Jẹnẹsis 42 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Iniọvo ri Josẹf rhe Ijipt rhe de ọka

¹ Ọke ri Jekọp vwo nyo nẹ ọka Ijipt, ọ da ta kẹ emọ rọye, Die ovwan ohwohwo vwo nẹ ohwo?

² O da ta, Nighe, mi nyori nẹ ọka Ijipt, yanran wa ra dẹ ọka kẹ avwanre vwẹ oboyi, rere ma vwọ rhọ, re e je ghwo.

³ Kọye ihwe rẹ emesẹ ri Josẹf da yanran kpo Ijipt ra dẹ oka.

⁴ Ẹkẹvuọvo Jekọp gbi ji Bẹnjamin rẹ oniọvo ri Josẹf nene aye-en, fiki rẹ oshọ rẹ emu de rhe ruo.

⁵ Kẹnẹ emọ rẹ Izrẹl yanran ra dẹ kugbe ihwo efa re je rhe dẹ, kidie owẹvwe na firi vwẹ otọ ri Kenan ejobi.

⁶ Vwẹ ọke nana Josẹf kọye osun rẹ otọ na ejobi; ọye je ohwo rọ shẹ kẹ ihwo rẹ otọ na ejobi. Emesẹ ri Josẹf na da rhe, ayen de diguẹ bọvwọ epharo rhu otọ vwọ kẹ.

⁷ Josẹf da mrẹ emesẹ rọye na, o de vughe ayen, ẹkẹvuọvo o de ru ayen kiri erhorha ọ da ta ota gbaegbae kẹ ayen. Tivọ we nurhe? ọ da ta. Ayen da ta, Nẹ otọ ri Kenan rhe, re de emu.

⁸ Kẹnẹ Josẹf vughe emesẹ rọye, ẹkẹvuọvo jẹn ayen vughire-e.

⁹ Josẹf da karohọ evwerhẹ rọ vwerhẹ kpahe ayen, ọ da ta kẹ ayen, Ovwan ogborhugborho, wa rhere re mrẹ ẹba rẹ otọ na.

¹⁰ Ayen da ta kẹ, Ẹjo, ọrovwovwe, ẹkẹvuọvo e mu ọye idibo wẹn rhe dẹ.

¹¹ Avwanre ejobi emọ rẹ ọshare ọvo, avwanre ihwo dẹdẹn, idibo wẹn dia igborhugborho-o.

¹² Ọ da ta kẹ ayen, Ẹjo, ẹba rẹ otọ na ọye ovwan rhe mrẹ.

¹³ Ayen da ta, Avwanre, idibo wẹn, emesẹ ihwivẹ, emọ rẹ ọshare ọvo vwẹ otọ ri Kenan; gbe no, ọrẹ otete ejobi ọ vẹ ọsẹ rẹ avwanre obo uwevwi nonẹ na, ọro chekọ gbe herọ-ọ.

¹⁴ Ẹkẹvuọvo Josẹf da ta kẹ ayen, O pha kirobo re Me ta kẹ ovwan na, ovwan ogborhugborho.

¹⁵ Vwẹ Ọnana kọye Me vwọ davwe ovwan ni: vwẹ ogangan ri Fero, ovwan che kpo nẹ etinẹ-ẹ jokpa nẹ ovwan reyọ omoni rẹ ovwan rẹ otete ejobi na rhe etinẹ.

¹⁶ We ji ohwo ọvo vwẹ usun rẹ ovwan, rere ọ ra reyọ omoni rẹ ovwan na rhe, jẹn ovwan ri chekọ uwodi, kọna e vwo vughe uyota rẹ ovwan, sẹ ovwan ghine ihwo uyota, ọ rha dia ọtiọye-e, vwẹ ogangan ri Fero, o muẹro nẹ ogborhugborho ovwan ruẹ.

¹⁷ O de mu ayen phihọ uwodi ẹdẹ erha.

¹⁸ Vwẹ ẹdẹ rẹ erha Josẹf da ta kẹ ayen, Ru Ọnana re ovwan rhọ, kidie Me djẹ oshọ rẹ Ọghẹnẹ:

¹⁹ ọ da dianẹ ovwan ghine ihwo rẹ uyota, we gbe jẹn ọvo vwẹ usun rẹ imoni rẹ ovwan na vwo vwẹ uwodi na, rere iri chekọ kpo re ayen ghwa eka rhe ekru rẹ ovwan rẹ owẹvwe hwe vwẹ obo uwevwi,

²⁰ re wa reyọ oniọvo rẹ ovwan rẹ otete na rhe vwe; kọye ota rẹ ovwan vwo muẹro, we gbi rhe ghwu-u. Ayen de ru ọtiọye.

²¹ Etiyin ayen da ta kẹ ohwohwo, Vwẹ ọrẹ uyota, avwanre riabe rẹ ọmọsẹ rẹ avwanre na, kidie avwanre mrẹ uvwerhe rẹ udu rọye, ọke rọ vwọ rẹ, avwanre kerhọ-ọ, fiki rẹ ọtiọye na ihri rẹ eku rọ viẹre na kọye a na mie avwanre na.

²² Rubẹn da kpahe kẹ ayen, Me ta kẹ ovwan dẹrhẹye nu we ruẹ umwemwu kpahe ọmọ na-a? Ẹkẹvuọvo wa davwerhọ-ọ. Etinẹ na ihri rẹ ọbara rọye kọye a ria mie avwanre na.

²³ Ayen rha riẹn ni Josẹf nyo obo rẹ ayen ta na-a, kidie tanumeta uvwre rayen.

²⁴ O de chuko ku ayen ọ da viẹ, ro vwo rhivwi rhe ọ da ta ota kẹ ayen. Ọ da reyọ Simiọn ọ da gba vwẹ irharo rayen.

Iniọvo ri Josẹf Rhivwi kpo Kenan

²⁵ Josẹf da ta kẹ emọ nẹ a ghwẹ eka vọ ebo rayen, re ji kru igho rayen phihọ ebo kẹ ayen, ra je vwẹ emu kẹ ayen re ayen re vwẹ idjerhe. E de ru Ọnana kẹ ayen.

²⁶ Ayen de kru eghwa rẹ eka nyẹ ekẹtẹkẹtẹ rayen, ayen da yanran.

²⁷ Rẹ ọvo vwọ rhan unu rẹ ebo rọye re ọ vwẹ emu kẹ ekẹtẹkẹtẹ rọye vwẹ asan re de muerhọ, ọ da mrẹ igho rọye vwẹ unu rẹ ebo rọye.

²⁸ Ọ da ta kẹ emesẹ rọye, A rhoma kru igho mẹ phihọ unu rẹ ebo mẹ. Rẹ ayen vwo nyo Ọnana, ọfiavwe da fiavwe ayen, ayen ke phariẹ kẹ ohwohwo, tanẹ, Ọna kidie Ọghẹnẹ rhi ru kẹ avwanre na?

²⁹ Ọke rẹ ayen rhi vwo te uwevwi ra vwa ọsẹ rayen Jekọp vwẹ otọ ri Kenan, ayen de gbe ikun rẹ obo re phia kẹ ayen ejobi kẹ, tanẹ,

³⁰ Ohwo na, ọrovwori rẹ otọ na, ọ ta ota gbaegbae vwọ kẹ avwanre, ọ da vwẹ avwanre roro igborhugborho re rhe mrẹ ẹba rẹ otọ na.

³¹ Ẹkẹvuọvo avwanre da ta kẹ, Avwanre ihwo rẹ uyota, avwanre dia igborhugborho-o;

³² avwanre emesẹ ihwivẹ, emọ rẹ ọsẹ rẹ avwanre, ọvo gbe herọ-ọ ọrẹ otete vẹ ọsẹ rẹ avwanre obo otọ ri Kenan nonẹ na.

³³ Etiyin ohwo na, ọrovwori rẹ otọ na, da ta kẹ avwanre, Ọnana kọye Me vwọ riẹn nẹ ovwan omamọ rẹ ihwo rẹ uyota; wan yan jẹn ọvo rẹ emesẹ rẹ ovwan na vwo kẹ vwẹ, re wa reyọ eka rhe ekru rẹ ovwan rẹ owẹvwe hwe, re wa yanran.

³⁴ Reyọ omoni rẹ ovwan rẹ otete na rhe vwe, ke Me mrẹ vughe nẹ ovwan dia igborhugborho ẹkẹvuọvo ihwo rẹ uyota we ruẹ, ki mi siobọ nẹ ọmọsẹ rẹ ovwan, ku wa cho eki vwẹ otọ na.

³⁵ Rẹ ayen vwo ku eghwa nẹ ebo na, nighe dohwo dọko rẹ igho rọye evun rẹ ebo rọye, te ayen te ọsẹ rayen vwọ mrẹ ọko rẹ igho rayen o de gbe ayen unu.

³⁶ Jekọp rẹ ọsẹ rayen da ta kẹ ayen, We rhe mie vwe emọ mẹ hwere: Josẹf gbe herọ-ọ, Simiọn gbe herọ-ọ, ovwan nẹ wa jẹn reyọ Bẹnjamin; enana ejobi kẹ omẹvwẹ emiavwa na.

³⁷ Rubẹn da ta kẹ ọsẹ rọye, Hwe emọ mẹ ivẹ suọ ọ da dianẹ Me gbe sa reyọ rhe we-e; phio phihọ obọ mẹ, ki mi vwo rhe we.

³⁸ Ẹkẹvuọvo ọ da ta, Ọmọ mẹ che nene ovwan ra-a, kidie oniọvo rọye ghwuru, kẹ ọye ọvo ri chekọ. Emu de ruo vwẹ oyan rẹ ovwan cha ra na, ku wa reyọ ovwẹ vẹ esha vẹ uvweri rhi kpo ushi.