Jẹnẹsis 50 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Josẹf da gbanọ ọsẹ rọye ọ da vwẹ opharo te, ọ da viẹ, ọ da fiọnfiọn.

² Josẹf da kẹ idibo rọye rẹ ẹbo nẹ ayen vwẹ umwu pharọ orivwi rẹ ọsẹ rọye Ọtiọye na ẹbo na da pharọ orivwi rẹ Izrẹl,

³ ẹdẹ ujuvẹ eruo, kidie ekuakua ra vwọ pharọ pha buebu. Ihwo rẹ Ijipt na da viẹ ẹdẹ ujorha gbẹ ihwe.

⁴ Ẹdẹ rẹ uvweri na ejobi vwọ ghwiẹ nu, Josẹf da ta kẹ ekru ri Fero nẹ, Ọ da dianẹ ivun mẹ vwerhe ovwan, gba ta, Me rẹ wẹ, ki Fero nyo nẹ,

⁵ Ọsẹ mẹ tanẹ, Mi duvwu iyori, tanẹ, Mi ghwẹ reọ; vwẹ evun rẹ ushi mẹ re Me tọn kẹ oma mẹ vwẹ otọ ri Kenan, Etiyin e shi vwe phihọ. Asakiephana gbe ju vwe ra, Me rẹ wẹ, re mi re shi ọsẹ mẹ, re mi rhivwi rhe.

⁶ Fero da kpahe kẹ, Yanran re shi ọsẹ wẹn, kirobo rọ tanẹ wo duvwu iyori kẹ ọye na.

⁷ Kọye Josẹf da yanran re shi ọsẹ rọye, idibo ri Fero ejobi de nene yanran, kugbe ekpako rẹ Ijipt ejobi,

⁸ etiọye ji te uwevwi ri Josẹf, emesẹ rọye, kugbe uwevwi rẹ ọsẹ rọye ejobi, jokpa rẹ imitete na ọvo, uchuru rayen, vẹ eranvwe rayen ọvo ri chekọ vwi Goshẹn.

⁹ Te idjighere rẹ ofovwi te iyesi vẹ otu re gua iyi nenire, usun grogro rọghọ rọghọ.

¹⁰ Rẹ ayen rhi vwo te uwevwi rẹ ewunye rẹ Atad, rọ abọ oboyi ri Jọdan, Etiyin ayen da viẹ oviẹ rode, oviẹ rẹ uvwerhe, o de muomahọ urhughwrẹ soso vwọ ke ọsẹ rọye.

¹¹ Ọke rẹ ihwo rẹ otọ na, ihwo ri Kenan vwọ mrẹ omaemuohọ vwẹ uwevwi rẹ ewunye rẹ Atad, ayen da ta, Ọnana okpemu rode ri ru ihwo rẹ Ijipt na. Fiki rẹ ọtiọye na e vwo se asan na Abel-mizraim, ọ abọ oboyi ri Jọdan.

¹² Enẹ emọ rọye ru kẹ kirobo ro ji urhi kẹ ayen na,

¹³ kidie emọ rọye muro rhe otọ ri Kenan, ayen de rhi sho phihọ ẹmwa rọ aghwa ri Mak-pela, rọ obọrhe ri Mamre, rẹ Ebraham dẹre kugbe udju mie Efrọn ohwo ri Hẹt, rọ dia ẹkẹn rẹ ogbẹ.

¹⁴ Ro vwo shi ọsẹ rọye nu. Josẹf de rhivwi kpo Ijipt vẹ emesẹ rọye kugbe ihwo ejobi ri nenire ra re shi ọsẹ rọye.

Josẹf ta uda phihọ Iniọvo Rọye Awọ

¹⁵ Ọke rẹ emesẹ ri Josẹf vwọ mrẹ nẹ ọsẹ rayen ghwure, ayen da ta, Ọke ọvo evun rẹ avwanre Me rhoma ri miovwo Josẹf, ọ Me rhe hwosa rẹ imwemwu ri Me ruro kẹ avwanre.

¹⁶ Etiyin ayen da vuẹ ovuẹ rhe Josẹf, tanẹ, Ọsẹ wẹn ji urhi nana ro ki ghwu.

¹⁷ Ta ki Josẹf, Vwo ghovwo, Me rẹ we, ogbeku rẹ emesẹ wẹn kugbe umwemwu rayen kidie ayen ru imwemwu kpahe owẹ. Asakiephana, avwanre rẹ wẹ, vwo ghovwo ogbeku rẹ idibo rẹ Ọghẹnẹ rẹ ọsẹ wẹn. Josẹf da viẹ rẹ ayen vwọ vuẹ na.

¹⁸ Emesẹ rọye na ọvo da yan rhe ri shiguẹ kẹ, ayen da ta, Nighe, avwanre idibo wẹn.

¹⁹ Ẹkẹvuọvo Josẹf da ta kẹ ayen, Wa djẹ oshọ-ọ fikiridie kẹ ẹdia rẹ Ọghẹnẹ mi epha?

²⁰ Vwọ kẹ ovwan, umwemwu we ru kpahe ovwẹ, ẹkẹvuọvo Ọghẹnẹ da rhẹriẹ umwemwu na vwọ erhuvwu kẹ vwẹ, o ruro rhe rere ihwo buebu vwọ rhọ, kirobo rọ epha nonẹ na.

²¹ Ọtiọye na wa dje oshọ-ọ, Me je ghere ovwan vẹ emọ re ovwan. Kẹnẹ o phi udu phihọ ayen awọ o de bru ayen uche.

Ughwu ri Josẹf

²² Ọtiọye na Josẹf da dia otọ rẹ Ijipt, te ọye vẹ uwevwi rọye ejobi, Josẹf da dia ikpe ujori gbẹ ihwe.

²³ Josẹf da mrẹ ivwrọmọ rẹ erha rẹ Ifrem, ji te emọ ri Machir rẹ ọmọ ri Manasse re vwẹriẹ phihọ awọ ri Josẹf.

²⁴ Josẹf da ta kẹ emesẹ rọye, Mi che ghwu reọ, ẹkẹvuọvo Ọghẹnẹ che bru ovwan rhe, rọ da reyọ ovwan nẹ otọ nana vwo kpo otọ re veri kẹ Ebraham, Aizik, kugbe Jekọp.

²⁵ Josẹf de tanẹ, emọ rẹ Izrẹl duvwu iyori, tanẹ, Ọghẹnẹ mrẹ ovwan, ovwan Me ghwa ibeku mẹ nẹ etinẹ.

²⁶ Josẹf de ghwu, rọ vwọ tọn ẹgbukpe ujori gbẹ ihwe nu, ayen da vwẹ umwu phare orivwi rọye, e de muo phihọ okọ vwẹ Ijipt.