Izikiẹl 8 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Emramrẹ rẹ Ọmraro na Kpahe Ẹguaegbe vwi Jerusalẹm

¹ Vwẹ ukpe resan, vwẹ emeranvwe resan, vwẹ ẹdẹ riyori rẹ emeranvwe na, ri mi vwo tidia vwẹ uwevwi me, vẹ ekpako ri Juda ri tidia vwẹ obaro mẹ, obọ rẹ Ọrovwohwo Ọghẹnẹ da dia etiyin she mu vwe.

² Etiyin mi de ni, nighe, ekroma rọ họhọ ohwo, vwẹ obotọ rẹ obọ re họhọ ehun rọye erhanre da herọ, nẹ ehun rọye kpenu da họhọ ugboma ro lo wrowro kerẹ ẹrovwo rọ nyavwaro.

³ O da vwẹ obo re họhọ obọ na vwọ phia, ọ da yọnrọn eme rẹ ẹto rẹ uyovwi me ọvo, Erhi na da kpare ovwẹ phelephele kpenu, ọ da vwẹ ovwẹ kpo Jerusalẹm ra mrẹ emramrẹ rẹ Ọghẹnẹ, vwo kpo ughere vẹ anurhoro rẹ ọguan rọ hẹ obo ẹtan ro hirhe aro ku obọhwẹre ọnre, asan rẹ agbara rẹ uhoho rẹ omẹriọ epha, rọ rhanriẹ omẹriọ na.

⁴ Gbe nighe, urinrin rẹ Ọghẹnẹ rẹ Izrẹl na hẹ etiyin, kerẹ emramrẹ re me mrẹre vwẹ obo uphephẹ na.

⁵ Etiyin ọ da ta kẹ vwẹ, Ọmọ rẹ ohwo, kpare opharo wẹn kpenu vwẹ asakiephana wo ni obọhwẹre ọnre, ọtiọye me da kpare ẹro me ni obọhwẹre ọnre, nighe, vwẹ obọhwẹre ọnre rẹ anurhoro rẹ agbada na, uhoho rẹ omẹrio na herọ.

⁶ Ọ da ta kẹ vwẹ, Ọmọ rẹ ohwo, wọ mrẹ obo rẹ ayen ruẹ na? Ẹgua rode rẹ uwevwi rẹ Izrẹl gbe vwe etinẹ, rẹ ayen vwọ djẹ vwẹ sheri nẹ ẹshẹ na? Ẹkẹvuọvo wọ cha mrẹ ẹgua rọ cha rho nọ ọtiọna.

⁷ Ọ da reyọ ovwẹ rhe anurhoro rẹ ọguan na; ọke mi vwo no, nighe uphrophro da hẹ igbẹhẹ na.

⁸ Etiyin ọ da ta kẹ vwẹ, Ọmọ rẹ ohwo, tọn igbẹhẹ na; ọke me vwọ tọn igbẹhẹ na, nighe, ẹchẹ da herọ

⁹ Ọ da ta k vwẹ, Ro uwevwi, re wọ ra mrẹ ẹgua ogbegbo rẹ ayen gbe vwẹ etinẹ

¹⁰ Ọtiọye me da ro uwevwi na, me da mrẹ vwẹ etiyin, oka rẹ eravwọ ejobi ri kpono, eranvwe ejobi ri gbo ọrhe brabra, kugbe ema ejobi rẹ uwevwi rẹ Izrẹl,

¹¹ Ekpako ujorha gbẹ ihwe rẹ uwevwi rẹ Izrẹl de mudia vwẹ obaro rayen, vi Ja-azaniah rẹ ọmọ ri Shafan ro mudia vwẹ ohri rayen, ọvuọvo vwo ẹphẹre vwẹ obọ, ivwirhi rẹ ugboduma na de bru kpenu.

¹² Etiyin ọ da ta kẹ vwẹ, Ọmọ rẹ ohwo, wọ mrẹ obo rẹ ekpako rẹ uwevivi rẹ Izrẹl ruẹ vwẹ evun rẹ ebri, ohwo ọvuọvo vwẹ evun rẹ uvun ri foto rọye? Kidie ayen ta, Ọrovwohwo mrẹ avwanre-e, Ọrovwohwo siẹn otọ na

¹³ O da je ta kẹ vwẹ rhe, wọ je cha mrẹ ẹgua rọ rho nọ ọtiọna rẹ ayen ruru.

¹⁴ Etiyin ọ da reyọ ovwẹ rhe ughere rẹ anurhoro ro obọhwẹre ọnre vwẹ uwevwi rẹ Ọrovwohwo na, nighere, aye ọvo tidia vwẹ etiyin rọ viẹ kẹ Tammuz.

¹⁵ Etiyin ọ da ta kẹ vwẹ, Wọ mrẹ ọnana re, E ọmọ rẹ ohwo? Wọ je cha mrẹ ẹgua re rhọ no enana.

¹⁶ O da reyọ ovwẹ rhe ọguan rẹ uherevie rẹ uwevwi rẹ Ọrovwohwo na, gbe nighe, vwẹ anurhoro rẹ uwevwi rẹ Ọrovwohwo na, vwẹ uvwre rẹ ọmọguan na vẹ agbada na, ihwo kerẹ uje gbẹ ẹnẹ herọ, ri chuku ku uwevwi rẹ Ọrovwohwo, ayen de chuko ku uwevwi rẹ Ọrovwohwo na ji hirhe opharo ku ọnre, re ga ọnre na.

¹⁷ Etiyin ọ da ta kẹ vwẹ, Wọ mrẹ ọnana re, E ọmọ rẹ ohwo? Wo roro nẹ emu ọphapharhe vwọ kẹ uwevwi ri Juda re ayen vwo gbe ẹgua nana re ayen gbe ozighi vwọ vọn otọ na, rere ayen rhoma vwo kpare ophu mẹ? Nighe, ayen phi oghọn phihọ uwen rayen.

¹⁸ Fiki rẹ ọtiọye na ayen kpare o vwẹ ophu; ẹro mẹ gbi jẹn ayen vwo-o, eyẹ me gbe re ehrọre-e, owenẹ ayen kperi phihọ ovwẹ erhọn vẹ urhuru ọgangan dede, me cha kerhọn rẹ aye-en.