Isẹ 6 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Uchebro kpahe ufeti vẹ Ofian

¹ Ọmọ mẹ, wọ da re esarobọ kẹ ọrivẹ wẹn, wo de ve ivẹ kẹ ọrhorha;

² ọ da dianẹ ufi mu we fiki rẹ ota rẹ ẹbẹrunu wẹn, rẹ unu wẹn da she wẹ,

³ gbe ru ọnana, ọmọ mẹ, rere wo sivwi oma wẹn, kidie wo rhi she ro obọ rẹ ogangan rẹ ọrivẹ wẹn nure. Gba ra rẹ ọrivẹ wẹn na phẹre phẹre,

⁴ wo jẹn ovwerhẹ sun we-e rere wo go ovwerhẹ-ẹ.

⁵ Sivwi oma wẹn nẹ obọ rọye kerẹ uzo rọ djẹ nẹ abọ rẹ orhuẹ, kerẹ ọphran ro rhan nẹ obọ rẹ ohwo rọ kpahe ufi.

⁶ Yan bru emeraranvwe na, E Ọvwiẹrẹ na, yono uruemu rọye, rere wọ ghwanre.

⁷ O vwo ọkpako-o eyẹ onotu, eyẹ osu-un,

⁸ ọ nabọ rhuẹrẹ emu rọye kpahe vwẹ ọke uvo, ọ me nabọ rhuẹrẹ ekuakua rọye ejobi phihọ vwẹ ọke orhọ.

⁹ Mavọ wo shevwerhẹ etiyin krite, ọvwiẹrẹ na? ọkevọ wọ che vwọ vrẹn nẹ ovwerhẹ wẹn?

¹⁰ Omovwerhẹ krẹn, omovwerhẹ ego krẹn amabọ ra vwọ gbanoma re wo vwo rovwo oma ye,

¹¹ ọye ọbẹvwẹ vwo bru we cha kerẹ osoghoro, ọye ogbere vwọ hwe we na.

¹² Orharhe rẹ ohwo, ohwo umwemwu, ọ vẹ eta ebrabra vẹ ọphiẹvwẹ gba yan,

¹³ ọ yan yọ brẹro, yọ vwẹ awọ hiẹ otọ, yọ riẹn irhiabọ rọye,

¹⁴ ọ vwẹ udu roro iroro umwemwu, kọke kọke ọ vwọ kọn ibi rẹ ozighi,

¹⁵ fiki rẹ ọtiọye na okpetu che she teyọ kpregede; nana nana na ka guọghọ te otọ e rhe se sivwo-o.

¹⁶ Emu esan herọ ri tuẹ Ọrovwọhwo na oma, ighwrẹ re dia ẹgua vwọ kẹ:

¹⁷ ero rọ jẹfia, ẹrẹnvwe rọ vwọrọn efian, vẹ abọ ri sun ọbara ekueku.

¹⁸ Udu ro roro iroro umwemwu, awọ re djẹ ugbonẹ rẹ umwemwu eruo,

¹⁹ oseri rẹ efian rọ vwọrọn efian, kugbe ohwo ro phiẹ ohra phihọ ohri rẹ iniọvo.

Uchebro kpahe Igberadja

²⁰ Ọmọ mẹ, yọnrọn urhi rẹ ọsẹ wẹn, wọ sian uyono rẹ oni wẹ-en.

²¹ Gba ayen mu udu wẹn kọke kọke; gba ayen mu ohọre wẹn.

²² Wọ da yan, ki sun we; wo de shevwerhẹ, ke rhẹrẹ owẹ, wọ da rha rhọvwọ rhe, ki nene uwe gbe ikun.

²³ Kidie urhi na ọye urhukpẹ, eyono ke rha orẹmrẹ, eghwọkuo re vwo si ohwo orhọn ye kọye idjerhe rẹ arhọ,

²⁴ rọ sa sẹro wẹ nẹ obọ rẹ aye umwemwu na, kugbe avwerhe rẹ ẹrẹnvwe re ohwọghwia na.

²⁵ Wo jẹ urhuru rẹ erhuvwu rọye si we vwẹ udu wẹ-ẹn, wo ji jọ vwẹ iphophẹro rọye mu we reyọ-ọ,

²⁶ kidie a sa vwẹ ọko rẹ okuọka ọvo vwo du igberadja, ẹkẹvuọvo aye ọfanrhiẹ sa guọghọ arhọ re ohwo muotọ.

²⁷ Kẹ ohwo se mu erhanre phihọ agada yan re emwa rọye de jẹ torhẹ?

²⁸ Eyẹ kẹ ohwo sa yan wan enu rẹ imwerhanre rẹ awo rọye de jẹ torhẹ?

²⁹ Ọtiọye ohwo ro du aye rẹ ọrivẹ rọye epha, ohwo kohwo ro ru ọtiọye ejobi sa vabọ re ehwe-e.

³⁰ Ihwo rha hanrhe oji siẹ ro de cho emuọre siẹ rẹ owẹvwe de hwe?

³¹ Ede rhe muo ọme hwa emu ro chori na rhivwi akuighwrẹ ọ me vwẹ ekuakua rẹ uwevwi rọye ejobi vwọ hwa osa na.

³² Ohwo ro gbe igberadja o vwo iroro-o, o ro ru ọtiọye yẹ omobọ rọye o hwe.

³³ Omaẹwan vẹ omaẹphọphọ eye ọ mrẹ reyọ, ọ mrẹ emu vwọ hworhẹ omavovwẹ nẹ ẹro-o.

³⁴ Omẹriọ nẹrhẹ ohwo muẹ ophu, o rhe se jovwo siẹ ro de ru orukeri-i.

³⁵ Ọ rha sa rhọvwe reyọ igho-o, wọ da ghwa emu buebu rhe dede ẹnwẹn rọye che te otọ-ọ.