Jerimaya 27 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Uyono re Yono nẹ Ọghrọrọ Rhe

¹ Vwẹ ẹtuọhọ rẹ uvie ẹriọ ri Zedikaya ọmọ ri Josaya, ovie ri Juda, ota nana de nẹ obọ rẹ Ọrovwohwo bru Jerimaya rhe:

² Enẹ Ọrovwohwo ta kẹ vwẹ: Ku ugbudia vẹ urhekpe kẹ oma wẹn, re wọ gba ayen mu ohọre wẹn.

³ Vwẹ ovuẹ rhe ovie rẹ Idọm, kugbe ovie ri Moab, vẹ ovie rẹ emọ rẹ Ammọn, vwo rhe ovie ri Taya, ji rhe ovie ri Saidọn vwẹ obọ rẹ ikọn rọ rhe Jerusalẹm bru Zedikaya rẹ ovie ri Juda rhe.

⁴ Ji iji nana kẹ ayen vwo rhe inini rayen. Enẹ Ọrovwohwo rẹ otuofovwi, Ọghẹnẹ rẹ Izrẹl, tare. Enẹ ovwan ta kẹ inini rẹ ovwan:

⁵ Mẹvwẹ ohwo rọ vwẹ ọrho mẹ rode na vẹ ogangan rẹ obọ mẹ ma akpọ na, kugbe ihwo vẹ eranvwe re hẹ enu rẹ akpọ na, me vwọ kẹ ohwo kohwo ro jevwe nẹ me vwọ ke.

⁶ Asakiephana mi phi etọ nana ejobi phihọ obọ ri Nebukadreza, ovie ri Babilọn, re odibo mẹ na, me je vwẹ eranvwe re aghwa na kẹ re ega.

⁷ Irere na ejobi cha ga vẹ ọmọshare rọye kugbe ovwrọmọ rọye, rhiri bẹsie rẹ ọke rẹ ọ rọye vwọ te; etiyin ẹgborho buebu vẹ ivie ride ki vwo ru ọviẹn.

⁸ Ẹkẹvuọvo ọ da dianẹ uvie ọvo gbe rhọvwe ga Nebukadreza nana rẹ ovie ri Babilọn na-a, ro gbi ji phi ohọre rọye phihọ otọ rẹ urhekpe rẹ ovie ri Babilọn na-a, me vwẹ ọlọkọ kugbe owẹvwe vẹ emiavwe ru ẹgborho yena gangan, bẹsiẹye me vwọ wan obọ rọye ghwọrọ ẹgborho yena nu, eriyin Ọrovwohwo na tare.

⁹ Eriyin na wa gba kerhọn rẹ emraro rẹ ovwan, eboepha rẹ ovwan, evwerhevwerhẹ rẹ ovwan, erieda rẹ ovwan, eyẹ idiẹbo re vuẹ ovwan nẹ, Ovwan cha ga ovie ri Babilọn na-a.

¹⁰ Kidie ofian ayen mraro rọye kẹ ovwan na, oba rọye ke che si ovwan nẹ otọ rẹ ovwan na shesheri. Ke me djẹ ovwan kufia, ovwan ke cha ghwọrọ kufia.

¹¹ Ẹkẹvuọvo Ẹgborho kẹgborho ro phi ohọre rọye phihọ otọ rẹ urhekpe rẹ ovie ri Babilọn ro da ga, ki mi jovwo nẹ ọ dia otọ robọ rọye, ro voro rọ je dia, eriyin Ọrovwohwo tare.

¹² Me da ta enana ejobi vwọ kẹ Zẹdikaya ovie ri Juda Phi ohọre wẹn phihọ otọ rẹ urhekpe rẹ ovie ri Babilọn, re wọ ga je ga ihwo rọye, re wọ rhọ.

¹³ Die sorọ rẹ ọlọkọ vwo hwe we vẹ ihwo wẹn, te owẹvwe, te emiavwe, kirobo re Ọrovwohwo ta kpahe ẹgborho kẹgborho rọ ga ovie ri Babilọn na-a na?

¹⁴ Wọ kerhọn rẹ emraro na-a re tanẹ wa cha ga ovie ri Babilọn na-a na, kidie ofian ayen mraro rọye kẹ ovwan na.

¹⁵ Mi ji aye-en, eriyin Ọrovwohwo tare, ẹkẹvuọvo ayen vwẹ odẹ mẹ mraro re efian, oba rọye ke me cha djẹ ovwan kufia, re ovwan da ghwọrọ kufia, ovwan kugbe emraro re mraro kẹ ovwan na.

¹⁶ Koye me ke ta kẹ irherẹn na vẹ ihwo nana nẹ, Enẹ Ọrovwohwo tare, Wa kerhọn rẹ eta rẹ emraro re ovwan re mraro kẹ ovwan na-a, nẹ, Nighe, a cha ghwa ekuakua rẹ uwevwu rẹ Ọrovwohwo na nẹ Babilọn cha phẹrẹkpẹ, kidie efian ayen mraro rọye kẹ ovwan na.

¹⁷ Wa kerhọn raye-en wa ga ovie ri Babilọn re wa rhọ. Die nẹrhẹ orere nana rhe dia ofefe?

¹⁸ Ọ da dianẹ ayen kẹ emraro, ri vwo ota rẹ Ọrovwohwo na, gbe jẹn ayen rẹ Ọrovwohwo rẹ otuofovwi na, rere ekuakua re jovwo vwe uwevwi rẹ Ọrovwohwo na, vẹ uwevwi rẹ ovie ri Juda, kugbe Jerusalẹm na vwo jẹ Babilọn ẹra.

¹⁹ Kidie enẹ Ọrovwoihwo rẹ otuofovwi na ta kpahe ichivwo na, oze rẹ ame na, imẹjẹ na, je kpahe ekuakua ri chekọ vwẹ orere na.

²⁰ E rẹ Nebukadreza ovie ri Babilọn kua yanra-an na, ọke ro vwo mu Jekonaya ọmọ ri Jehoyakim, ovie ri Juda, vẹ ikpihwo ri Juda vẹ Jerusalẹm ejobi nẹ Jerusalẹm kpo imu vwi Babilọn.

²¹ Enẹ Ọrovwohwo rẹ otuofovwi Ọghẹnẹ rẹ Izrẹl na tare kpahe ekuakua ri chekọ vwẹ uwevwi rẹ Ọrovwohwo na, vẹ uwevwi rẹ ovie ri Juda, vẹ Jerusalẹm:

²² A cha ghwa ayen kpo Babilọn re ayen da dia oboyi bẹsiẹye ro vwo te ẹdẹ me vwọ kerhọn rayen, eriyin Ọrovwohwo tare, kẹsiẹye me ke reyọ ayen rhe ri mi de phi ayen phihọ etinẹ na.