Jẹnẹsis 37 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Josẹf kugbe Iniọvo Rọye

¹ Jekọp da dia otọ rẹ ọsẹ rọye da ọrharha jovwo na, vwẹ otọ ri Kenan

² Ọnana kọye ikun rẹ uvwiẹ ri Jekọp. Josẹf vwọ ikpe ihwiori gbẹ ivẹ re, ko sun igodẹ rẹ ọsẹ rọye ọ vẹ imoni rọye, ọ vẹ emọ ri Bilhah kugbe Zilpah, eya rẹ ọsẹ rọye Josẹf; kọ rhia ayen vwọ kẹ ọsẹ rayen.

³ Asakiephana ivun ri Josẹf vwerha Izrẹl gangan nọ emọ rọye ri chekọ na ejobi, kidie ọye ọmọ rẹ uyovwi esha rọye, o de ko ewun ogrogro ro te abọ re kẹ.

⁴ Ẹkẹvuọvo rẹ imoni rọye ri chekọ vwọ mrẹ nẹ ivun rọye re ma vwerhe ọsẹ rayen, oma rọye ko tun ayen, ayen ke ta ota iphriphri kẹ.

⁵ Vwẹ ọke nana Josẹf da vwerhe evwerhẹ, rọ vwọ ta evwerhẹ na kẹ imoni rọye kọ rhoma tun ayen oma dududu.

⁶ Ọ da ta kẹ ayen, Wa kerhọ rẹ evwerhẹ nana re Me vwerhẹre

⁷ nighe, avwanre ke gba eka vwe obo udju, e vwo ni, erhagha rẹ ọka mẹ de vrẹn mudia goro, nighere erhagha rẹ ovwan na de rhi bi riariẹ ọ mẹ na, i de gbe uyovwi kpotọ kẹ erhagha mẹ na.

⁸ Imoni rọye da ta kẹ nẹ, Vwẹ ọ rẹ uyota na ko wẹ ri che sun avwanre? Eyẹ ko wẹ re cha re ovie vwẹ enu rẹ avwanre? Oma rọye de tun ayen phihọ fiki rẹ evwerhẹ rọye kugbe fiki rẹ eta rọye.

⁹ Ọ da rhoma vwerhe evwerhẹ ọfa, ọ da je ta kẹ imoni rọye, ọ da ta, Nighere, Me rha vwerhe evwerhẹ ọfa re, mi vwo ni, ọnre, emeranvwe, kugbe isio uhwọvo da vwẹ uyovwi te otọ kẹ vwẹ.

¹⁰ Ẹkẹvuọvo rọ vwọ ta kẹ ọsẹ rọye vẹ imoni rọye, ọsẹ rọye da ghwọ kuo, ọ da ta kẹ, Ọnana didi oka rẹ evwerhẹ wọ vwerhẹre na? Ko mẹvwẹ te oni wẹn kugbe imoni wẹn cha ghene vwẹ uyovwi te otọ ke wẹ?

¹¹ Imoni rọye ke rioma kpahọ, ẹkẹvuọvo ọsẹ rọye de phi eta na vwọ evun.

A shẹ Josẹf kpo Ijipt

¹² Vwẹ ọke nana imoni rọye da ra ghẹrẹ igodẹ vwẹ asan rọ kẹrẹ Shikẹm.

¹³ Izrẹl da ta ki Josẹf, Ọ dia imoni wẹn re ghẹrẹ igodẹ vwi Shikẹm na? Mọ ri mi ji we bru ayen ra. Ọ da ta kẹ, Mẹvwẹ na.

¹⁴ Etiyin ọ da ta kẹ, Yanran, ra mrẹ imoni wẹn sẹ oma rayen dori, te uchuru na re wọ rhe vuẹ vwẹ. Etiyin o de jo nẹ iyara ri Hebrọn, o de rhi te Shikẹm.

¹⁵ Ohwo ọvo da mrẹ ro beghe vwẹ evun rẹ ẹghwa, ohwo na da nọ, Die wọ guọnọ?

¹⁶ Me guọnọ imoni mẹ mrẹ, ọ da ta, ta kẹ vwẹ, Me rẹ wẹ, tivọ ayen da ghẹrẹ uchuru na?

¹⁷ Ohwo na da ta, Ayen yanran re, kidie mi nyori rẹ ayen vwọ tanẹ, E je kpo Dotan. Etiyin Josẹf de bresi rẹ imoni rọye, ọ da rhe mrẹ ayen vwi Dotan.

¹⁸ Ayen da kparo mrẹ vwẹ ogboko, ro ji te ayen omaa na, ayen da ghwa jẹn iroro kpahọ obo rẹ ayen ru hwe.

¹⁹ Ayen da ta kẹ ohwohwo nẹ, Ọvwerhẹ evwerhẹ na cha re.

²⁰ A mọ, re hwe re mu orivwi rọye phihọ ọgọdọ ọvo, avwanre ke tanẹ eranvwe ẹvo re djoma hwere, avwanre ke mrẹ obo rẹ evwerhẹ rọye na ru kẹ.

²¹ Ẹkẹvuọvo ọke ri Rubẹn vwo nyo, o de sivwo mie ayen tanẹ, E jẹn avwanre hwe-e

²² Rubẹn da ta kẹ ayen, Wo sun ọbara te otọ-ọ, muo phihọ ọgọdọ nana vwẹ etinẹ vwẹ evun rẹ ẹghwa na, ẹkẹvuọvo wa vwẹ obo te-e– rere ọ vwọ mrẹ asan reyọ mie ayen vwo rhe ọsẹ rọye.

²³ Kọye ri Josẹf rhi vwo te asan rẹ imoni rọye epha re, ayen da ghwiẹ ewun no oma, ewun rọye rẹ ogrogro ro te abọ re na ro ku phihọ na,

²⁴ ayen reyerọ ayen de muo phihọ ọgọdọ ọvo. Ọgọdọ na ọyaya, ame herọ-ọ.

²⁵ Ayen tidia te otọ kẹ ayen ria emu, ayen vwọ kpare opharo ayen da mrẹ usun rẹ ihwo rẹ Ishmael ri nẹ Giliad cha, vẹ usun rẹ iyesi rayen re ghwa orhọrhe, adjija, kugbe egẹ, re yanran kpo Ijipt.

²⁶ Etiyin Juda da ta kẹ imoni rọye, Didi erere ri te ohwo re de hwe omoni rẹ avwanre re de si ọbara rọye nu?

²⁷ Yanrhe, ra shẹ kẹ ihwo rẹ Ishmael, e jẹ obọ rẹ avwanre dia enu rọye-e, kidie omoni rẹ avwanre, uvwo rẹ avwanre. Ayen da reyọ ota rọye.

²⁸ Usun rẹ ihwo ri Midian ke wan vrẹn, ayen de si Josẹf nẹ ọgọdọ na rhe, ayen da she kẹ Ishmael ovwavwọn ri shẹkẹl rẹ idọnọ uje, ayen da reyọ kpo Ijipt.

²⁹ Ọke ri Rubẹn vwo rhivwi rhe asan ọgọdọ na rọ rha mrẹ Josẹf vwẹ etiyi-in, ọ da bẹre emwa rọye

³⁰ o de rhivwi bru imoni rọye, ọ da ta, Ọmọ na gbe herọ-ọ; ko mẹvwẹ, ki tivọ Me ra?

³¹ Etiyin ayen da reyọ ewun ri Josẹf, ayen de hwe ẹvwe, ayen da vwẹ ewun na gbunie ọbara na,

³² ayen da reyọ ewun ogrogro na ro te abọ re na vwo rhe ọsẹ rayen, ayen da ta, Ọna kọye avwanre mrereọ, gbe no sẹ ọna ewun rẹ ọmọ wẹn eyẹ ẹjo.

³³ O de vughe, ọ da ta, Ọnana ewun rẹ ọmọ mẹ; eranvwe rọ djoma hwere re; ọ djaghọ Josẹf djaghe djaghe nure.

³⁴ Jekọp da bẹrẹ iwun rọye, ọ da vwẹ emwa rẹ uvweri rhuo, o de muomahọ kẹ ọmọ rọye ẹdẹ buebu.

³⁵ Emeshare rọye ejobi te emetẹ de vrẹn rhi bro uche, ọ da se nẹ e bro ọye uche-e, ọ da ta, Ẹjo, Me vwẹ oma rẹ uvweri na bru ọmọ mẹ kpo erivwi. Kẹnẹ ọsẹ rọye viẹ kẹ,

³⁶ Vwẹ uvwre rẹ ọke yena ihwo ri Midian na da shẹ kpo Ijipt vwọ kẹ Potifa, onotu ri Fero, olori rẹ ihwo re rhere.