Isẹ 7 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Oriẹriẹvwe rẹ Igberadja

¹ Ọmọ mẹ, yọnre eta mẹ rere wọ sẹro rẹ irhi mẹ vwẹ evun wẹn,

² yọnrọn irhi mẹ rere wọ vwọ rhọ, sẹro rẹ eyono mẹ kere ọmọ-ero wẹn.

³ Gba ayen mu irhiabọ wẹn, si ayen phihọ evun rẹ udu wẹn.

⁴ Ta kẹ aghwanre nẹ, wọwe oniọvo mẹ rẹ ọmọtẹ, rere wo se ọmrẹvughe ugbeyan rẹ erhi wẹn,

⁵ rọ sẹro wẹ nẹ obọ rẹ igberadja na, nẹ obọ rẹ aye vẹ eta ro riẹriẹvwe rọye.

⁶ Kidie vwẹ evun rẹ evakpo rẹ uwevwi me, me da wan iphrophro rẹ ovakpo na ni otafe,

⁷ me da mrẹ vwẹ ohri rẹ ihwo diodi na, me da nabọ mrẹ otu rẹ imighene na, ọvo vwẹ usun rẹ ayen ro jẹ iroro evwo,

⁸ rọ wan urhuvwu na vwẹ akakọ rẹ uwevwi rẹ aye na, ọ da vwẹriẹ idjerhe rẹ uwevwi rẹ aye na.

⁹ Vwẹ ọke phorophoro, vwẹ ovwọnvwọn kugbe ọke rẹ ason rẹ ebri vwo mu nu.

¹⁰ Kọye mi vwo no, aye ọvo da ra vwa, ọ nabọ gba fia kerẹ igberadja, udu rọye vọnre vẹ ọphiẹvwẹ.

¹¹ Urhuru rọye mra ghwoghwoghwo ọvwọfanrhiẹ oruẹ, owọ rọye daje uwevwi-i,

¹² owọ ọvo evun rẹ urhuvwu, owọ ọvo hẹ evun rẹ eki, kakakọ kakakọ ọye o de muẹdia hẹrhẹ.

¹³ O ghwe muo gbane ọ ghwa fiọnfiọn unu, vẹ opharo zebuzebu yọ ghwa ta kẹ:

¹⁴ Ki mi ze izobo nonẹ na me hwa osa rẹ ive mẹ ejobi nu.

¹⁵ Kọye me vwọ ro ada rhe vwa wẹ na, rhe nabọ guọnọ owẹ kọye me da ghwa mrẹ wẹ na.

¹⁶ Me nabọ hwa ehwa mẹ nu me ke cha na, omamọ rẹ itiane rẹ Ijipt me vwọ hwa.

¹⁷ Me nabọ fẹrẹ omamọ rẹ ishani kuo, omamọ rẹ egẹn vẹ adjija, ohọrọ rẹ urhe rẹ Sinamọn.

¹⁸ Yanrhe, jẹn e si ukeke bẹsiẹ rẹ ọke vwọ rhie, jẹn avwanre bẹnẹ kuo oma.

¹⁹ Kidie ọshare mẹ ọ hẹ uwevwi-i, o kpo isiorho.

²⁰ Ọ ghwa esisio rẹ igho nene oma; emeranvwe da vẹgbẹ kọ cha rhe.

²¹ Eta avwerhe buebu kọye ọ vwọ riẹriẹ, unuẹrarọ kọye ọ vwọ gba phihọ.

²² Siẹvuọvo na ko ghwe vrẹn nene, mimi kerẹ erhuẹn re suẹn re hwe, eyẹ orhua ro mu ufi.

²³ Bẹsiẹ rẹ edada vwo kporo ro efẹn rọye, kerẹ ọphran rọ họrhọ ro ufi, ọ rha riẹn nẹ arhọ rọye che ghwru nene-e.

²⁴ Asakiephana, Emọ na, wa gba kerhọn mẹ, rere wa nabọ nyo eta rẹ unu mẹ.

²⁵ Wo jẹn udu wẹn kpo idjerhe rọye-e, wọ beghe ruẹ idjerhe rọye-e,

²⁶ kidie ọmọrhiẹ ihwo eye o sun she-e; uyota, urogho eye ọghwọre re.

²⁷ Uwevwi rọye idjerhe rẹ erivwi, etiyin a wan kpo uvun rẹ ughwu.