Isẹ 23 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Wo de tidia udo-emu ro wọ vẹ osun rẹ ihwo da ria emu, gba nabọ fuẹrẹ obo re mu phihọ obaro wẹn na;

² Wọ reyọ aphia vwo bru upho wẹn wọ da dia ọgbọre.

³ Wo vwo ubiupho rẹ emu ọvwevwerhe rọye-e, kidie eye emuọre ra vwọ phiẹn ohwo phihọ.

⁴ Wo jẹ owian wẹn dia ọ ra vwọ ghwẹ efe koko ọvo-o, vwo aghwanre rere wo sioma reyọ.

⁵ Ọke wọ da ghwa kpare aro mrẹ re, ọ me ghwa ranvwiẹ; kidie siẹvuọvo na o me ghwa bẹrẹ ibekpe, ọ me ghwa rhan kpenu kerẹ egodi.

⁶ Wọ ria emu rẹ ohwo rọ tọn okpẹ-ẹ, wo jẹ emu ọvwevwerhe rọye si we urhuru-u;

⁷ kidie ọhọhọ ohwo rọ vwẹ obo evun guẹn nẹ, Re rere wọ da! ẹkẹvuọvo o nẹ evun rọye rhe-e.

⁸ Ukoko rọye ku wọ cha kpa obo re wọ rere na, wo mi rhe yovwi unu kpahọ.

⁹ Wọ ta eta wẹn vwẹ irharo rẹ ẹkpa-a, kidie ọ cha vwẹ eta rẹ aghwanre wẹn vwọ jehwẹ.

¹⁰ Wo kporo ughwru rẹ awanre ra vwọ ghare otọ-ọ, wọ je vwẹ ẹgba vwọ rua otọ rẹ ọmọphrorivwi-i;

¹¹ kidie Ọtan rayen pha gangan; ọ cha cha oja rayen vwẹ obọ wẹn.

¹² Vwẹ udu wẹn kẹ uyono rere wọ kerhọn rẹ erianriẹn.

¹³ Wọ vwẹ obọ ọlọlọhọ vwọ yọnrọn ọmọ-ọ wọ da vwẹ ọkpọ fa dede, o che ghwu-u.

¹⁴ Wọ da vwẹ ọkpọ fa dede ye wo sivwiro nẹ ughwu.

¹⁵ Ọmọ mẹ, udu wẹn da ghwanre omavwẹrhovwẹ kọ dia udu mẹ.

¹⁶ Erhi mẹ kọ ghọghọ rẹ unu wẹn da sa ta eta ri shephihọ.

¹⁷ Wo jẹ udu wẹn reoma rẹ iruimwemwu-u, ẹkẹvuọvo djẹ oshọ rẹ Ọrovwohwo kọke kọke.

¹⁸ Jo mu we ẹro nẹ ọke hẹ obaro, nẹ iphiẹrohọ wẹn che se ghwru kufia-a.

¹⁹ Nyo, ọmọ mẹ re wọ ghwanre, rere wọ vwẹ udu wẹn ejobi kpahe idjerhe na.

²⁰ Wọ dia ọvo vwẹ usun rẹ ọgba-idi na-a, eyẹ usun rẹ ayen otu ri siẹ urhuru rẹ eranvwe ẹriọ na-a;

²¹ kidie ọgba-udi kugbe ọgbọre akpọ cha bẹn ayen; ufeti kọ cha vwẹ erharhemwa rhuo ayen.

²² Kerhọn rẹ ọsẹ ro vwiẹ wẹ, wọ jẹ oni wẹn fia siẹ rọ da ghwo nu-u.

²³ Dẹ uyota reyọ, wọ shẹ-ẹ; dẹ aghwanre, kugbe uyono, vẹ ẹruọ.

²⁴ Ọsẹ rẹ ọvwata cha ghọghọ rhuarho; ọ ro vwiẹ ọmọ rọ ghwanre che vwo omavwerhovwẹ fiki rọye.

²⁵ Jẹ Ọsẹ vẹ Oni wẹn ghọghọ, jẹ ivun vwerhe oni ro vwiẹ wẹ.

²⁶ Ọmọ mẹ, vwẹ udu wẹn kẹ vwẹ, rere wo jẹ ẹro wẹn vughe idjerhe mẹ.

²⁷ Kidie aye ro gbe igberadja ọgọdọ kokodo o ruẹ; aye ro gbe ọghwia họhọ orhare ọhwahwa.

²⁸ Ọ gba phihọ idjerhe kerẹ igbunegbu rere o vwo geri eshare ri se gbuyota-a she.

²⁹ Ono ria oja? ono ri brenu? ono hẹ evun rẹ ofovwi? ono ri guẹ iguegu? ono a wan oma ekueku? ono ẹro rọye vwara?

³⁰ Ayen otu re diotọ krekri hẹrhẹ udi ẹda, ayen otu re guono udi ra guare da.

³¹ Wo nẹ udi siẹ rọ da vwara-a, rọ da họrhọ vwẹ evun rẹ uko o mi ku kpotọ riei.

³² Ukoko rọye ko muẹ ohwo rhovwa kerẹ ọrọdekọ, ọ rhovwa kerẹ ọvwighwẹ

³³ Ibiẹro wẹn cha mrẹ ogbẹmrẹ, udu wẹn ko che roro igbiroro.

³⁴ Ko wọ cha dia kerẹ ohwo ro shevwerhẹ uherevie rẹ abadi; kerẹ ohwo ro shevwerhẹ enu rẹ okpo.

³⁵ Ku wo che kperẹ nẹ, ayen teye ovwẹ, ẹkẹvuọvo me wan oma-a; ayen ghwiẹ vwẹ ẹkẹvuọvo mi nyoro vwẹ oma-a. Ọkevọ me vwọ rhọvwọ re me ra guọnọ udi ọfa.