Jẹnẹsis 38 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Juda kugbe Tamar

¹ Vwẹ ọke yena Juda de vrẹn nẹ asan rẹ imoni rọye epha, ọ da vwẹriẹ asan rẹ ohwo rẹ Adulam ọvo, re se odẹ rọye Hirah.

² Etiyin Juda da mrẹ ọmọtẹ rẹ ohwo ri Kenan ọvo re se odẹ rọye Shua, ọ da rọvwọ ọ vọye da mroma,

³ ọ da mrevun o de vwiẹ ọmọshare, o de se odẹ rọye Ẹr.

⁴ Ọ da rhoma mrevun o de vwiẹ ọshare ọfa, o de se odẹ rọye Ọnan.

⁵ Ọ da rhoma vwiẹ ọshare ọfa, o de se odẹ rọye Shelah. Chezib ọ epha ọke ro vwo vwiẹ.

⁶ Juda da reyọ aye vwọ kẹ Ẹr rẹ ọwanra rọye re se Tamar.

⁷ Ẹkẹvuọvo Ẹr rẹ ọwanra ri Juda, da dia ohwo umwemwu vwẹ obaro rẹ Ọrovwohwo; Ọrovwohwo de hwe.

⁸ Etiyin Juda da ta kẹ Ọnan, Bru aye rẹ oniọvo wẹ na ra, ru wo ru obo re ruẹ ke aye re oniọvo kẹ, rere wo vwiẹ ọmọ kẹ oniọvo wẹn.

⁹ Ẹkẹvuọvo Ọnan riẹnre nẹ ọmọ na cha dia ọrọye-e; kọye ro vwo nene aye rẹ oniọvo rọye na mroma re, o de hwẹ ameoma na kufia rere aye re oniọvo rọye na vwo je vwiẹ.

¹⁰ Obo ro ruru na da bra vwẹ obaro rẹ Ọrovwohwo, Etiyin ọ da je teyọ hwe.

¹¹ Etiyin Juda da ta kẹ aye re ọmọ rọye na Tamar ne, Gba dia ayeuku vwẹ uwevwi rẹ ọsẹ wẹn bẹsiẹ ri Shelah rẹ ọmọ mẹ vwọ ghwanre–kidie oshọ muro nẹ o de rhe ghwu ọboba kiri iniọvo rọye. Kọye Tamar da ra dia uwevwi rẹ ọsẹ rọye.

¹² Emerha aye ri Juda, rẹ ọmọtẹ ri Shua, de ghwu, ọke rẹ ẹro vwọ hiẹ Juda nure, o de kpo Timnah ra mrẹ ihwo re bọrọ igodẹ rọye, te ọye te ugbeyan rọye Hirah rẹ ohwo rẹ Adulam.

¹³ Ra vwọ ta ki Tamar nẹ, Ọsọrọvwe wẹn yanran kpo Timnah ra bọrọ igodẹ,

¹⁴ ọ da ghwiẹ iwun rẹ uvweri rọye nu, ọ da vwẹ oga vwo rhurhu, ọ da vwẹ emwa kroma, o de tidia unu rẹ egodo rọ Enaim rọ idjerhe ra wan kpo Timnah, kidie ọ mrẹre nẹ Shelah ghwaire, yẹ a je vwẹ ọye kẹ vwọ rọvwọ-ọ.

¹⁵ Ọke ri Juda vwọ mrẹ o de vwo roro igberadja, kidie ọ vwẹ oga rhurhu opharo.

¹⁶ Ọ da yanran bro kpo abọ rivẹ rẹ idjerhe na, ọ da ta kẹ, Yanrhe re Me vowẹ ruemu, kidie ọ rha riẹn nẹ aye rẹ ọmọ rọye-e. Ọ da ta, kidie wọ vwọ kẹ vwẹ, ri wo ki nene uvwe ruemu?

¹⁷ Ọ da kpahe, Mi mu ẹmẹvwe nẹ usun rẹ uchuru mẹ na rhe we. Ọ da ta, Ku wọ vwẹ emu viẹnwa kẹ vwẹ, bẹsiẹ wo vwo muo rhe?

¹⁸ Ọ da ta, Ki didi emu mi vwo viẹnwa kẹ wẹ? Ọ da kpahe, Isa wẹn kugbe eme wẹn, kugbe ọkpọ wẹn ro rhe we obọ na. Etiyin ọ da vwẹ ayen kẹ, ọ vọye da mroma, ọ da ghwa mrevun.

¹⁹ Etiyin o vrẹnri ọ da yanran, ọ ghwiẹ oga na nu o de ku iwun rẹ uvweri rọye phihọ.

²⁰ Ri Juda vwọ reyọ ẹmẹvwe na vwo rhe ugbeyan rọye rẹ ohwo rẹ Adulam na, rere ọ reyọ ekuakua ro vwo viẹnwa na mie aye na, o gbe mrẹ-ẹ.

²¹ Ọ da nọ ihwo rẹ asan na nẹ, Kẹ igberadja rọ Enaim na rhọ rọ oma rẹ idjerhe na? Ayen da tanẹ, Igberadja ọvuọvo etinẹ-ẹ.

²² O de rhivwi bru Juda, ọ da ta, Me mrẹrẹ-ẹ, ihwo rẹ asan na je tanẹ, Igberadja ọvuọvo etinẹ-ẹ.

²³ Juda da kpahe, E gbe jọ yọnrọn ekuakua na kẹ oma rọye, a da rha hwẹ avwanre, wọ mrẹre, Me vwẹ ẹmẹvwe na rhe, yu wọ mrẹrẹ-ẹ.

²⁴ Kirẹ emeranvwe erha ka rhe ta ki Juda nẹ, Tamar rẹ aye rẹ ọmọ wẹn gbe igberadja; kidie ọ wan igberadja na mrevun Juda da ta, Reyọ rhe rere a torhẹ hwe.

²⁵ Ra vwọ reyọ cha re, o de ji ohwo ra vuẹ ọsorọvwe rọye nẹ, Ohwo ro vwo ekuakua nana, ọye re kẹ vwẹ evun na. Ọ da ta, Vughe te, Me rẹ wẹ, ono ri vwo enana isa na, eme na kugbe ọkpọ na.

²⁶ Juda de vughe ayen ọ da ta, Ọ dia ọvwata nọ vwẹ, kidie ọ rha guakẹ vwẹ vwọ kẹ Shelaha-a. O vọye gbe mroma ọfa-a.

²⁷ Ọke rẹ uvwiẹ rọye rhi vwo te, agbava kọye evun rọye.

²⁸ Rọ vwọ chuẹ uvwiẹ re, ọvo da vwẹ obọ rhe, orhere na de churu isene muo obọ, tanẹ, Ona re ka rhe.

²⁹ Ẹkẹvuọvo ro rhe vwo si obọ reyọ, nighere oniọvo rọye de ghwe ri shotọ; ọ da ta, Didi uphrophro wọ rha rharhe kẹ oma wẹn, fiki rẹ ọtiọye na e de se odẹ rọye Pẹrẹz.

³⁰ Emerha oniọvo rọye de rhi shotọ vẹ isene re churu muo obọ e de rhe se odẹ rọye Zerah.