Jẹnẹsis 7 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Oghwe rode na

¹ Etiyin Ọrovwohwo da ta kẹ Noa, Gba ro evun rẹ okọ na, wẹ kugbe evwruwevwi wẹn ejobi, fikiridie Me mrere nẹ wẹ ọvwata vwẹ obaro mẹ vwẹ evun rẹ uvwiẹ nana.

² Gba reyọ oka rẹ eranvwe ighwrẹ ivivẹ ri tete oma, ọ rẹ ọshare vẹ ọ rẹ aye kugbe eranvwe ivivẹ ri gbe oma, ọ rẹ ọshare vẹ aye rọye;

³ kugbe oka rẹ ephra ri obenu na ighwrẹ ivivẹ rhe, ọshare vẹ aye, rere ayen vwo jẹ ghwọrọ kakare nẹ enu rẹ akpọ na.

⁴ Kidie ẹdẹ ighwrẹ chekọ, re Me cha vwọ vwẹ osio rhe akpọ na uvo ujuvẹ kugbe ason ujuvẹ, emu kemu ro vwo ẹnwẹn re Me mare na ejobi ki mi phoro kakare nẹ enu rẹ otọ na.

⁵ Noa de ru emu ejobi rẹ Ọrovwohwo dje kẹ na.

⁶ Noa da dia ikpe uri erha ọghwo te vwẹ ọke rẹ oghwe na vwo ku akpọ na.

⁷ Te Noa vẹ emọ rọye vẹ aye rọye te eya rẹ emọ rọye vẹ ọye da ro evun rẹ okọ na, rẹ ayen vwo nẹ ughwu rẹ ame na.

⁸ Eranvwe ri tete oma, kugbe iri gbe oma, te ephra, te obo ri kpono vwẹ otọ na,

⁹ ivivẹ ọshare kugbe aye, vẹ Noa da ro evun rẹ okọ na, kirobo rẹ Ọghẹnẹ dje kẹ Noa.

¹⁰ Ẹdẹ ighwrẹ vwọ wan nu oghwe na de rhi ku akpọ na.

¹¹ Vwẹ ikpe uri erha rẹ akpọ ri Noa, vwẹ emeranvwe rivẹ, vwẹ ẹdẹ ihwe gbẹ ighwrẹ rẹ emeranvwe na, vwẹ ẹdẹ vuọvo yena, ogbugbu kugbe ikokodo rẹ akpọ na da va phia, evakpo rẹ obo odjuvwu na de rhie phihọ.

¹² Osio da rhọ phihọ akpọ uvo ujuvẹ kugbe ason ujuvẹ.

¹³ Vwẹ ẹdẹ ọvuọvo na Noa vẹ emọ rọye, Shẹm vi Ham kugbe Jafẹt, aye ri Noa vẹ eya erha rẹ emọ rọye ejobi da ro evun rẹ okọ,

¹⁴ te ayen kugbe eranvwe keranvwe, deranvwe doka, te uchuru duchuru doka rọye, dọphra doka rọye.

¹⁵ Ayen vi Noa da yan usu ro evun rẹ okọ na, ivivẹ rẹ ayen obo ri vwo ẹnwẹn rẹ arhọ ejobi.

¹⁶ Ayen da ruọ, ọshare vẹ aye rẹ emama na ejobi, kirobo rẹ Ọghẹnẹ dje kẹ, Ọrovwohwo de huho gbe.

¹⁷ Oghwe na de ku ẹdẹ ujuvẹ vwẹ enu rẹ akpọ na, ame na de bu phihọ, o de mu okọ na kpenu, ọ da kpare kpenu phenephene.

¹⁸ Ame na de reghe akpọ na ejobi yọn je vwọnvwọn cha; okọ na de phorhi vwẹ enu rẹ ame na.

¹⁹ Ame na de rhi bu gangan o de rhi reghe igbenu ride ejobi ri otọ rẹ akpọ na,

²⁰ ame na vwo reghe igbenu na nu, ọ ke rha je kpare kubit ihwiori.

²¹ Kemu kemu ro vwo ẹnwẹn rọ yan vwẹ akpọ na ejobi de ghwure, ephra, uchuru, eranvwe rẹ aghwa, erọnvwọ ri biẹyi re rhẹrhẹ vwẹ ame na, kugbe kohwo kohwo,

²² kemu kemu rọ otọ ọyaya na rọ vwẹ unwe nwẹn ejobi de ghwure.

²³ O de phoro kemu kemu ejobi ro vwo arhọ re yan vwẹ enu rẹ otọ na no, ohwo, eranvwe, obo ri kpono, ephra rẹ enu; e de phoro ayen nẹ akpọ na, Noa ọvo kọye ri chekọ, kugbe ihwo re vẹ ọye gba herọ vwẹ evun rẹ oko na.

²⁴ Ame na de reghe akpọ na ẹdẹ ujuvẹ gbẹ ihwe.