Jerimaya 20 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

A Harhe Pashọ Ekan Rọ Vwọ Kanre Jerimaya

¹ Kọye ri Pashọ rẹ orherẹn na, ọmọ ri Imma, rọ dia olori vwẹ uwevwi rẹ Ọrovwohwo na, de nyo ri Jẹrimaya vwọ mraro rẹ imu nana

² Kọye Pashọ da teyọ Jẹrimaya re ọmraro na, ọ da vwẹ igoni rẹ unurhoro ro kpenu rẹ Bẹnjamin vwẹ uwevwi rẹ Ọrovwohwo na karọ

³ Vwẹ ẹdẹ rivẹ, ri Pashọ vwọ rhan Jerimaya nẹ igoni na nu, Jerimaya da ta kẹ, Ọrovwohwo se odẹ wẹn Pashọ-ọ, ẹkẹvuọvo Imuọshọ vwẹ abọ kabọ.

⁴ Kidie enẹ Ọrovwohwo tare, Nighe, mi che ru we vwọ dia imuọshọ kẹ omobọ wẹn ji kugbe igbeyan wẹn ejobi. Ọlọkọ rẹ ivwighrẹ rayen che gere ayen she yi wo di ni ughe. Ki mi phi Juda ejobi phihọ obọ rẹ ọvie ri Babilọn, ọ cha ghwa ayen kpọ imu kpo Babilọn, ọ da vwe ọlọkọ hwe ayen.

⁵ O rọ ma rhọ, me cha reyọ oyovwe rẹ orere rọye ejobi, efe rọye ejobi, kugbe ughwẹ rẹ ivie ri Juda ejobi phihọ obọ rẹ ivwighrẹ rayen, iri che cho ayen, re ghwẹ ayen reyọ, a me ghwa ayen kpo Babilọn,

⁶ Wọwẹ, ri Pashọ, vẹ ihwo re dia uwevwi wẹn ejobi, che kpo imu, Babilọn wọ cha ra; oboyi wo de ghwu, oboyi e ji shi we phihọ, wẹ tẹ igbeyan wẹn ejobi, e re wọ mrarọ rẹ efian kẹ na.

Uvwerhe ri Jerimaya

⁷ E Ọrovwohwo, wọwẹ re phiẹvwẹ, ọ da ghwa phiẹ vwẹ; wọwẹ re gan nọ vwẹ, wo de phi kparobọ. Mi hirhe phihọ emu rẹ ehwẹjẹ vwẹ ọke ejobi; ihwo ejobi ke hwẹ vwẹ.

⁸ Kidie ọke me da ta ota ki mi kperẹ, mi kperẹ, Ozighi vẹ oghwọrọ! Kidie ota rẹ Ọrovwohwo ko rhoma rhi hirhe phihọ ehwẹjẹ kẹ vwẹ vwẹ ọke ejobi.

⁹ Me da tanẹ, Mi gbi che se odẹ rọye-e, eyẹ me gbe ta ota vwẹ odẹ rọye-e, yẹ ọ hẹ udu mẹ kerẹ erhanre rọ la re rhurhu phihọ evun rẹ ibeku mẹ, oma kọ rhọvwẹ vẹ eyọnrọn rọye, mi gbi se chiro-o.

¹⁰ Kidie mi nyo ophiọrọ buebu. Imuọshọ ọ hẹ asan ejobi! phọphọ! Jẹn avwanre phọphọ! emamọ rẹ igbeyan mẹ ejobi tarọ rẹ ayen vwọ rhẹrẹ eshe mẹ. Ọkeọvo ya cha phiẹ, avwanre ki che phiọ kparobọ rẹ avwanre de ruo keri.

¹¹ Ẹkẹvuọvo Ọrovwohwo vo vwẹ herọ kerẹ isodje rọ muoshọ, vwẹ ọtiọye na iri mu kpahe ovwẹ cha yẹghrẹ, ayen se phi vwe kparobọ-ọ. Oma cha vọ ayen gangan, kidie ayen cha kparobọ-ọ. Ijọghọevwo kọ dia erayen bẹdẹ, ọ cha sa chọrọ ẹro bẹdẹ-ẹ.

¹² E Ọrovwohwo rẹ otuofovwi, wẹ rọ davwẹ evwata nẹ, rọ mrẹ udu vẹ iroro, ju vwe mrẹ orukeri wẹn vwẹ enu rayen, kidie mi phi ẹdjọr mẹ phihọ obọ wẹn.

¹³ So une kẹ Ọrovwohwo, jiri Ọrovwohwo na! kidie ọye sivwi arhọ rẹ otu rẹ akpọ bẹn nẹ obọ rẹ iruimwemwu.

¹⁴ Ekan kẹ ẹdẹ re vwo vwiẹ vwẹ na! Ẹdẹ rẹ oni mẹ vwiẹ vwẹ na, e jo yovwẹ kẹ-ẹ!

¹⁵ Ekan kẹ ohwo na rọ ghwa ikun rhe ọsẹ mẹ nẹ, E vwiẹ ọmọshare kẹ we, rọ nẹrhẹ ọghọghọ na.

¹⁶ E jẹ ohwo yena họhọ irere rẹ Ọrovwohwo gerishe rọ vwo arodọvwẹ kẹ na, e jo nyo oviẹ vwẹ urhiọke kugbe unuebo vwẹ oghẹruvo,

¹⁷ Fikiridie o hwe vwe phihọ evu-un manẹ kẹ evun rẹ ọni mẹ hirhe phihọ ushi mẹ, rẹ evun rọye e de mudje gugurugu.

¹⁸ Die sorọ mi vwo nẹ evun rẹ oni mẹ rhe rhe vwọ mrẹ owian vẹ ẹson, rhi vwo yere ẹdẹ mẹ ejobi vwẹ omaẹvuọ?