Jerimaya 1 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Use ri Jerimaya kugbe Uwevwi-ejo Rọye

¹ Eta ri Jerimaya, ọmọ ri Hilkaya, ọ rẹ irherẹn rẹ Anatot vwẹ otọ ri Bẹnjamin,

² ohwo rẹ ota rẹ Ọrovwohwo brurhẹ vwẹ ọke ri Josaya ọmọ rẹ Amọn, ovie ri Juda, vwẹ ikpe ihwerha rẹ ẹriọ rọye.

³ Ọ je rhoma rhe vwẹ ọke ri Jehoakim, ọmọ ri Josaya ovie ri Juda, rhiri re te oba rẹ ẹgbukpe uhwọvo ri Zẹdikaya, ọmọ ri Josaya, ovie ri Juda, re te imu ri Jerusalẹm vwẹ emeranvwe riyori.

⁴ Asakiephana ota rẹ Ọrovwohwo de bru vwe rhe nẹ,

⁵ Tavwe me ke mama owẹ vwẹ obo evun, me riẹn wẹ, tavwe re ki vwiẹ wẹ yi mi ru we fon nure; me da vwo owẹ mu ọmraro kẹ irere na.

⁶ Ọye me da ta, E, Ọrovwohwo Ọghẹnẹ! Nighe me riẹn obo ra ta ota-a, kidie omotete mi ruẹ.

⁷ Ẹkẹvuọvo Ọrovwohwo ke ta kẹ vwẹ nẹ, Wọ ta nẹ, mẹvwẹ omotete-e; fikiridie ihwo ri mi ju we bru ra ejobi wo che brẹ ra, Kemu kemu me ta kẹ wẹ ọye wọ ta.

⁸ Wo brudu rẹ aye-en, kidie me vẹ owẹ herọ mi sivwi uwe, eriyin Ọrovwohwo tare.

⁹ Kẹsiẹye Ọrovwohwo ke riẹn obọ rọye rhe vwo te ugbunu mẹ; Ọrovwohwo ke ta kẹ vwẹ nẹ, nighe, mi phi ota mẹ phihọ ugbunu wẹn nure.

¹⁰ Nighe, nonẹ na me vwẹ owẹ mu vwẹ enu rẹ ẹgborho kugbe enu rẹ ivie, wọ vwọ kọnre wọ je guọghọ te otọ, wọ vwọ ghwọrọ wo vwo phi kua, wọ vwọ bọn wọ je vwọ kọn.

¹¹ Ota rẹ Ọrovwohwo de ji bru vwe rhe, tanẹ, Jerimaya, did emu wọ mrẹre Me da ta, Me mrẹ ọkpọ rẹ orhomrẹ.

¹² Ọrovwohwo ke rha ta kẹ vwẹ nẹ, Wọ riẹn mrẹ, kidie me rhẹrẹ ota mẹ rere evwo ruo.

¹³ Ota rẹ Ọrovwohwo ki bru vwe rhe obọ rivẹ, nẹ, Didi emu wọ mrẹre na? Me da ta, Me mrẹ itaso rọ họrhọ, ro hirhe opharo ku obọhwẹre ọnre na.

¹⁴ Ọrovwohwo da rha ta kẹ vwẹ, obọhwẹre ọnre na okpetu che nẹ brẹ ihwo rẹ otọ na cha.

¹⁵ Kidie, nighe, Mi hiro se uvwie rẹ ivie rẹ obọhwẹre ọnre, Ọrovwohwo tare, ayen cha rhe ayen dohwo dekete rẹ uvie rọye cha bọn phihọ ughere ri Jerusalẹm, ayen cha bọn kpahe igbẹhẹ rọye ejobi riariẹ, je kpahe irere ri Juda ejobi.

¹⁶ Mi brorhiẹ mẹ hwe ayen, fiki rẹ orukuruku rayen rẹ ayen vwo sen vwẹ na; ayen torhẹ izobo kẹ edjọ efa, ayen da gọ iruo rẹ abọ rayen.

¹⁷ Ẹkẹvuọvo wẹ, chobiẹ amwa wẹn vrẹn, re wọ ta emu kemu ri mi ji iji rọye kẹ wẹ. Wo jẹ ofu rẹ ayen dje we-e, me da rha vwẹ ofu dje we vwẹ obaro rayen.

¹⁸ Nighe, Ekpuyovwi mẹ, Mi ru we nonẹ na vwọ dia orere ra gba ogba riariẹ phihọ, osusu rẹ utehru, kugbe igbẹhẹ rẹ ẹrovwo vwọ kpahe otọ na ejobi, kpahe ivie ri Juda, isun rọye, irherẹn rọye, kugbe ihwo rẹ otọ na ejobi.

¹⁹ Ayen cha họnre owẹ; ẹkevuọvọ ayen se phi we kua-a, kidie me vẹ owẹ herọ, mi sivwi uwe, eriyin Ọrovwohwo tare.