Jẹnẹsis 25 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Uvwiẹ rẹ Ebraham rọ wan Oma ri Kẹtura rhe

¹ Ebraham da reyọ aye ọfa, re se odẹ rọye Kẹtura.

² O de vwiẹ Zimran, Jokshan, Medan, Midian, Ishbak, kugbe Shua.

³ Jokshan kọye ọsẹ ri Sheba kugbe Dedan. Emọ ri Dedan kẹ Asshurim, Letushim kugbe Le-ummim.

⁴ Emọ ri Midian kẹ Ephah, Epher, Hanọk, Abida kugbe Eldah. Enana ejobi na kẹ emọ ri Kẹtura.

⁵ Ebraham da vwẹ emu ro vwori ejobi vwọ kẹ Aizik.

⁶ Ẹkẹvuọvo emọ rẹ ayeobọ na ejobi ẹse kọye o di ru kẹ ayen, ọke rẹ ekpuyovwi rọye vwọ akpọ na ọ da hẹriẹ ayen abọ nẹ oma rẹ Aizik, vwo kpo orho rọ abọ rẹ ọnre da vacha.

Ughwu kugbe Esho rẹ Ebraham

⁷ Enana keye ẹdẹ rẹ ikpe rẹ akpọ rẹ Ebraham, ikpe iyori nuro vwẹ ujurhiri.

⁸ Ebraham de phi ẹnwẹ họ o de ghwu, ọ ghworo hẹrẹn hẹrẹn, ọmare rọ mrẹ ikpe buebu, o de bru ihwo rọye.

⁹ Aizik kugbe Ishmael rẹ emọ rọye de sho phihọ ẹmwa ri Mak-pela, vwẹ otọ ri Ephron ọmọ ri Zohar rẹ ohwo ri Hẹt, rọ obọrhe ri Mamre,

¹⁰ otọ rẹ Ebraham dẹ mie ihwo ri Hẹt. Etiyin kọye e shi Ebraham phihọ kugbe Sera rẹ aye rọye.

¹¹ Rẹ Ebraham vwo ghwunu Ọghẹnẹ de bruphihọ kẹ Aizik rẹ ọmọ rọye. Aizik da dia Beer-lahai-roi.

Uvwiẹ rẹ Ishmael

¹² Enana keye uvwiẹ rẹ Ishmael, ọmọ rẹ Ebraham, ri Hagar rẹ ohwo rẹ Ijipt, rẹ ọviẹn ri Sera, vwiẹ kẹ Ebraham.

¹³ Enana edẹ rẹ emọ rẹ Ishmael, re vwiẹri ohwohwo kpahe ohwo: Nebaioth, ọmọ ọkpako rẹ Ishmael, kugbe Kedar, Adbeel, Mibsam,

¹⁴ Mishma, Dumah, Massa,

¹⁵ Hadad, Tema, Jetur, Naphish, kugbe Kedemah.

¹⁶ Enana keye emọ rẹ Ishmael, enana keye odẹ rayen, ọkuọko rayen kugbe orho rayen, ivie ihwivẹ kirobo rẹ ẹgborho rayen epha.

¹⁷ (Enana keye ikpe rẹ akpọ rẹ Ishmael, ikpe erha nuro vwẹ ujughwrẹ, o de phi ẹnwẹn họ, o de ghwu, o de bru uvwiẹ rọye.)

¹⁸ Ayen da dia nẹ Havilah rhi te Shur, ro hirhe opharo ku Ijipt vwẹ ọke re de kpo Asiria; ọ da dia hirhe uko ku ihwo rọye.

Evwiẹ rẹ Isọ kugbe Jekọp

¹⁹ Enana ke rha uvwiẹ rẹ Aizik, ọmọ rẹ Ebraham, Ebraham kọye ọsẹ rẹ Aizik,

²⁰ Aizik ghwo te ikpe ujuvẹ, tavwe ọ ke reyọ Rebeka vwọ rọvwọ, ọmọtẹ ri Bẹtuẹl ohwo rẹ Aram rẹ orere ri Padanaram, oniọvo ri Laban rẹ ohwo rẹ Aram.

²¹ Aizik da nẹ ẹrhovwo kẹ Ọghẹnẹ fiki rẹ aye rọye, kidie ẹga oruẹ, Ọrovwohwo de nyo ẹrhovwo rọye, Rebeka rẹ aye rọye da rhi mrevun.

²² Emọ na ki phre vwẹ evun na, o da ta, Ọ da dia enẹ, kidie Me guọnọ vwẹ akpọ? Etiyin o de re duotọ rọye vwẹ obọ rẹ Ọrovwohwo.

²³ Ọrovwohwo da ta kẹ, Ẹgborho ivẹ ri evun wẹn, oka rẹ ihwo ivẹ, ru wo che vwiẹ na, ke ghare oma; Ọvo cha goma nọ ọrivẹ, oro ọkpako cha ga oro otete.

²⁴ Ẹdẹ rẹ uvwiẹ rọye vwọ gba, nighe, agbava evun rọye.

²⁵ Orẹ ẹsosuọ vwo shotọ ọvwara wei, oma rọye ejobi ẹtuẹnto yafu, kọye e de se odẹ rọye Isọ.

²⁶ Emerha oniọvo rọye de rhi shotọ, ọ da vwẹ obọ yọnrọn uchuku owọ rẹ Isọ, Etiyin e de se odẹ rọye Jekọp. Aizik ikpe ujorha vwẹ ọke ro vwo vwiẹ emọ na.

Isọ shẹ Ọkpako rọye

²⁷ Ọke rẹ emọ na vwọ ghwanre re, Isọ kẹ ọgba oruẹ, ohwo rẹ aghwa, Jekọp kẹ ohwo dẹndẹn rọ dia itughẹ.

²⁸ Ivun rẹ Isọ vwerhe Aizik gangan, fikiridie o hwe eranvwe kẹ na; ẹkẹvuọvo ivun ri Jekọp da rha vwerhe Rebeka.

²⁹ Ẹdẹ ọvo ri Jekọp vwo chere ukodo, Isọ de nẹ ibefi rhe, owẹvwe ko hwe gangan.

³⁰ Isọ da ta kẹ Jekọp, Ju vwe re umu ukodo ọvwavware wẹn na, kidie owẹvwe na hwe vwe gangan (Fiki rẹ ọtiọye na kọye e vwo se odẹ rọye Idọm.)

³¹ Jekọp da ta, Gba shẹ ọkpako wẹn kẹ vwẹ tavwe.

³² Isọ da ta, Mi muegbe rẹ ughwu na kidie Me vwẹ ọkpako ru?

³³ Jekọp da ta, Gbe duvwu iyori tavwe. Etiyin o de duvwu iyori, ọ da shẹ ọkpako rọye ki Jekọp.

³⁴ Jekọp da vwẹ ikara kugbe ukodo rẹ ifọn vwọ kẹ Isọ, ọ da re ọ da da, o vreri ọ da yanran. Kẹnẹ Isọ ni ọkpako rọye saka.