Jẹnẹsis 34 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

A reihri rẹ Ẹgua re gbe Dinah

¹ Vwẹ ọke nana Dinah rẹ ọmọtẹ ri Leah, ro vwiẹ ki Jekọp da yanran re yere eya rẹ otọ na,

² Ọke ri Shikẹm ọmọ ri Hamọr rẹ ohwo ri Hiv, osun rẹ otọ na, vwọ mrẹ, o de shabọ phihọ ọ vọye da mroma ọ da phọphọ.

³ Erhi rọye de churu mui Dinah ọmọtẹ ri Jekọp na; ivun rọye da vwerhọ ọ da ta ota dẹndẹn vwọ kẹ.

⁴ Etiyin Shikẹm da ta ota na ki Hamọr rẹ ọsẹ rọye, tanẹ, Reyọ ọmọtẹ na kẹ vwẹ vwọ rọvwọ.

⁵ Eriyin Jekọp de nyo nẹ e gbe ọmọtẹ rọye Dinah ẹgua; ẹkẹvuọvo yẹ emọ rọye vẹ uchuru na je obo ẹghwa, Jekọp de rhurhu ota na bẹsiẹ rẹ ayen vwọ rhe.

⁶ Hamọr rẹ ọsẹ ri Shikẹm de bru Jekọp rhe re vuẹ.

⁷ Emọ ri Jekọp de nẹ ẹghwa rhe, rẹ ayen vwo nyo ota na; ivun de miovwo emọ na gangan, kidie o ru emu rẹ ẹkpa vwẹ Izrẹl ro vwo nene ọmọtẹ ri Jekọp mroma, kidie a mrẹ emu ọtiọye dẹvo-o.

⁸ Ẹkẹvuọvo Hamọr de nene ayen ta ota, tanẹ, Erhi rẹ ọmọ mẹ Shikẹm churu mu ọmọtẹ wẹn na; Me rẹ wẹ, vwọ kẹ vwọ rọvwọ.

⁹ Jẹn avwanre rọvwọ kugbe; vwẹ emetẹ wẹn kẹ avwanre, rere wa reyọ emetẹ rẹ avwanre vwọ rọvwọ.

¹⁰ Nene avwanre dia etinẹ, otọ na ejobi rhie phihọ kẹ ovwan; wa dia re wa cho eki vwẹ otọ na, we vwo eyere vwọ.

¹¹ Shikẹm da ta kẹ ọsẹ rẹ ọmọtẹ na kugbe iniọvo rọye nẹ, Jẹn ivun mẹ vwerhe ovwan, kemu kemu wa nọre ejobi Me vwọ kẹ ovwan.

¹² Igho re wa guọnọre ejobi ọye mi se ru, takpe vwẹ ọmọtẹ na kẹ vwẹ vwọ rọvwọ.

¹³ Emọ ri Jekọp da vwẹ ophiẹvwe kpahe ki Shikẹm vẹ ọsẹ rọye Hamọr, kidie o gbe Dinah rẹ oniọvo rayen ẹgua.

¹⁴ Ayen da ta kẹ ayen nẹ, Avwanre se ru emu nana-a, ma sa vwẹ oniọvo rẹ avwanre kẹ upheruphee, kidie ọyena omaẹphọphọ vwọ kẹ avwanre.

¹⁵ Emu ọvuọvo kọye we ru rẹ avwanre ke rhọvwe: kẹ ovwanvwan dia kiri obo rẹ avwanre epha na kọye kọshare kọshare re ovwan ejobi kọ yanvwe.

¹⁶ Ke Me sa vwẹ emetẹ rẹ avwanre kẹ ovwan, kẹ avwanre je sa rọvwọ e re ovwan, avwanre vẹ ovwan ki yeri kugbe avwanre ejobi ke dia oma ọvo.

¹⁷ Ẹkẹvuọvo wa rha davwerhọ-ọ ru wa da yanvwe-e, kẹ avwanre reyọ ọmọtẹ rẹ avwanre, avwanre ki kpo.

¹⁸ Eta rayen da nabọ je Hamọr vẹ ọmọ rọye Shikẹm.

¹⁹ Eghene na rhe ku ọke fia rọ ke yanvwe-e, kidie ọmọtẹ ri Jekọp na jere. Kidie ọye ohwo re Me ru ọghọ kẹ vwẹ orua rayen.

²⁰ Kọye Hamọr vẹ ọmọ rọye Shikẹm de rhi te ughere rẹ orere na ayen da ta kẹ ihwo rẹ orere na nẹ,

²¹ Ihwo nana vwenẹ igbeyan rẹ avwanre; e jẹn ayen dia otọ na rẹ ayen cho eki vwọ, gbe nighe, otọ na ọ rhoro rọ sa gba ayen ejobi; e jẹn avwanre reyọ emetẹ rayen vwọ rọvwọ, re ayen je reyọ e re avwanre.

²² Jokpa rẹ Ọnana ọvo ọye ayen vẹ avwanre vwọ sa dia kugbe, rere avwanre vẹ ayen sa vwọ dia ihwo ọvo nẹ kọshare kọshare vwẹ uherevie rẹ avwanre kọ yanvwe.

²³ We rhe roro nẹ te uchuru, te eyere kugbe eranvwe rayen ejobi ke dia e re avwanre-e? Takpe avwanre vẹ ayen kuoma gbe, ke ayen nene avwanre dia.

²⁴ Ayen ihwo ri koko vwẹ ughere rẹ orere na ejobi da rhọvwe phihọ ota ri Hamọr vẹ ọmọ rọye Shikẹm; kọshare kọshare ejobi ri koko vwẹ ughere rẹ orere na da yanvwe.

²⁵ Vwẹ ẹdẹ rẹ erha, rẹ era rẹ oyanvwe na vwọ rhuerhue ku re, emọ ri Jekọp ivẹ, Simiọn vẹ Livae, iniọvo ri Dinah, da reyọ oda rayen ayen da rhe ruọ orere na ọrha, ayen da nyavwe eshare na ejobi hwe.

²⁶ Ayen da nyavwe Hamọr vẹ ọmọ rọye Shikẹm hwe, ayen da reyọ Dinah nẹ uwevwi ri Shikẹm, ayen da yanran kpo.

²⁷ Emọ ri Jekọp da hiẹ oma rẹ ihwo rẹ ayen hweri na, ayen da ghwẹ ekuakua rayen reyọ, kidie ayen gbe oniọvo rayen ẹgua.

²⁸ Ayen da reyọ ekru rẹ igodẹ kugbe uchuru rayen, iyesi kugbe kemu kemu rẹ ayen mrẹre vwẹ evun rẹ orere na, kugbe idju rayen,

²⁹ efe rayen ejobi, te imitete vẹ eya rayen ejobi, kugbe eyere uwevwi rayen ejobi, e de mu ayen ejobi reyọ.

³⁰ Etiyin Jekọp da ta kẹ Simiọn vẹ Livae nẹ, Ovwan so okpetu kẹ vwẹ nure, odẹ mẹ ko che gbo hwe ihwo rẹ otọ na, ihwo ri Kenan kugbe Pẹriz, mi buru rẹ, ayen de se otu rhe họnre ovwẹ, kẹ ayen ghwọrọ ovwẹ, te omẹvwẹ te uwevwi mẹ.

³¹ Ẹkẹvuọvo ayen da ta, Die nẹrhẹ o ru oniọvo rẹ avwanre kiri igberadja?