Jẹnẹsis 31 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Jekọp dje ne asan ri Laban

¹ Vwẹ ọke yena Jekọp de nyo rẹ emọ ri Laban vwọ tanẹ, Jekọp ghwe eyere rẹ ọsẹ rẹ avwanre reyọ, eyere rẹ ọsẹ rẹ avwanre na kọye o vwo fe na.

² Jekọp ke rha mrẹ vughe nẹ ivun rọye gbe rha vwerhe Laban kiri ọke rẹ ẹsosuọ-ọ.

³ Ọrovwohwo da ta ki Jekọp, Rhivwi kpo otọ rẹ ọsẹ wẹn bru uvwiẹ wẹn, ki mi nene uwe dia.

⁴ Jekọp de ji ikọ re se Rachel vi Leah rhe obo ẹghwa ro de churu eranvwe na,

⁵ ọ da ta kẹ ayen, Ivun mẹ gbe sa vwerhe ọsẹ rẹ ovwan kirobo ri jovwo-o. Ẹkẹvuọvo Ọghẹnẹ rẹ ọsẹ mẹ na vẹ ovwẹ herọ.

⁶ Wa riẹnre nẹ ogangan mẹ ejobi Me vwọ ga ọsẹ wẹn,

⁷ yẹ ẹkẹvuọvo ọsẹ wẹn ghwa vwẹ re o de wene osa mẹ asiehwe; yẹ Ọghẹnẹ rhọvwere nẹ ọwavwẹ oma-a.

⁸ Ọ da dianẹ ọ tare nẹ, Igodẹ ri kerẹ ipe eye osa wẹn, igodẹ na ejobi mi vwiẹ iri kere ipe; ọ da rha tanẹ, Iri vẹ irhiẹ eye dia osa wẹn; igodẹ na ejobi mi rhe vwiẹ iri vẹ irhiẹ.

⁹ Etiọye na Ọghẹnẹ vwọ reyọ uchuru rẹ ọsẹ wẹn ọ da vwẹ ayen kẹ vwẹ.

¹⁰ Ọke rẹ uchuru vwọ gba Me da vwerhẹ evwerhẹ mi vwo ni, Me da mrẹ ẹkpro rọ ruọ uchuru na, ẹvo vẹ irhiẹ, ẹvo vẹ ipe ẹvo pha bule bule.

¹¹ Etiyin amakashe rẹ Ọghẹnẹ da ta kẹ vwẹ vwẹ evwerhẹ na, Jekọp, mi de nyo nẹ, Mẹvwẹ na.

¹² Ọ da ta, Kpare opharo rere wo ni, ẹkpro na ejobi re ruọ uchuru na e bẹrẹ irhiẹ, i kere ipe, ẹvo bule bule, kidie Me mrẹ obo ri Laban ru we.

¹³ Mẹvwẹ Ọghẹnẹ ri Bẹtẹl, asan wọ da vwẹ evwri ghworo oragha re vwo vi na kugbe asan ri wo de vẹ ive kẹ vwẹ na. Gbe vrẹn vwẹ ọke na, ri wo rhivwi kpo nẹ otọ na, re wo kpo otọ re de vwiẹ wẹn.

¹⁴ Etiyin Rachel vi Leah da kpahe kẹ, Ẹkẹn ọfa eyẹ uku ji chekọ kẹ avwanre vwẹ uwevwi rẹ ọsẹ rẹ avwanre?

¹⁵ Ọ dianẹ avwanre họhọ ọrharha vwọ kẹ? Fikiridie ọ shẹ avwanre nure ọ ke je re igho rẹ avwanre nure.

¹⁶ Ekuakua ejobi rẹ Ọghẹnẹ reyọ mie ọsẹ rẹ avwanre kẹ e rẹ avwanre vẹ emọ rẹ avwanre, Asakiephana kemu kemu rẹ Ọghẹnẹ ta kẹ wẹ, ọye wo ru.

¹⁷ Etiyin Jekọp de vrẹn, o de mu emọ rọye kugbe eya rọye phihọ enu rẹ iyesi;

¹⁸ ọ da djẹ uchuru rọye phihọ obaro, kugbe eranvwe ro vwori ejobi, uchuru ro vwori vwi Padanaram, rere o kpo otọ ri Kenan bru Aizik rẹ ọsẹ rọye ra.

¹⁹ Laban yanran kpo ẹghwa ra bọrọ ẹto rẹ igegede, Rachel de cho oma rọ umukpe rẹ ọsẹ rọye.

²⁰ Jekọp de reghe Laban rẹ ohwo rẹ Aram, kidie ọ ta kẹ nẹ ọye cha djẹ-ẹ.

²¹ Ọ da bẹbẹ djẹ vi kemu kemu ro vwori ejobi, o de vrẹn ọ da sa urhie ri Yufratis mu, ọ da tọn opharo vi ugbenu rẹ orere ri Giliad.

Laban vwọ tua Jekọp

²² Ọke ra vwọ vuẹ Laban vwẹ ẹdẹ rẹ erha nẹ Jekọp djẹre,

²³ ọ da reyọ imoni rọye ọ da vwọ tua ẹdẹ ighwrẹ soso kpata kpata ra ro orere rẹ igbenu ri Giliad.

²⁴ Ẹkẹvuọvo Ọghẹnẹ de bru Laban ohwo rẹ Aram na rhe vwẹ evwerhẹ vwẹ ason, ọ da ta kẹ, Jomaotọ, wo biko kpahe ota ki Jekọp rẹẹ, oyovwiri eyẹ omiovwiri.

²⁵ Laban da yan mu Jekọp. Ọke yena Jekọp chivwi aphiana phihọ enu rẹ ugbenu, Laban vẹ imoni rọye de muerhọ phihọ enu rẹ ugbenu ri Giliad.

²⁶ Laban de ta ki Jekọp, Didi emu wo ruru na, ru wọ vwọ ghwa vwẹ re, ru wo vwo mu emetẹ mẹ kpo kiri ighuvwu re mu vwẹ ofovwi?

²⁷ Die wọ vwọ bẹbẹ djẹ, wọ vwọ ghwa vwẹ re, ru wo vwo ju vwe ẹvuẹ, rere Me heha kẹ wẹ vẹ ekpata kugbe isoroguun?

²⁸ Kidie wo gbi ju vwe fiọnfiọn emọ mẹ unu rere mi yere ayen kẹdẹfa-a? Wo ru emu rẹ ẹkpa gangan.

²⁹ Ogangan rhe vwe mi vwo ru we ghwaghwa; ẹkẹvuọvo Ọghẹnẹ rẹ ọsẹ wẹn ọye vuẹ vwẹ vwẹ ason na, nẹ, Jomaotọ wọ ta ota oyoyovwi eyẹ ọbrabra ki Jekọpu-u.

³⁰ Asakiephana wo ro kpo fikiridie urhuru rẹ uwevwi rẹ ọsẹ wẹn si we, ẹkẹvuọvo kidie wo rhe vwo cho ẹdjọ mẹ?

³¹ Jekọp da kpahe ki Laban, Kidie oshọ mu vwe, ki mi rori nẹ wọ cha vwẹ ẹgba reyọ emetẹ wẹn mie vwe.

³² Obọ ri kohwo kohwo ru wọ da mrẹ ẹdjọ wẹn na ko ghwu phihọ. Irharo rẹ imoni wẹn na vwẹ obọ te emu wo rori nẹ ọwẹn, rere wọ reyọ. Vwẹ ọke yena Jekọp riẹnre nẹ Rachel choro-o.

³³ Etiyin Laban da ro utughẹ ri Jekọp, ọ da ro utughẹ ri Leah, kugbe utughẹ rẹ ayeobọ ivẹ na, ẹkẹvuọvo ọ mrẹ aye-en. O de vrẹn nẹ utughẹ ri Leah ọ da ro utughẹ ri Rachel.

³⁴ Yi Rachel ghine, reyọ oma rọ umukpe rẹ ọsẹ rọye o de sionu vwẹ ekoso rẹ iyesi rọye o de tidia botọ Laban da vwẹ obọ gbe ekuakua rẹ uwevwi na ejobi, jọ mrẹrẹ-ẹ.

³⁵ Ọ da ta kẹ ọsẹ rọye nẹ, Wo jẹ ivun miovwo ọrovwovwe ri mi vwo je vrẹ-ẹn, kidie idjerhe rẹ eya na ra nyẹ vwẹ. Kọye ọ da guọnọ, ẹkẹvuọvo ọ sa mrẹ oma rọ umukpe rọye na-a.

³⁶ Etiyin ivun de rhi miovwo Jekọp, ọ da ghwo ku Laban, Jekọp da ta ki Laban, Didi ogbeku wọ mrẹ vwẹ obọ mẹ? Ọ rhọ umwemwu mẹ, ru wọ vwọ tua vwẹ?

³⁷ Dede na wọ hra uwevwi mẹ ejobi re, ki didi ekuakua wẹn wọ mrẹre vwẹ uwevwi mẹ? Gba vwọ phia kẹ imoni wẹn kugbe imoni mẹ rere ayen brorhiẹ mẹ vẹ ọwẹn.

³⁸ Ikpe uje soso Me vẹ ọwẹn vwọ herọ re, ogodẹ wẹn eyẹ ẹvwe wẹn ji vwiẹ chọra-a, mi ji hwe egbo rẹ uchuru wẹn ree.

³⁹ Ogodẹ rẹ eranvwe hweri mi vwo rhe we-e, Me hwa osa rọye kẹ wẹn, eranvwe re chori ason eyẹ uvo obọ mẹ wọ da nọ ekpẹn rọye.

⁴⁰ Kẹ ọtiọye mi epha, uvo mu vwe kẹdẹ kẹdẹ, ekpae kason kason, ovwerhẹ rẹ obọ mẹ da mrẹ vwẹ djẹ

⁴¹ Ikpe uje soso nana Me dia uwevwi wẹn, Me ga wẹn ikpe ihwẹne fiki rẹ emetẹ wẹn ivẹ; ikpe esan fiki rẹ uchuru wẹn, wo de wene osa mẹ abọ ihwe soso.

⁴² Ọ dianẹ kẹ Ọghẹnẹ rẹ ọsẹ mẹ, Ọghẹnẹ rẹ Ebraham kugbe oshọ rẹ Aizik nene uvwe dia vwo-o, yo muẹro nẹ abọ ofefe wa vwọ djẹ vwẹ kpọ, Ọghẹnẹ mrẹ oma elaghọ mẹ kugbe owian rẹ abọ mẹ, ọ da ghwọ ku we ason rọ wanre na.

Jekọp vẹ Laban rhi Kuoma gbe

⁴³ Laban de nyo ọ da kpahe ki Jekọp; Emetẹ na emọmẹọ, emọ rayen na emọ mẹ, uchuru na ji emẹ rhe, emu ejobi ru wọ mrẹ na emẹ. Ẹkẹvuọvo kidie mi se ru nonẹ na vwọ kẹ emetẹ mẹ na, eyẹ vwọ kẹ emọ rayen vwiẹri?

⁴⁴ Yanrhe, rere Me vẹ owẹ rẹ ọphọ, mẹvwẹ kugbe owẹ, rere ọ dia iseri kẹ vwẹ vẹ owẹ

⁴⁵ Etiyin Jekọp da reyọ ubioragha o de muo vi goro.

⁴⁶ Jekọp da ta ke ihwo rọye, Wa ghwẹ ibieragha, ayen da ghwẹ ibieragha na, ayen da ma ayen osusu na.

⁴⁷ Laban de se Jegarsahadutha. ẹkẹvuọvo Jekọp de rhe se Galeed.

⁴⁸ Laban da ta, Osusu nana ri goro na ọye iseri kẹ vwẹ vẹ owẹ nonẹ na. Fiki rẹ ọtiọye na o de se Galeed,

⁴⁹ Osusu na ki Mizpah, kidie ọ tare nẹ, Ọrovwohwo rhẹrẹ owẹ vẹ ovwẹ, ọke rẹ avwanre da hẹriẹ oma nẹ ohwohwo.

⁵⁰ Wo de miovwo emetẹ mẹ na ẹyọrọ, eyẹ wọ da rọvwọ eya efa ba emọ mẹ na, dede na ohwo ọfa etinẹ na, karophihọ nẹ Ọghẹnẹ iseri mẹ vẹ owẹ.

⁵¹ Etiyin Laban da ta ki Jekọp, Ni osusu nana vẹ ekru nana, ri mi mu vi vwẹ uvwre mẹ vẹ ọwẹn na.

⁵² Ekru nana iseri, osusu nana ji iseri rhe, nẹ Me sa shariẹ ekru nana bru we rhe-e, eyẹ ekpuyovwi wẹn sa shariẹ ekru na bru vwe rhe ri ru emu-u.

⁵³ Ọghẹnẹ rẹ Ebraham kugbe Ọghẹnẹ ri Nahọr, Ọghẹnẹ rẹ esẹ rayen, brorhiẹ rẹ avwanre. Etiyin Jekọp da vwẹ Oshọ rẹ ọsẹ rọye Aizik vwo duvwu iyori.

⁵⁴ Jekọp de ze izobo vwẹ enu rẹ ugbenu na o de se ihwo rọye nẹ iri re emu, ayen da re ayen da vwerhẹ enu rẹ ugbenu na.

⁵⁵ Irhiọke ride Laban de vrẹn, ọ da fiọnfiọn ivwrọmọ rọye kugbe emetẹ rọye unu ọ da nẹ ẹrhovwo kẹ ayen, o de kuoma rhẹriẹ o de rhivwi kpo.