Jerimaya 2 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ọrovwohwo ra rẹ Izrẹl ro Bo Ghwru

¹ Ota rẹ Ọrovwohwo de bru vwe rhe, tanẹ,

² Yanran wo re ghwoghwo kẹ ihwo rẹ Jerusalẹm, Ene Ọrovwohwo tare, Me karohọ ẹga rẹ ọke emọ wẹn, ẹguọnọ wẹn kerẹ ọpha, obo wo nene uvwe te vwẹ evun rẹ aghwa vwẹ otọ ra kọnre-e.

³ Izrẹl ohwo ọfuanfon kẹ Ọrovwohwo, emamọ rẹsosuọ rẹ orhọ rọye. Otu re rerọ ejobi reabe; okpetu bru ayen rhe, Ọrovwohwo re tarọ.

⁴ Nyo ota rẹ Ọrovwohwo E uwevwi ri Jekọp, kugbe erua rẹ uwevwi rẹ Izrẹl ejobi.

⁵ Eriyin Ọrovwohwo tare, Didi oruchọ esẹ wẹn mrẹ vwẹ oma mẹ rẹ ayen vwọ yan jẹ uvwe vwo shesheri re nene imu fefe, rẹ ayen vwo hirhe oma phihọ ofefe?

⁶ Ayen sa ta nẹ, Tivọ Ọrovwohwo epha rọ reyọ avwanre nẹ otọ rẹ Ijipt rhe na, Ohwo ro sun avwanre vwẹ evun rẹ aghwa na, vwẹ evun rẹ otọ rẹ aton kugbe ikpotọ na, otọ ọyaya vẹ ebri rode na, asan rẹ ohwo dia-a na?

⁷ Me reyọ owẹ rhe otọ rọ vọnre vẹ emu re wọ ghọghọ vwẹ emamọ vẹ emuesiri rọye. Ẹkẹvuọvo wọ vwọ ro otọ mẹ na nu wo de miovwo, wọ da vwẹ ukuẹriọ mẹ vwo gbe ẹgua.

⁸ Irherẹn na sa ta-a, Tivọ Ọrovwohwo na epha vwo? Ayen otu ri yono urhi na riẹn vwẹ-ẹn isun na gbe urhi mẹ ku; emraro na vwẹ Baal vwọ mraro, ayen de nene imu ri vwo erere-e.

⁹ Vwẹ ọtiọye na ki mi nene uwe họnre eriyin Ọrovwohwo tare, ki mi nene emọ rẹ emọ wẹn họnre.

¹⁰ Samu kpọ erhuru ri Saiprọs re wọ mrẹ, eyẹrẹ ji ohwo kpo Kida wọ fuẹrẹ; wọ sa mrẹ emu ọtiọye dẹvure.

¹¹ A mrẹ orere ro wene eghẹnẹ rọyẹ dẹvure, owenẹ ayen dia eghẹnẹ-ẹ dede na? Ẹkẹvuọvo ihwo mẹ vwẹ emu ro fi erere-e vwo wene urinrin rayen.

¹² Jẹn ọnana gbe we unu, E idjuvwu, kpogho, ovwan ẹdia ofefe kakare eriyin Ọrovwohwo tarẹ,

¹³ Kidie ihwo mẹ ru imu ivẹ chọ! ayen sen vwẹ, rẹ ẹtẹrhe rẹ ame rẹ urhuarhọ na, ayen da tọn egọdọ rẹ ame kẹ omobọ rayen, egọdọ re vwẹn, re sa yọnrọn ame-e.

¹⁴ Kẹ Izrẹl ọviẹn, kẹ ọmọ rẹ ọviẹn o ruẹ? Die ọ vwọ rhọma rhi hirhe phihọ ohwo re muẹ ria?

¹⁵ Ikpohrokpo re kperẹ nene, ayen re kperẹ gangan, Ayen ru otọ rọye ofefe; irere rọye hẹ evun rẹ oghwọrọ ihwo gbe hẹ ayẹ-en.

¹⁶ Ọ rọ ma rhọ, ihwo ri Mẹmfis vẹ Tapanhes ghwọrọ erhun rẹ uvie wẹn.

¹⁷ Ọ dia owẹwẹ ọvo ghwa ọnana phihọ uyovwi wẹn re wọ vwọ siẹn Ọrovwohwo Ọghẹnẹ wẹn, ro vwo sun we wan idjerhe na?

¹⁸ Ki didi erere ri te we ri wọ vwọ yan kpo Ijipt na, wọ vwọ da ame ri Nail na? eyẹ didi erere ri te we ri wọ vwọ yan kpo Asiria, ru wọ vwọ da ame rẹ Yufretis?

¹⁹ Orukuruku wẹn cha họnron owẹ, egagọ esiọn wẹn cha ghwọ ku we. Vughe re wọ mrẹ nẹ umwemwu yara kidie wọ siẹn Ọrovwohwo Ọghẹnẹ wẹn, oshọẹdjẹ mẹ rhe we vwẹ evu-un, Ọrovwohwo Ọghẹnẹ rẹ ofovwi re tarọ.

²⁰ Okrire wo vwo vwirhi urhekpe wẹn wọ da sanvwe ojọnrọn wẹn vwrẹn, wọ da ta nẹ, Me gbe ga-a, Uyota, vwẹ enu rẹ ugbenu otete ejobi kugbe otọ rẹ irhe wọnwọn ejobi wo de rhuẹn kerẹ igberadja.

²¹ Omamọ rẹ urhe ri vain me vwọ kọn wẹ, omamọ rẹ ubi ọsoso. Die sorọ wo vwo jẹ ubi ẹmọ ru wo vwo hirhe phihọ vain rẹ ochibẹ.

²² Owenẹ wọ vwẹ iwurhie vẹ odja buebu họ oma wẹn, upe rẹ abe wẹn je hẹ obaro mẹ, Eriyin Ọrovwohwo Ọghẹnẹ tare.

²³ Mavọ wo ru ta nẹ, mi gbe ẹgua-a, Mi nene Baal rẹ? Gbe ni idjerhe wẹn vwẹ iyara na; re wọ riẹn obo wo ruru Iyesi ọboba rọ kọghọ ra vwẹ ufi gba obẹnẹ rọye.

²⁴ Ekẹtẹkẹtẹ rẹ aghwa ọ vẹ aghwa riẹnriẹn oma oma de here jo se inwe! ono sa da urhuru sivwe rọye ji? Ohwo rọ guọnọ e jẹn oma rhọ-ọ; vwẹ evun rẹ emeranvwe rọye ayen da mrẹ.

²⁵ Wo rhie awọ phihọ ya-an si upho wẹn nẹ urhuru rẹ ame. Ẹkẹvuọvo wọ tare o fiemu-u, kidie me guọnọ erhorha, me yan nene ayen.

²⁶ Ọtiobo rẹ oma vo oji siẹ re de muo eriyin oma cha vo uwevwi rẹ Izrẹl; te ayen, te ivie rayen, isun rayẹn, irherẹn rayẹn, kugbe emraro rayen.

²⁷ Re ta kẹ urhe, “Wọwẹ ọsẹ mẹ,” vwọ kẹ olalọ Wẹ ri vwiẹ vwẹ. Kidie ayen chuko ku vwe, ọ dia opharo raye-en. Ẹkẹvuọvo ọke rẹ ukpokpogho rayẹn ayen me ta, vrẹn wo sivwi avwanre.

²⁸ Ẹkẹvuọvo kẹ ẹdjọ rẹ ovwan na rhọ ru wa ma kẹ oma rẹ ovwan na? Gbe jẹn ayen vrẹn se ayen se sivwi ovwan vwẹ ọke rẹ ukpokpogho rẹ ovwan kidie ọtiobo rẹ irere rẹ ovwan bu te na, eriyin edjọ rẹ ovwan ji bu te, E Juda.

²⁹ Die we vwo gu vwe? Ovwan ejobi mukpahe ovwẹ, Eriyin Ọrovwohwo tare.

³⁰ Mi hwe emọ rẹ ovwan dede na, yẹn ayen vwiro ku obọ rhẹriẹ-ẹ, Ọlọkọ rẹ obọ wẹn hwe emraro wẹn kerẹ okpohrokpo rọ chẹghẹ emu.

³¹ Ji te we, E uvwiẹ na, kerhọn rẹ ota rẹ Ọrovwohwo. Mẹvwẹ kẹ aghwa vwọ kẹ Izrẹl, eyẹ otọ ro mu ebri? Kidie ihwo me vwọ ta nẹ, Avwanreọ imuvwiẹ, avwanre gbi bru uwe rhe ofa-a?

³² Kẹ ekuakua rẹ osẹvwe sa chorọ ọmọte ẹro, eyẹ emwa rẹ opha sa chọrọ ẹro? Dede na me chọrọ ihwo mẹ ẹro rhabae rhe.

³³ Mavọ wo nenesi rẹ otu rẹ esen wẹ te, Ru wo vwo yono eya umwemwu na phihọ idjerhe wẹn.

³⁴ A mrẹ ọbara rẹ ivwiogbere re hweri ekueku vwẹ ejọjọ rẹ ewun wẹn, ru wọ ru imu nana ejobi na yẹ ayen tọn uwevwi wẹn fi-i.

³⁵ Wọ ta, Evun mẹ fọnro, omuẹro o si ophu mẹ nẹ evun re. Nighe, me cha reyọ owẹ vwo guẹdjọ re wọ vwọ ta nẹ “mi ru umuemu-u.”

³⁶ Mavo wo ni ovwravwra wẹn frae te, wo vwo ku idjerhe wẹn rhẹriẹ! Ijipt cha phọphọ owẹ kirobo rẹ Asiria je phọphọ owẹ

³⁷ Evun rẹ etiyin wo ji che nurhe vẹ abọ re wọ ghwẹ kpahe uyovwi, kidie Ọrovwohwo siẹn otu ru wọ vwẹ ẹro so wa rha sa wan oma rẹ ayen yovwi-i.