aghwa Ovwan vẹ igberadja rẹ ovwan vwo miovwi otọ na.

³ Ọtiọye na a vwo da eghwẹghwẹ rẹ osio na ji yẹ osio rẹ owanre je rhọ-ọ, yu wo vwo oka rẹ ọfarhiẹ vwẹ arhare oma sa vo ovwa-an.

⁴ Ọ dia ovwan ri se vwe nanana, Ọsẹ mẹ, wọwẹ ugbeya rẹ ọke emọ mẹ–

⁵ Ku wo mu ophu bẹdẹ, ivun ki miovwo uwe re te oba? Nighe, wọ ta nure, ẹkẹvuọvo umwemwu ru wo se ru wo ruro nure.

A rẹ Izrẹl Kugbe Juda nẹ Ikurhẹriẹ

⁶ Ọrovwohwo da ta kẹ vwẹ vwẹ ọke rẹ Ovie Josaya: Wọ mrẹ obo rẹ Izrẹl ruru, ohwo ọfafarhiẹ na, ọbo rọ yan kpenu rẹ ugbenu kugbenu kugbe otọ rẹ urhe kurhe ọkpokpọ; de gbe ọfarhiẹ?

⁷ Mi roro nẹ, O de ru enena ejobi nu ko rhivwi bru vwe rhe; ẹkẹvuọvo o rhivwi-i, Juda rẹ oniọvo rẹ ofian rọye na mrẹrẹ.

⁸ Ọ riẹnre nẹ fiki rẹ igberadja rẹ Izrẹl, ohwo ọfafarhiẹ na, mi vwo si ọbe kẹ nẹ o kpo, dede na oshọ se mu oniọvo ofian rọye na Juda-a, ẹkẹvuọvo ekpuyovwi rọye da je yanran re gbe igberadja.

⁹ Kidie igberadja na emu gheghe vwọ kẹ ọto na, ọ vẹ oragha kugbe urhe gbe gbe igberadja.

¹⁰ Yi Juda rẹ oniọvo rẹ ofian rọye na se rhivwi bru vwe rhe vẹ udu rọye ejobi-i, omeru ọ epha, eriyin Ọrovwohwo tare.

¹¹ Orovwohwo da ta kẹ vwẹ, Abe rẹ Izrẹl rẹ ogbigberadja na rere havwe nọ ọ ri Juda rẹ oniọvo re ofian rọye na.

¹² Ra, re ghwoghwo eta nana vwẹ obọhwẹre rẹ ọnre, wọ tanẹ, Rhivwi Izrẹl rẹ igberadja na, eriyin Ọrovwohwo tare. Mi gbi vwẹ ophu ni we-e, kidie me vọnre vẹ aruẹdọ, eriyin Ọrovwohwo tare.

¹³ Takpe rhọvwe abe wẹn ri wo ru kpahe Ọrovwohwo Ọghẹnẹ wẹn re wo ru ẹse wẹn kẹ erhorha re hẹ otọ rẹ urhe ọkpokpọ na.

¹⁴ Kurhẹriẹ ovwan emọ rẹ igberadja na, eriyin Ọrovwohwo tare, kidie mẹvwẹ onini wẹn, me cha reyọ ovwan ọvuọvo nẹ orere, kugbe ivivẹ nẹ orua, ke me reyọ ovwan rhe Zayọn.

¹⁵ Ke me cha kẹ ovwan isuigegede ri je vwe, re cha vwẹ ẹriẹn vẹ evughe ghẹrẹ ovwan.

¹⁶ Rẹ ovwan de rhi bu phihọ vwẹ otọ na re, vwẹ ẹdẹ yena eriyin Ọrovwohwo tare, ayen gbe cha ta ota na ọfa kpahe, Ekpeti rẹ ọphọ rẹ Ọrovwohwo na-a. Ayen gbi che roro-o, ayen gbe je karo phihọ-ọ, o gbi ji ghwru-u, a gbe je rhuẹrẹ ru ọfa-a.

¹⁷ Vwẹ ọke yena ke se Jerusalẹm nẹ ekete rẹ uvie rẹ Ọrovwohwo, irere na ejobi ki koko bro rhe, obaro rẹ Ọrovwohwo vwi Jerusalẹm, ayen gbe rha vwẹ udu ọgangan vwo nene umwemwu rẹ udu rayen ọfa-a.

¹⁸ Uwevwi ri Juda kọ kuoma gbe uwevwi rẹ Izrẹl vwẹ ẹdẹ yena. Ayen ki kuoma gbe nẹ otọ rẹ obọhwẹre ọnre rhe otọ re me vwọ kẹ ẹse rẹ ovwan nẹ e vwọ reuku.

¹⁹ Mi de roro nẹ komavọ mi vwo se phi we phihọ ohri rẹ emọ mẹ, re me vwẹ otọ esiri na kẹ ovwan uku ro me yovwi vwẹ irere na ejobi. Ki mi ji roro nẹ ovwan che se vwe, Ọsẹ mẹ, nẹ ovwan gbi che nene uvwe-e

²⁰ Uyota, obo re aye ọfafarhiẹ yan jẹ ọshare rọye vwo ye, eriyin ovwan gbe ofarhiẹ rhurhu vwe, E uwevwi rẹ Izrẹl, eriyin Ọrovwohwo tare.

²¹ E nyo urhuru ọvo vwẹ enu rẹ ugbenu phrẹphrẹphrẹ oviẹ vẹ ẹdjeguo rẹ emọ rẹ Izrẹl, fikiridie ayen wene idjerhe rayen, Ọrovwohwo Ọghẹnẹ rayen chọrọ ayen ẹro.

²² We rhivwi rhe emọ rẹ igberadja na, Mi sivwi ọfarhiẹ rẹ ovwan na. Nighe, avwanre bru we rhe; kidie wẹ Ọrovwohwo Ọghẹnẹ rẹ avwanre.

²³ Uyota igbenu na ghine ọphiẹvwẹ, Ukoko rẹ ozighi vwẹ enu rẹ igbenu ride na. Uyota vwẹ evun rẹ Ọrovwohwo Ọghẹnẹ rẹ avwanre ọye esivwo rẹ Izrẹl epha.

²⁴ Nẹ ọke emọ rẹ avwanre rhe, ọye emu rẹ omẹvuọ nana vwọ ghwọrọ obo rẹ esẹ rẹ avwanre wian kẹ igegede vẹ uchuru rayen, emeshare vẹ emetẹ rayen.

²⁵ Jẹn avwanre ji sherhẹ vwẹ evun rẹ omẹvuọ rẹ avwanre, ji jẹ ọghọ emuo rẹ avwanre ji rhurhu avwanre, kidie avwanre vẹ esẹ rẹ avwanre ru umwemwu kpahe Ọrovwohwo Ọghẹnẹ rẹ avwanre nẹ ọke emọ rẹ avwanre rhe rhi te nonẹ na; avwanre ji nyo urhuru rẹ Ọrovwohwo Ọghẹnẹ rẹ avwanre na-a.