Jẹnẹsis 33 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Jekọp vẹ Isọ Rhuẹrẹ kugbe

¹ Jekọp vwọ kpare opharo, nighe, Isọ ra yan cha, ọ vẹ ihwo uri ivẹ ri nene. Etiyin ọ da ghare emọ na kẹ Leah vi Rachel kugbe emetẹ rayen ivẹ na.

² O de phi eyaobọ na vẹ emọ rayen phihọ obaro, Leah vẹ emọ rọye da vwọ kpahe ayen, Rachel vi Josẹf da ka obuko.

³ Okpuyovwi rọye da ka obaro kẹ ayen, o de diguẹ vwẹ uyovwi te otọ asieghwrẹ, bẹsiẹ o rhi vwo te asan rẹ oniọvo rọye epha.

⁴ Ẹkẹvuọvo Isọ da djẹ ra vwa, ọ da gbanọ, ọ da vwẹ uyovwi kpahọ ohọre ọ da fiọnfiọn unu, ayen da viẹ.

⁵ Ọke rẹ Isọ vwọ kparo mrẹ eya vẹ emọ, ọ da ta, Ena amono ri nene uwe na? Jekọp da ta, Emọ rẹ Ọghẹnẹ vwo ru ẹse kẹ odibo wẹn.

⁶ Etiyin eyaobọ na de si kerẹ, te ayen te emọ rayen, ayen de diguẹ kẹ,

⁷ Leah vẹ emọ rọye de si kẹrẹ ayen de diguẹ, ukuko rọye Josẹf vi Rachel de si kẹrẹ, ayen de diguẹ.

⁸ Isọ da ta, Kidie a vwẹ usun nana ejobi na re Me vware na vwo ru? Jekọp da kpahe, Re Me vwọ mrẹ aroesiri vwẹ obaro rẹ ọrovwovwe.

⁹ Ẹkẹvuọvo Isọ da ta, Mi vwori buebu, oniọvo mẹ, sẹro rayen vwọ kẹ oma wẹn.

¹⁰ Jekọp da ta, Ẹjo, Me rẹ wẹ, ọ da dianẹ ivun mẹ vwerhe owẹ, gba reyọ ọghọ na mie vwe, vwẹ uyota a da mrẹ opharo wẹn, kọ họhọ ohwo rọ mrẹ opharo rẹ Ọghẹnẹ, gba vwẹ ẹguọnọ ro jẹrhẹriẹ tiọye na reyọ ovwẹ.

¹¹ Reyọ, Me rẹ wẹ, ọko nana re Me phare rhe we na, kidie Ọghẹnẹ ru ẹse kẹ vwẹ gangan, fikiridie ọ ri mi vwori na te kẹ vwẹ. Ọtiọna kọye ọ rẹrẹ, ọ da reyọ.

¹² Etiyin Isọ da ta, Gbe jẹ a yanran, ke Me ka obaro kẹ wẹ.

¹³ Ẹkẹvuọvo Jekọp da ta, kẹ, Ọrovwovwe riẹnre nẹ emọ na pha mwẹmwẹ, kugbe uchuru na ri vievie na e ro vwẹ ẹwan, a da djẹ ayen kpata kpata nọ ẹdẹ ọvo, uchuru na ejobi ki ghwu.

¹⁴ Jẹn ọrovwovwe ka obaro kẹ odibo rọye, rere Me jomaotọ sun ayen rhe, rere Me tẹtẹ ayen rhe kirobo rẹ uchuru na sa yan te, kirobo rẹ emọ na sa yan te, bẹsiẹ Me cha vwọ yan mu ọrovwovwe vwẹ obi Seir.

¹⁵ Etiyin Isọ da ta, Gbe ju vwe yan jẹn ihwo mẹ ẹvo vwo kẹ wẹ. Ẹkẹvuọvo ọ da ta, Kidie Me vwẹ ayen ru? Ju vwe mrẹ ivuavwerhe vwẹ obaro rẹ ọrovwovwe.

¹⁶ Kọye Isọ de rhivwi ẹdẹ yena kpo obi Seir.

¹⁷ Ẹkẹvuọvo Jekọp de mu oyan vwo kpo Sukọt, ọ da bọn uwevwi kẹ oma rọye, ọ da rha bọn itughẹ kẹ uchuru rọye; fiki rẹ ọtiọye na e de se odẹ rẹ asan na Sukọt.

¹⁸ Jekọp de rhi te orere ri Shikẹm gberhẹnẹdẹ, rọ otọ ri Kenan, vwẹ idjerhe ra wan ni Padanaram cha, o de mu erhọn phihọ ughere rẹ orere na.

¹⁹ Vwẹ obọ rẹ emọ ri Hamọr, ọsẹ ri Shikẹm, ọ da dẹ otọ na ebo rẹ igho ujori kẹ Etiyin ọ bọn utughẹ rọye phihọ.

²⁰ Ọ da so agbada phihọ Etiyin o de se odẹ rọye El-Elohe Izrẹl.