Jẹnẹsis 40 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Josẹf fan otọ rẹ Evwerhẹ rẹ Ohwo ra Kanre na

¹ Ọmọke vwọ wanre, omuidi rẹ ovie rẹ Ijipt kugbe okakemu rọye da chọ urhi rẹ ọrovwayen ovie rẹ Ijipt na.

² Ivun de miovwo Fero kpahe inotu rọye ivẹ na, omuidi na kugbe okakemu na,

³ o de mu ayen phihọ uwodi vwẹ uwevwi rẹ onotu rẹ idugbu na, vwẹ evun rẹ uwodi re ji mu Josẹf phihọ na.

⁴ Onotu rẹ idugbu na da vwẹ ayen kẹ Josẹf, kọye vwẹ ẹro te ayen; ayen da rhe dia uwodi na emerha.

⁵ Ason ọvo ayen ivẹ na da vwerhẹ evwerhẹ–omuidi na kugbe okakemu na rẹ ovie rẹ Ijipt re mu phihọ uwodi na, dohwo devwerhẹ rọye, dohwo dotọ rọye.

⁶ Ri Josẹf vwo bru ayen rhe irhiọke re mrẹ ayen, ayen de muomahọ.

⁷ Ọ da nọ inotu ri Fero na re mu phihọ uwodi vwẹ uwevwi rẹ onini rọye na, Die nẹrhẹ ovwan muomahọ nonẹ?

⁸ Ayen da ta kẹ, Avwanre vwerhẹ evwerhẹ, a rha mrẹ ohwo rọ faotọ rọye kẹ avwanre-e. Josẹf da ta kẹ ayen; Ọ dia Ọghẹnẹ re faotọ rẹ evwerhẹ? Gba ta kẹ vwẹ, Me rẹ wẹ.

⁹ Kọye omuidi na da ta evwerhẹ rọye ki Josẹf, ọ da ta kẹ, Vwẹ evwerhẹ mẹ na urhe ri vain da obaro Me,

¹⁰ vwẹ enu ri vain na eghọn erha da herọ; rọ ghwa vwọ kpa ipho na, ọ da ghwa mọ ibi, siẹvuọvo na ibi na da ghwa vware.

¹¹ Yẹ uko ri Fero rhe vwe obọ; Me da reyọ otie na mi de mi ayen phihọ uko ri Fero na, mi de mu uko na phihọ obọ ri Fero.

¹² Etiyin Josẹf da ta kẹ, Ọnana otọ rọye: eghọn erha na eye ẹdẹ erha;

¹³ vwẹ evun rẹ ẹdẹ erha na Fero kọ kpare uyovwi wẹn kpenu kọ rhoma phi we phihọ edia wẹn, ku wo mu uko phihọ obọ ri Fero kirobo ri wo ruẹ jovwo, ọke ru wọ vwọ omuidi rọye.

¹⁴ Ẹkẹvuọvo karo ovwẹ, ọke ro de yovwi kẹ wẹ, re wo ji ru ẹse na kẹ vwẹ, Me rẹ wẹ, re wọ fan odẹ mẹ ki Fero, re o si vwẹ nẹ uwevwi nana.

¹⁵ Kidie vwẹ uyota e cho vwe nẹ otọ ri Hibru rhe; vwẹ obonẹ na mi ji ru emu rọ chọre re vwo mu vwe phihọ evun rẹ ẹmwa na-a.

¹⁶ Ọke rẹ olori rẹ ekakemu na vwọ mrẹ nẹ ọ fan otọ rọye yoyovwi, ọ da ta ki Josẹf, Me je vwerhẹ evwerhẹ rhe: ibere rẹ ikara erha da enu rẹ uyovwi mẹ,

¹⁷ ọ rọ ka obenu ejobi da vọn vẹ emu ra kakere ki Fero, ẹkẹvuọvo ephran ke sohrọ ria vwẹ enu rẹ uyovwi mẹ.

¹⁸ Josẹf da kpahe, Ọnana ye otọ rọye: ibere erha eye ẹdẹ erha;

¹⁹ vwẹ evun rẹ ẹdẹ rẹ erha na Fero kọ kpare uyovwi wẹn nu we oma; ko churu we si urhe; ephran ke cha sohrọ uvwo wẹn re.

²⁰ Vwẹ ẹdẹ rẹ erha, rọ dia eduvwiẹ ri Fero, o de chere emu kẹ idibo rọye ejobi, ọ da kpare uyovwi rẹ onotu rẹ omuidi na kpenu kugbe uyovwi rẹ onotu rọ kakemu na kpenu vwẹ usun rẹ idibo rọye na.

²¹ Ọ da rhoma reyọ onotu rẹ omuidi na phihọ ako rẹ iruo rọye o de mu uko phihọ obọ ri Fero,

²² ẹkẹvuọvo o de churu onotu rọ kakemu na si, kirobo ri Josẹf fan otọ rẹ evwerhẹ na kẹ ayen.

²³ Yẹ ẹkẹvuọvo onotu rẹ omuidi na gbe sa karophihọ Josẹfu-u, o da chọẹro.