Isẹ 25 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Idjedje kugbe Uyono rẹ Omamọ Uruemu

¹ Enana je vwẹ isẹ, ri Solomọn rẹ ihwo ri Hezikaya ovie ri Juda si phihọ otọ.

² Urinrin rẹ Ọghẹnẹ rere o vwo si eravwọ nu, ẹkẹvuọvo kẹ rha urinrin rẹ ivie rere ayen vwọ guọnọ otọ rayen phia.

³ Kirobo rẹ obenu rẹ akpọ na kpenu te na, kugbe obo rẹ otọ na kodo te na, eriyin evun rẹ ivie epha asan mrẹ otọ raye-en.

⁴ Si isọn rẹ igho nẹ idọnọ na, ogu na kọ mrẹ obo ro vwo duvwu oravwọ.

⁵ Si ohwo umwemwu nẹ obaro rẹ ovie na, ekete rẹ uvie rọye ko mudia vwẹ ọvwata.

⁶ Wo dje oma wẹn phia vwẹ obaro rẹ ovie-e; eyẹ wo mudia vwẹ asan rẹ ihwo ride epha-a;

⁷ kidie oyoma ra vwọ ta kẹ ohwo nẹ, Yanrhe obenu obonẹ, vrẹn ọ re vwo ru ohwo kpotọ vwẹ irharo rẹ osun.

⁸ Obo rẹ ẹro wẹn mrẹre wọ vwẹ okpakpa vwo kpo aguare-e; kọrhọ wo ru vwẹ obọ ọ da dianẹ ọrivẹ wẹn phọpho owẹ?

⁹ Nene ọrivẹ wẹn phraphro rẹ ota rọ sọ wẹ vẹ ọye, wọ vwẹ odjahọ rẹ ohwo ọfa phia-a;

¹⁰ ohwo ro nyo we da rha phọphọ owẹ, omavovwẹ wẹ gbi rhe che vwo oba-a.

¹¹ Ubiota ra nabọ riẹta ọhọhọ ubi rẹ oro vwẹ ohri rẹ idọnọ.

¹² Ọtiobọ rẹ isa rẹ oro eyẹ ugbẹn rẹ oro ra vwọ rhuẹrẹ oma epha na; eriyin uchebro rẹ aghwanre epha kẹ erhọn ro nyo ẹme.

¹³ Ọtiobo rẹ ekpahe rẹ ohwahwa muẹ vwẹ ọke orhọ ye eriyin ọyinkọ rẹ esiri epha kẹ ohwo ro jiro, ọ nẹrhẹ oma rẹ onini rọye sasa.

¹⁴ Kerẹ enu ro biri vẹ odju yẹ osio rhọre-e na eriyin ohwo rọ yan eyan rẹ ẹse rọ ruru-u epha.

¹⁵ Erhiori ọye a vwọ bọrọ udu rẹ osun rẹ ihwo, ota bọrọ bọrọ vwirhẹ ubeku.

¹⁶ Wọ da mrẹ ọnyọn, re uche rẹ evun wẹn guọnọre, ọ rha dia ọtiọye-e ko che phu we rhe wo mi rhi geri.

¹⁷ Wọ yan kpo uwevwi rẹ ọrivẹ wẹn kọke kọke-e, ofu wẹn de rhi dje nu ku wo che tuoma.

¹⁸ Ohwo ro se oseri rẹ efian kpahe ọrivẹ rọye ọhọhọ ukpokpo rẹ emọ, eyẹ ọlọkọ, eyẹ odada ọpiọpiọpiọ

¹⁹ Ohwo rọ vwẹ ẹro so orharhe rẹ ohwo vwẹ ọke rẹ ukpokpogho ọhọhọ ako ro yeghe eyẹ owọ rọ ghworiẹ.

²⁰ Ohwo rọ sua une kẹ ohwo ro muomahọ ọ họhọ ohwo rọ ghwiẹ ewun nẹ oma vwẹ ọke rẹ ekpahe,

²¹ Owẹvwe de hwe ọvweghrẹ wẹn, vwẹ emu kẹ re, urhuru rẹ ame de rhe hwe vwẹ ame kẹ da;

²² kidie yi wo koko ẹko erhanre phihọ uyovwi rọye, Ọrovwohwo kọ cha hwa osa kẹ wẹ.

²³ Odju ro djuẹ nẹ obọrhe cha ghwa osio cha; eriyin ẹrẹnvwe rọ ruero nẹrhẹ e nẹ ohwo brabra.

²⁴ Oyovwi kẹ ohwo rọ vwọ dia ama akakọ vwẹ obenu rẹ uwevwi nọ ra vẹ aye rọ kunu vwọ dia uwevwi ọvo.

²⁵ Ọtiobo rẹ ame odjidjiro epha kẹ erhi rẹ urhuru rẹ ame hwe ye; eriyin omamọ rẹ usi ro nẹ ogboko cha epha.

²⁶ Kirobo rẹ ame ogbegbe miovwẹ ogbugbu rẹ ame na, eriyin ọvwata rọ vwọ uphẹn kẹ oruimwemwu epha.

²⁷ Ofori ra vwọ ra rẹ ọnyọn buebu-u, ọtiọye na gbe ni obo ru wo bru igu phihọ ohwo oma.

²⁸ Ohwo ro se suẹn oma rọye-e, ọ họhọ orere ra roro ra da guọghọ ọgba ra gba riariẹ te otọ.