Jẹnẹsis 41 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Josẹf fan otọ re Evwerhẹ ri Fero

¹ Rẹ ikpe ivẹ soso vwọ wan nu, Fero da vwerhẹ evwerhẹ nẹ ọye de mudia orhoma rọ urhie ri Nile,

² o vwo ni, irhuẹn ighwrẹ sọkọ sọkọ tubie tubie de nẹ evun rẹ urhie na rhe, kẹ ayen ria ẹgo rẹ oma rẹ urhie na.

³ O rhe vwo ni, irhuẹn ighwrẹ efa dọndọn grosi da vwọ kpahe ayen nẹ evun rẹ urhie na rhe, ayen de mudia kẹrẹ irhuẹn ri chekọ na vwẹ orhoma rẹ urhie na.

⁴ Irhuẹn re dọndọn grosi na de mu iride tubie tubie na rọ. Fero de gbunie rhọvwọ.

⁵ O de sheruo ovwerhẹ o da vwerhẹ evwerhẹ obo rivẹ; o vwo ni, eduru rẹ eka ighwrẹ gbuke yoyovwi, da djẹ vwẹ ugbẹn rẹ ọka ọvo.

⁶ Mi rhe vwo ni, eduru rẹ eka ighwrẹ re vwara ẹbe gẹngẹn rẹ odju bẹre de rhe mu kpahe erẹ ẹsosuọ na.

⁷ Ere pha gẹngẹn na de mu ighwrẹ re pha gbuke na rọ Fero da rhọvwọ rhe,

⁸ Rẹ ọke vwo rhie re, udu ko bro, o de re se ẹboepha rẹ Ijipt ejobi kugbe ebuiroro ejobi, Fero da ta evwerhẹ na vwọ kẹ ayen, ẹkẹvuọvo a mrẹ ohwo ọvuọvo rọ sa fan otọ rọye ki Fero-o.

⁹ Etiyin onotu rẹ omuidi na da ta ki Fero, Me karophihọ obrabra mẹ nonẹ na.

¹⁰ Ọke rẹ ivun vwo miovwo Fero kpahe idibo rọye, ro vwo mu vwe vẹ onotu rẹ ọkakemu phihọ uwodi vwẹ obo uwevwi rẹ onotu rẹ idugbu na,

¹¹ avwanre da vwerhẹ evwerhẹ vwẹ ason ọvuọvo na, te ọye te omẹvwẹ, dohwo devwerhẹ rọye dohwo dotọ rọye.

¹² Emeghene ri Hibru rọ vẹ avwanre gba Etiyin na, odibo rẹ onotu rẹ idugbu na; ọke rẹ avwanre vwọ ta evwerhẹ na kẹ re, ọ da fan otọ rẹ evwerhẹ na kẹ avwanre, dohwo dotọ rọye kirobo rẹ evwerhẹ na epha.

¹³ Kirobo rọ fan otọ rẹ evwerhẹ na kẹ avwanre te eriyin ọ wanre; a rhoma reyọ ovwẹ vwo kpo ako re iruo mẹ, onotu rẹ ọkakemu na e de churo si.

¹⁴ Etiyin Fero de ji ikọ re se Josẹf, e de sio nẹ emwa na kpata kpata; rọ vwọ wanre etọ rọye nu ro vwo wene amwa rọye nu, o de rhi mudia obaro ri Fero.

¹⁵ Fero da ta ki Josẹf, Me vwerhẹ evwerhẹ, a rha mrẹ ohwo ọvuọvo rọ sa fan otọ rọye-e; mi nyori nẹ a da ta evwerhẹ kẹ wẹ ku wọ sa fan otọ rọye.

¹⁶ Josẹf da kpahe ki Fero, Ọ evun mẹẹ, Ọghẹnẹ re sa fan otọ rọ gbare ki Fero.

¹⁷ Etiyin Fero da ta ki Josẹf, Nighe, vwẹ evun rẹ evwerhẹ mẹ mi de mudia vwẹ orhoma rẹ urhie ri Nile,

¹⁸ irhuẹn ighwrẹ sọkọ sọkọ tubie tubie, de nẹ evun ri Nile rhe ke ria ẹgo vwẹ oma rẹ urhie;

¹⁹ irhuẹn ighwrẹ efa dọndọn grosi, da vwọ kpahe ayen nẹ evun rẹ urhie na rhe, Me je mrẹ oghẹre tiọna vwẹ Ijipt na dẹvo-o.

²⁰ Irhuẹn ighwrẹ dọndọn grosi na de mu ere ẹsosuọ ighwrẹ na ri tubie tubie na rọ,

²¹ ẹkẹvuọvo rẹ ayen vwọ rọ ayen nu ohwo ọvuọvo sa riẹn nẹ ayen rọ aye-en, kidie ayen je pha dọndọn kirobo rẹ ayen epha jovwo. Kọye mi de gbunie rhe.

²² Me da je mrẹ vwẹ evun rẹ evwerhẹ mẹ na, eduru re eka ighwrẹ re djẹ rhe vwẹ ugbẹ ọvo, gbuke yoyovwi;

²³ eduru rẹ eka ighwrẹ efa, gẹngẹn, re vwara ẹbe, rẹ odju bẹre, ri mu kpahe ighwrẹ rẹ ẹsosuọ na,

²⁴ eduru rẹ eka re gẹngẹn na da rọ iri gbuke yoyovwi na. Me tarọ kẹ ẹboepha ejobi, ẹkẹvuọvo o vwo ohwo rọ sa fan otọ rọye kẹ vwẹ-ẹ.

²⁵ Etiyin Josẹf da ta ki Fero, Evwerhẹ ri Fero na ọvuọvo; Ọghẹnẹ vwọ phia ki Fero obo ro che ru.

²⁶ Irhuẹn ighwrẹ ri yoyovwi na eye ikpe ighwrẹ, eduru rẹ eka ighwrẹ ri yoyovwi na eye jẹ ikpe ighwrẹ; evwerhẹ na ọvuọvo

²⁷ Irhuẹn ighwrẹ re dọndọn grosi na, re vwọ kpahe ayen na eye ikpe ighwrẹ, vẹ eduru rẹ eka re gẹngẹn re vwara ẹbe na rẹ odju bẹre na, eye ikpe ighwrẹ rẹ owẹvwe

²⁸ Ọ pha kirobo re Me ta ki Fero na, Ọghẹnẹ rhe vwọ phia ki Fero obo ro che ru.

²⁹ Ikpe ighwrẹ rẹ ororo cha rhe vwẹ otọ rẹ Ijipt na ejobi,

³⁰ ẹkẹvuọvo ororo na de notọ nu ikpe ighwrẹ rẹ owẹvwe kọ cha rhe, okuvwe na ejobi ke cha chọẹro vwẹ otọ rẹ Ijipt na, owẹvwe na fi gangan vwẹ otọ na,

³¹ ororo na a gbe karophihọ-ọ fiki re owẹvwe ọgangan ro che nene na, kidie ọ cha gan gangan.

³² Evwerhẹ na rẹ ọhwọhwọ ivẹ na dje phia nẹ Ọghẹnẹ bru ẹdẹ na nure, Ọghẹnẹ kọ cha vwọ phia nanana.

³³ Ọtiọye na e gbe ji Fero sanọ ohwo rọ ghwanre vẹ ọhọ, rere o vwo mu vwẹ Ijipt na ejobi.

³⁴ E gbe ji Fero vwẹ ilori mu buebu vwẹ otọ na, rere e toro ẹko-uri rẹ obo re vuru nẹ otọ rẹ Ijipt na rhe vwẹ ọke rẹ ikpe ighwrẹ rẹ ororo na.

³⁵ Ja ghwẹ emu nana re toro cha na ejobi koko vwẹ ọgangan ri Fero, vwẹ orere ọvuọvo, rere a sẹro rayen.

³⁶ Rere a sẹro rẹ emu na koko vwọ hẹrhẹ ikpe ighwrẹ rẹ owẹvwe ro che fi vwẹ Ijipt na, rere owẹvwe vwo jẹn ihwo na ehwe ghwẹ vwe evun rẹ otọ na.

A vwi Josẹf ru Osun vwẹ Ijipt

³⁷ Iroro nana de shephihọ ki Fero vẹ idibo rọye ejobi.

³⁸ Fero da ta kẹ idibo rọye nẹ, Ke avwanre sa mrẹ ohwo ọtiọnana, re erhi rẹ Ọghẹnẹ rheri?

³⁹ Kọye Fero da ta ki Josẹf, Rẹ Ọghẹnẹ vwọ vwẹ emu na ejobi phia kẹ wẹ na, o rhe vwo ohwo ọvuọvo rọ ghwanre no wẹ-ẹ;

⁴⁰ ko wẹ re cha dia enu rẹ uwevwi mẹ, ihwo mẹ ke vwẹ oma kpotọ kẹ wẹ sun, jokpa rẹ obo ekete mẹ Me da rho nọ wẹ.

⁴¹ Fero da ta ki Josẹf, Nighe, Me vwẹ owẹ mu osun vwẹ otọ rẹ Ijipt.

⁴² Etiyin Fero da ghwiẹ isa nẹ obo rọye o de kuo phihọ obo ri Josẹf, o de ku adagba ọfuanfon phihọ oma, o de ku ọjọnrọn re oro phihọ ohọre;

⁴³ ọ da vwẹ idjighere rọye rivẹ kẹ nẹ ọgua, ayen de ghwoghwo nẹ, We shiguẹ. Enẹ a vwi Josẹf mu vwẹ enu rẹ Ijipt.

⁴⁴ Ọfa, Fero da ta ki Josẹf, Mẹvwẹ Fero, ẹkẹvuọvo wọ rha rhọvwe-e ohwo ọvuọvo rha sa kpare obọ eye owọ vwẹ otọ rẹ Ijipt na-a.

⁴⁵ Fero de se odẹ ri Josẹf Zafenatapanea; ọ da vwẹ Asenat, rẹ ọmọtẹ ri Potifera orherẹ ri On vwọ kẹ nẹ ọ vwọ rọvwọ. Kọye Josẹf de ki otọ rẹ Ijipt ejobi duvwu.

⁴⁶ Ikpe ọgban Josẹf teri ọke rọ vwọ ro iruo ri Fero ovie rẹ Ijipt. Josẹf da yan nẹ obaro ri Fero, o de ki otọ rẹ Ijipt na ejobi duvwu.

⁴⁷ Vwẹ ikpe ighwrẹ rẹ ororo na otọ na de yovwi emu gangan,

⁴⁸ o de koko emu vwẹ ikpe ighwrẹ rẹ ororo na vwẹ otọ rẹ Ijipt na ejobi, o de koko emu vwẹ irere na ejobi; a da ghwẹ emu na nẹ idju re riariẹ orere ọvuọvo na rhi koko.

⁴⁹ Josẹf de koko eka buebu gbidi kiri ehavwo rẹ urhie, o rhi te ukuko na a gbe sa vwavwe aye-en, kidie ibunọ.

⁵⁰ Tavwe rẹ ikpe rẹ owẹvwe na ki rhi te, Josẹf vwiẹ emeshare ivẹ nure, rẹ Asenat, rẹ ọmọtẹ ri Potifera rẹ orhere ri On, vwiẹ kẹ.

⁵¹ Josẹf de se odẹ rẹ ọwanra rọye na Manasse, Kidie, ọ tare nẹ, Ọghẹnẹ nẹrhẹ oja mẹ ejobi kugbe uwevwi mẹ chọ ovwẹ ẹro.

⁵² Odẹ rẹ ọrivẹ o de se Ifrem, Kidie Ọghẹnẹ ru vwe phihọ ọmiọvwọ vwẹ otọ rẹ ukpokpogho mẹ.

⁵³ Ikpe ighwrẹ rẹ ororo na da rhe gba vwẹ otọ rẹ Ijipt na;

⁵⁴ ikpe ighwrẹ rẹ owẹvwe na ra rhẹrẹ cha, kirobo ri Josẹf tare. Owẹvwe de rhi fi vwẹ irere efa, ẹkẹvuọvo emuọre da rhe vọn otọ rẹ Ijipt.

⁵⁵ Ọke rẹ emuọre rẹ otọ rẹ Ijipt ejobi vwo re nu, ihwo na ejobi ki brenu rẹ emu hwe Fero, Fero da ta kẹ ihwo rẹ Ijipt, We bru Josẹf ra; obo rọ ta kẹ ovwan, we ru.

⁵⁶ Ọke rẹ owẹvwe na rhi vwo fi ruo otọ na ejobi re, Josẹf de rhie evun rọye ejobi phihọ, ọ da shẹ emu kẹ ihwo rẹ Ijipt, fikiridie owẹvwe na ganre vwẹ otọ rẹ Ijipt na gangan.

⁵⁷ Ọrọmarho, ihwo rẹ akpọ na ejobi de kpo Ijipt bru Josẹf ra dẹ ọka, kidie owẹvwe na pha gangan vwẹ akpọ na ejobi.