Jẹnẹsis 39 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Josẹf kugbe Aye ri Potifa

¹ Vwẹ ọke nana a da reyọ Josẹf vwo kpo Ijipt, kọye Potifa, onotu ri Fero, olori rẹ ihwo re rhẹrẹ, okpuyovwi rọye ohwo rẹ Ijipt, da dẹ mie ihwo rẹ Ishmael ri ghoro rhe.

² Ọrovwohwo vi Josẹf herọ, ọ da rhe dia omamọ rẹ ohwo kẹ uwevwi rẹ onini rọye rẹ ohwo rẹ Ijipt na.

³ Onini rọye da mrẹ vughe nẹ Ọrovwohwo vọye herọ, nẹ Ọrovwohwo re jabọ rẹ obo rọye ruẹ ejobi vwo yovwi kẹ.

⁴ Kọye ọ da vwẹ aruesiri vwo ni Josẹf ọ da vwẹ ẹro te, o de vwo mu osun rẹ uwevwi rọye kugbe emu ro vwori ejobi.

⁵ Ghwe ne ọke re vwo mu osun rẹ uwevwi rọye kugbe obo ro vwori ejobi, Ọrovwohwo de bruphihọ uwevwi rẹ ohwo rẹ Ijipt na fiki ri Josẹf, ebruphihọ rẹ Ọrovwohwo da enu rẹ emu ro vwori ejobi, te uwevwi te ẹghwa.

⁶ Kọye ọ da yan jobo ro vwori ejobi vwo ki Josẹf, ro vwo jẹn ayen vwo kẹ nu ọ gbe ro ẹnwa rẹ emuọvo jokpa re obo rọ ria ọvo. Josẹf re dje na ohwo erhuvwu gangan.

⁷ Ọmọke vwọ wan nure aye rẹ onini rọye na kọ vwẹ ẹro guọnọ Josẹf, ọ da ta, Mọ ra vwerhẹ.

⁸ Ẹkẹvuọvo ọ da se ọ da ta kẹ aye rẹ onini rọye na, Nighe, Me vwọ herọ na onini mẹ gbe ro ẹnwa rẹ emuọvo-o, o de phi kemu kemu na ejobi phihọ ovwẹ obọ.

⁹ Ọ rhonọ vwẹ vwẹ uwevwi na-a, eyẹ o si emuọvo nu kẹ vwẹ-ẹ jokpa wẹ ọvo, fikiridie wẹ aye rọye, komavọ mi ru emu ọbrabra nana, ri mi ru umwemwu kpahe Ọghẹnẹ.

¹⁰ Dede na ọ ta ki Josẹf kẹdẹ kẹdẹ na, jẹn ọ davwerhọ rọye-e, ro vwo nene shevwerhẹ eyẹ ro vwo si kẹrẹ-ẹ.

¹¹ Ẹkẹvuọvo ẹdẹ ọvo, ri Josẹf vwọ ro uwevwi re ru iruo re jẹn ohwo ọvuọvo uwevwi-i.

¹² O de shabọ phihọ ewun rọye, tanẹ, Mọ ra vwerhẹ Ẹkẹvuọvo ọ da djẹ je ewun rọye vwo kẹ, ọ da djẹ ro otafe nẹ evun rẹ uwevwi na.

¹³ Rọ vwọ mrẹ nẹ Josẹf djẹ jẹ ewun rọye vwo kẹ rọ da dje ro otafe,

¹⁴ o de se ihwo rẹ uwevwi na rhe ọ da ta kẹ ayen, No, ọshare mẹ reyọ ohwo ri Hibru rhe ohri rẹ avwanre re ọ rhe phọphọ avwanre; o de bru vwe rhe ri sherhẹ, Mi de kperi gangan,

¹⁵ ọke ro vwo nyo nẹ mi bunu, ọ da yan jẹ ewun rọye vwo kẹ vwẹ, ọ da djẹ nẹ uwevwi ro otafe.

¹⁶ O de si ewun na nu bẹsiẹ rẹ onini rọye vwọ rhe uwevwi,

¹⁷ o de gbe ikun ọvuọvo na kẹ tanẹ, Odibo rẹ ohwo ri Hibru ru wọ reyọ rhe ohri rẹ avwanre, o de bru vwe rhe re phọphọ ovwẹ;

¹⁸ Ẹkẹvuọvo Me ghwa vwọ kpare urhuru mi che vwo bunu, ọ da yan je ewun rọye vwo kẹ vwẹ, ọ da djẹ ruafe.

¹⁹ Ọke rẹ onini rọye vwo nyo eta rẹ aye rọye ta kẹ, Ọnana obo rẹ odibo wẹn phọphọ ovwẹ, ophu de muo gangan.

²⁰ Onini ri Josẹf ghwa reyọ o de re muo phihọ uwodi, asan ra da karọ ekru rẹ ovie, kẹ Etiyin a kaerọ phihọ.

²¹ Ẹkẹvuọvo Ọrovwohwo vi Josẹf herọ ivun rọye da vwerhọ, ọ da vwẹ aruesiri kẹ vwẹ obaro rẹ olori rẹ uwodi na.

²² Olori rẹ uwodi na da vwi kemu kemu rẹ uwodi na ejobi te ihwo vwọ kẹ Josẹf yọnre, obo re ruru ejobi ọye ri ru ayen.

²³ Olori rẹ uwodi na rha davwerhọ rẹ obo ra vwọ kẹ Josẹf yọnre na-a, kidie Ọrovwohwo vọye herọ; kemu kemu ro ruru ejobi, Ọrovwohwo da nẹrhẹ oyovwi.