Izikiẹl 11 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

A Harhe isun Ebrabra na

¹ Erhi na da kpare ovwẹ vrẹn, ọ da vwẹ ovwẹ rhe obaro ọnre rẹ anurhoro rẹ uwevwi rẹ Ọrovwohwo na, ro hirhe aro ku obaro ọnre. Nighe, vwẹ asan ẹchẹ rẹ anurhoro na eshare uje gbẹ iyori herọ; me da mrẹ vwẹ ohri rẹ ayen Jaazaniah rẹ ọmọ rẹ Azzur, kugbe Pelatiah rẹ ọmọ ri Benayah, isun re ihwo na.

² Ọ da ta kẹ vwẹ, Ọmọ rẹ ohwo, enana ihwo re jẹ iroro umwemwu re nẹ ihwo aghwanre umwemwu vwẹ evun rẹ orere nana;

³ re ta, ọke na je kẹre ra vwọ bọn iwevwi na-a; orere na hẹ ubrochẹ, avwanre ke ivwo na.

⁴ Fiki rẹ ọtiọye na gba mraro kpahe ayen, mraro, E ọmọ rẹ ohwo.

⁵ Erhi rẹ Ọrovwohwo na de she teye ovwẹ, ọ da ta kẹ vwẹ, Ta, Enẹ Ọrovwohwo tare. Ọtiọye wo rori, E uwevwi rẹ Izrẹl; kidie me riẹn obo re rhiẹ udu wẹn.

⁶ Wo ru ihwo ri wo hweri bu phihọ vwẹ evun rẹ orere nana, wọ da ghwẹ irhuvwu rọye vọn vẹ ihwo re hweri.

⁷ Fiki rẹ ọtiọye na enẹ Ọrovwohwo Ọghẹnẹ tare: Ihwo wẹn ri wo hweri re wọ riẹn phihọ uherevie rọye, ayen hẹ uvwo na, orere nana kọye hẹ ubrochẹ na; ẹkẹvuọvo ka cha reyọ owẹ nẹ uherevie rọye rhe.

⁸ Wọ djẹ oshọ rẹ ọlọkọ na, ke me reyọ ọlọkọ na vwọ kpahe owẹ, Ọrovwohwo Ọghẹnẹ re tarọ.

⁹ Ke me reyọ owẹ nẹ uherevie rọye rhe, ki mi phi we phihọ abọ rẹ erhorha, ki mi gu ẹdjọ kpahe owẹ.

¹⁰ Ọlọkọ kọye a vwọ nyavwe owẹ; ke me vwẹ owẹ gu ẹdjọ vwẹ ughwru rẹ Izrẹl ko wọ riẹn nẹ mẹvwẹ Ọrovwohwo na.

¹¹ Orere nana gbe cha dia ubrochẹ wẹ-ẹn, eyẹ wọ gbe cha dia uvwo vwẹ evun rọye-e; me cha vwẹ owẹ gu ẹdjọ vwẹ ughwru rẹ Izrẹl;

¹² ku wọ riẹn nẹ mẹvwẹ Ọrovwohwo na; kidie wọ sa yan nene iji mẹ-ẹ, eyẹ wọ yọnrọn irhi mẹ-ẹ, ẹkẹvuọvo wọ da yọnrọn irhi rẹ ẹgborho re riariẹ owẹ phihọ na.

¹³ Rẹ ọke rhi vwo te, re me vwọ mraro na, ọye Pelatiah rẹ ọmọ rẹ Benayah de ghwu. Etiyin mi de she bọvwọn opharo rhuotọ, me da van kperi, Me da ta, E Ọrovwohwo Ọghẹnẹ! ku wo ghwe furhie umuku rẹ Izrẹl ri chekọ na te oba?

Iveve rẹ Erhuerephihọ Kugbe Ovwariẹru

¹⁴ Ota rẹ Ọrovwohwo de bru vwe rhe:

¹⁵ Ọmọ rẹ ohwo, iniọvo wẹn, eyẹ iniọvo wẹn dẹn, otu wọ vẹ ayen gba hẹ usun rẹ imu na, uwuvwi rẹ Izrẹl ejobi, ayen ejobi tototo, ayen ejobi rẹ ihwo ri Jerusalẹm ta kpahe nẹ, Ayen yan sheri nẹ Ọrovwohwo oma; a vwẹ otọ nana ghare avwanre ughwẹ re.

¹⁶ Fiki rẹ ọtiọye na, Enẹ Ọrovwohwo Ọghẹnẹ tare. Dede nẹ mi mu ayen yanran shesheri phihọ ohri rẹ ẹgborho efa, dede nẹ me hra ayen vwẹ ohri rẹ ẹkuotọ efa, ye me je dia ẹshẹ kẹ ayen vwẹ ọmọke vwẹ ẹkuotọ rẹ ayen ra re na.

¹⁷ Fiki rẹ ọtiọye na gba ta kẹ ayen, Enẹ Ọrovwohwo tare: mi che si we koko nẹ oma rẹ ihwo na rhe, me me ghwẹ wẹ koko nẹ evun rẹ ẹkuotọ ra hra wẹ ra jovwo na, ke me vwẹ otọ rẹ Izrẹl na kẹ wẹ.

¹⁸ Ayen de rhi te etiyin, kẹ ayen che si emu ejobi ri tuoma na no kugbe emu rẹ ẹgua rọye ejobi.

¹⁹ Ke me cha kẹ ayen udu ọvo, ki mi phi erhi ọkpokpọ phihọ evun rẹ ayen; ki mi si udu rẹ oragha na nẹ uvwo rẹ oma rayen, ke me kẹ ayen udu rẹ uvwo,

²⁰ rere ayen vwọ yan vwẹ iji mẹ rere ayen sẹro rẹ irhi mẹ rere ayen mu ọghọ kẹ ayen, ayen kẹ dia ihwo mẹ, ke Me dia Ọghẹnẹ rayen.

²¹ Ẹkẹvuọvo vwọ kẹ otu rẹ udu rayen nene obo ri tu ayen oma na kugbe obo ri gbe ayen ẹgua na, me nọ ekpẹn rẹ uruemu rayen na vwẹ uyovwi rẹ obọ rayen, Ọrovwohwo Ọghẹnẹ re tarọ.

²² Etiyin shẹrobim da kpare ibekpe rayen, vẹ idjuge na vwẹ akakọ rayen; urinrin rẹ Ọghẹnẹ rẹ Izrẹl da hẹ enu rẹ ayen.

²³ Urinrin rẹ Ọrovwohwo de mu nẹ uherevie rẹ orere na kpenu, o de re mudia enu rẹ ugbenu rọ hẹ obaro ọnre vwẹ orere na.

²⁴ Erhi na de mu vwe kpenu ọ da kẹ vwẹ emramrẹ vwẹ oma rẹ Erhi rẹ Ọghẹnẹ vwẹ obi Kaldia, vwọ kẹ ihwo ri imu na. Etiyin emramrẹ re me mrẹre na de pho vwe wan.

²⁵ Me da ta kẹ ihwo re hẹ imu na emu ejobi rẹ Ọrovwohwo vwọ nẹ vwẹ.