Jẹnẹsis 4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ken kugbe Ebẹl

¹ Vwẹ ọke nana Adam da rhe riẹn aye rọye Ivi, ọ da mrevun o de vwiẹ Ken, tanẹ, Mi vwiẹ ohwo vwẹ ọchuko rẹ Ọrovwohwo.

² Obọ rivẹ o de vwiẹ oniọvo rọye Ebẹl. Ebẹl na kẹ igodẹ ochurẹ, Ken otọ kọye o voro.

³ Rẹ ọke rhi vwo tere Ken da reyọ izobo rẹ emamọ rẹ otọ na vwo rhe Ọrovwohwo.

⁴ Ebẹl da je vwẹ izobo rẹ upene rẹ uchuru rọye rọ pha sọkọ sọkọ vwo rhe Ọrovwohwo. Ọrovwohwo de mu ọghọ kẹ izobo rẹ Ebẹl,

⁵ ẹkẹvuọvo ọ ri Ken o de no saka. Ivun de miovwi Ken gangan o de mu opharo phihọ.

⁶ Ọrovwohwo da ta kẹ Ken, Die ivun vwo miovwo uwe, rẹ opharo wẹn vwọ dia tughẹ?

⁷ Wọ riẹn ru nọ, ọ gbe rha jẹn wẹ reyọ? Wọ rha riẹn ru-u na, umwemwu fiọko vwọ anurhoro wẹn, wẹwẹ ọ guọnọ reyọ ẹkẹvuọvo pharhe wo phio kparobọ.

⁸ Ken da ta kẹ Ebẹl rẹ oniọvo rọye nẹ, Gbe jẹ avwanre kpo obo aghwa. Rẹ ayen vwọ obo aghwa re, Ken da vwọ so oniọvo rọye Ebẹl o de hwe ghwu.

⁹ Etiyin Ọrovwohwo da ta kẹ Ken, Tivọ Ebẹl rẹ oniọvo wẹn epha? Ọ da ta, Me riẹnre-e, mẹvwẹ re sẹro rẹ oniọvo mẹ?

¹⁰ Ọrovwohwo da ta, Die kọye wo ruru na? Urhuru rẹ ọbara rẹ oniọvo wẹn kperi nẹ otọ bru vwe rhe.

¹¹ Vwẹ enẹna a harhe owẹ eka nẹ otọ na rhe, ọto rhie unu rọye vwọ da ọbara rẹ oniọvo wẹn mie we.

¹² Wo de voro otọ na, o gbi che yovwi emu kẹ wẹ-ẹ, ku wọ dia ọvwisusu kugbe osoghoro vwẹ evun rẹ akpọ na.

¹³ Ken da ta kẹ Ọrovwohwo, Oja mẹ ọ rhonọ obo ri mi se chiri.

¹⁴ Nighe wọ djẹ vwẹ nonẹ na vwo nẹ otọ na re, Me da mrẹ opharo wẹn ki mi sioma nẹ, ke Me dia ọvwisusu kugbe osoghoro vwẹ evun rẹ akpọ na, ohwo kohwo rọ mrẹ vwẹ ejobi ko hwe vwe.

¹⁵ Ọrovwohwo da ta kẹ nẹ, Ọ dia eriyi-in, ọ da dianẹ ohwo hwe Ken, ka re ihri akueghwrẹ vwẹ obọ rọye Ọrovwohwo da ka oka vwọi Ken, rere ohwo rọ mrẹrẹ vwo je hwe.

¹⁶ Ken da yan nẹ obaro rẹ Ọrovwohwo, ọ da ra dia otọ ri Nọd, vwẹ obọrhe rẹ Idẹn

Uvwiẹ rẹ Ken

¹⁷ Ken da riẹn aye rọye, ọ da mrevun o de vwiẹ Inọk, ọ da fan orere, o de mu odẹ rẹ ọmọ rọye se, Inọk.

¹⁸ Inọk de vwiẹ Irad, Irad kọye ọsẹ ri Mẹhujael, Mẹhujael kọye ọsẹ ri Mẹtushẹl, Mẹtushẹl kọye ọsẹ ri Lamẹk

¹⁹ Lamẹk da reyọ eya ivẹ, odẹ rẹ ọvo kẹ Ada, odẹ rẹ ọrivẹ ki Zila

²⁰ Ada de vwiẹ Jabal, ọye ọsẹ rẹ ihwo re dia utughẹ ri ji churu uchuru.

²¹ Odẹ rẹ oniọvo rọye ki Jubal, kọye rha ọsẹ rẹ ihwo ri hworo isorogu vẹ owanre.

²² Zila de vwiẹ Tubal-Ken; kọye ogun ro duvwu erọvwo kugbe utehru Oniọvo ri Tubal-Ken rẹ ọmọtẹ ki Naama.

²³ Lamẹk da ta kẹ eya rọye: Ada vi Zila nyo urhuru mẹ, ovwan eya ri Lamẹk kerhọ rẹ obo re Me ta. Mi hwe ohwo rọ wan vwẹ oma, emeghene rọ ghwiẹ vwẹ.

²⁴ A da re ihri ri Ken akueghwrẹ, uyota ọ ri Lamẹk kẹ ujorha gbe ihwe akueghwrẹ.

Uvwiẹ ri Sẹt

²⁵ Adam da rhoma riẹn aye rọye, o de vwiẹ ọmọshare o de se odẹ rọye Sẹt, kidie ọ tare nẹ, Ọghẹnẹ kẹ vwẹ ohwo ọfa vwẹ ẹdia rẹ Ebẹl ri Ken hweri.

²⁶ Sẹt de rhe vwiẹ ọshare re se odẹ rọye Inọsh. Vwẹ ọke yena yẹ ihwo ghwe mu odẹ rẹ Ọghẹnẹ ese obọ.