Jerimaya 26 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

A Djẹ Uguegue Rẹ Ughwu Mu Jerimaya

¹ Vwẹ etuọhọ rẹ uvie ri Jehoiakim ọmọ rẹ Josaya ovie ri Juda, ota nana de nẹ obọ rẹ Ọrovwohwo rhe,

² Enẹ Ọrovwohwo tare. Mudia vwẹ ọguan rẹ uwevwi rẹ Ọrovwohwo na, re wọ ta kẹ irere ri Juda ejobi re cha ẹga vwẹ uwevwi rẹ Ọrovwohwo na eta ejobi ri mi jiji kẹ wẹ nẹ wọ ta kẹ ayen na, wo si ota ọvuọvo no-o.

³ Siẹvo ayen me kẹrhọn, ri dohwo dumiovwo rọye de siobọ nu, re me vwọ mrasa rhẹriẹ iroro omiomiovwi re mejẹkpahe ayen fikirẹ iruo umwemwu rayen.

⁴ Wọ me ta kẹ ayen, Enẹ Ọrovwohwo tare: Ọ da dianẹ wa kerhọn mẹ-ẹ, vwọ yan phihọ urhi me ri mi phihọ obaro rẹ ovwan,

⁵ vwọ kerhọn rẹ eta rẹ idibo mẹ emraro na ri mi ji bru ovwan cha phẹrephẹre na, dede na wa kerhọ-ọn,

⁶ ki mi che ru uwevwi nana kerẹ Shilo ki mi ji ru orere nana ekan vwọ ke irere re akpọ na ejobi.

⁷ Irherẹn na vẹ emraro na kugbe ihwo na ejobi nyori ri Jerimaya vwo ta eta nana vwẹ uwevwi rẹ Ọrovwohwo na.

⁸ Ri Jerimaya vwo ta obo rẹ Orovwohwo jiji kẹ ejobi nẹ ọ ta kẹ ihwo na ejobi nu, irherẹn na vẹ emraro kugbe ihwo na ejobi de muo, ta nẹ, Wo che ghwu.

⁹ Die sorọ wọ vwọ vwẹ odẹ rẹ Ọrovwohwo mrarọ, ta nẹ, Uwevwi nana cha họhọ Shilo, orere nana je cha dia ofefe, o rhe vwo ohwo-o? Ihwo na ejobi de koko yariẹ Jerimaya phihọ vwẹ uwevwi rẹ Ọrovwohwo.

¹⁰ Ọke rẹ isun ri Juda vwo nyo imu nana, ayen de nẹ uwevwi rẹ ovie rhe obo uwevwi rẹ Ọrovwohwo ayen de tidia vwẹ unu rẹ Anurhoro Ọkpokpọ rẹ uwevwi rẹ Orovwohwo na,

¹¹ Kẹsiẹye irhẹrẹn na vẹ emraro na ke ta kẹ isun na vẹ ihwo na ejobi. Ọshare nana o fo abe rẹ ughwu, fikiridie ọ mraro kpahe orere nana, kirobo rẹ ovwan vwẹ erhọn rẹ ovwan nyo na.

¹² Kọye Jerimaya da ta kẹ isun vẹ ihwo na ejobi, nẹ, Ọrovwohwo ghine ju vwe rhe rhe ta eta ejobi re we nyori na kpahe uwevwi nana kugbe orere na.

¹³ Ọtiọye na ovwan gba rhẹriẹ idjerhe rẹ ovwan, wa je rhẹriẹ iruo rẹ ovwan asakiephana, re we nyo urhuru rẹ Ọrovwohwo Ọghẹnẹ rẹ ovwan, Ọrovwohwo ko kurhẹriẹ nẹ umiovwo ro ghwoghwori kpahe ovwan na.

¹⁴ Ẹkẹvuọvo vwọ kẹ vwẹ, nighe, me hẹ obọ rẹ ovwan. We ru vwe obo ri yovwiri ro ji shehọ kẹ ovwan.

¹⁵ Wa nabọ riẹn gbagba nẹ we de hwe vwe, yẹ ovwan che sun ọbara rẹ ọvwata te otọ kpahe oma rẹ ovwan vẹ enu rẹ orere nana kugbe ihwo re dia ejobi, kidie ghine uyota Ọrovwohwo ri ji vwe bru ovwan rhe nẹ me ta eta nana ejobi phihọ erhọn rẹ ovwan.

¹⁶ Kẹsiẹye isun vẹ ihwo na ejobi ke ta kẹ irherẹn na vẹ emraro na nẹ, Ohwo nana fo abe rẹ ughwu-u, kidie ode rẹ Ọrovwohwo rẹ Ọghẹnẹ rẹ avwanre ọ vwọ ta ota kẹ avwanre na.

¹⁷ Evo rẹ ekpako rẹ otọ na da kparoma ta ota kẹ ukoko rẹ ihwo na tanẹ,

¹⁸ Maika ri Mọreshẹt ọ mrarọ vwẹ ẹdẹ ri Hẹzikaya ovie ri Juda, ọ da ta kẹ ihwo ri Juda ejobi nẹ. Enẹ Ọrovwohwo rẹ otuofovwi tare, A cha gua Zayọn kerẹ udju, Jerusalẹm cha dia erhurhu rẹ umiovwo, Ugbenu rẹ uwevwi na je cha dia oghwaghwo ro kpenu.

¹⁹ Ke Hezikaya ovie ri Juda vi Juda ejobi hwere? Oshọ rẹ Ọrovwohwo gbi muo ro da nọ ekpẹn rẹ erhuvwu vwẹ obọ rẹ Ọrovwohwo? Ẹkẹvuọvo obo rẹ Ọrovwohwo tare nẹ ọye ru ayen jovwo na, o de jovwo? Avwanre ke guọnọ suọ okpetu rode vwọ kẹ omobọ rẹ avwanre na.

²⁰ Ọshare ọfa je herọ Uraya ọmọ ri Shemaya ro nẹ Kairiat jearim rhe rọ je vwẹ odẹ rẹ Ọrovwohwo mraro. Ọ mraro kpahe orere nana je kpahe otọ nana vwẹ oghẹre rẹ eta tie nana ri Jẹrimaya tare na.

²¹ Ọke ri Jehoiakim rẹ ovie kugbe egba rẹ ofovwi rọye vẹ isun na ejobi, vwo nyo eta nana, ovie na da guọnọ obo ro vwo hwe; ẹkẹvuọvo ri Uraya vwo nyo, udu de bro ọ da djẹ kpo Ijipt.

²² Kẹsiẹye Ovie Jehoiakim ki ji eshare evo, Ẹlnatan ọmọ rẹ Akbọ vẹ efa ri kugbe vwo kpo Ijipt,

²³ ayen de mu Uraya nẹ Ijipt rhe vwo rhe Ovie Jehoiakim o de hwe o da kpare orivwi rọye phihọ asan re shi ihwo diodi phihọ.

²⁴ Ẹkẹvuọvo Ahaikam ọmọ ri Shafan da nabọ vwẹ obọ rhurhu Jerimaya gangan ọtiọye na ọ gbe rhọvwe vwọ kẹ ayen hwe-e.