Isẹ 22 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Odẹ esiri yovwi nọ efe buebu, ẹroesiri yovwi nọ oro eyẹ idono ọfuanfon.

² Tẹ ọdafe tẹ ogbere cha yan mu ohwohwo; Ọrovwohwo na ọvo re ma ayen ejobi.

³ Ọvwiroro da mrẹ ukpokpogho rọ cha kọ sioma rọye reyọ; ẹkẹvuọvo ẹkpa da họrhọ ruọ, kọ re oja.

⁴ Osa rẹ omevwokpotọ vẹ oshọẹdje rẹ Ọrovwohwo na efe kugbe ọghọ vẹ arhọ.

⁵ Inwe vẹ ufi hẹ idjerhe rẹ ohwo ọchọchọ, ohwo rọ sẹro rẹ oma rọye ọye re sa kẹnẹ oma kẹ ayen.

⁶ Yono ọmọ phihọ idjerhe ro che nene, ọ da ghwanre nure ọ rha cha yan jovwo-o.

⁷ Ọdafe ọye suẹn ogbere, omomo igho ọviẹn rẹ ohwo ro momo kẹ.

⁸ Ohwo rọ kon ubi re oshenyẹ ukpokpogho ọye o vuẹn, ọkpọ re ophu rọye che she.

⁹ Ohwo ro vwo ẹro rẹ okẹ che vwo ebruba, kidie ọ vẹ otu ri gbere gba ghare emu rọye ria.

¹⁰ Djẹ ohwo ọghwia na phiho otafe, ẹghwọ kọ ro otafe, ekan ehanrhọn vẹ unuẹkọ ki fue.

¹¹ Ohwo rọ guọnọ udu ọfuanfon, rẹ ota rẹ unu rọye vwerha, ọye vẹ ovie gba dia ugbeyan.

¹² Ẹro rẹ Ọrovwohwo na rhẹrẹ erianriẹn, ẹkẹvuọvo ọ kpara eta rẹ ohwo ro segbuyota-a kuefia.

¹³ Ọvwiẹrẹ ọye re ta nẹ, okpohrokpo hẹ obotafe! me da ro otafe o che hwe vwobọ.

¹⁴ Ugbunu rẹ aye ọrharhaphiẹ họhẹ ọgọdọ okokodo; ohwo rẹ ivun rọye miovwo Ọrovwohwo na che she phihọ.

¹⁵ Ughenghẹn vọn evun rẹ udu rẹ omotete, ẹkẹvuọvo uphiaphie kọye sa djẹ nẹ evun rọye.

¹⁶ Ohwo ro shenyẹ ovwiogbere rere efe rọye vwọ bu, eyẹ ọ da ghwẹ ekọn rọye vwọ kẹ ọdafe, ọbẹvwẹ che hwe vwobo.

Urhi rẹ Uruemu kugbe Omaẹkẹnẹ

¹⁷ Rhie erhọn wẹn, rere wo nyo eta rẹ ọvwaghwanre na, rere wọ vwẹ udu wẹn kẹ erianriẹn mẹ.

¹⁸ Kidie oyovwi kẹ wẹ vwobọ wọ da sẹro rẹ ayen vwẹ evun wẹn, re ayen ejobi da gba vwẹ unu wẹn.

¹⁹ Rere wọ vwẹ ẹro wẹn so Ọrovwohwo na, kọye mi vwo dje ayen kẹ wẹ none na, wẹ mrẹmrẹ.

²⁰ Ọ dia owẹ mi siẹ eta ọgban rẹ uchebro vẹ erianriẹn kẹ,

²¹ re wọ vwọ riẹn uyota vẹ obo ri shephihọ, rere wo sa kpahe omamọ rẹ ota kẹ ayen otu ri ji we na?

²² Wo cho ovwiogbere-e, fikirobo rọ vwọ dia ovwiogbere, eyẹ wo chiyẹ ohwo rọ hẹ ukpokpogho vwẹ anurhoro hwe-e;

²³ kidie Ọrovwohwo che mie ayen unu vwo guẹ, o mi rhi miovwi ayen ihwo ri miovwi akpọ rayen.

²⁴ Wọ vẹ ohwo ro muẹ ophu dia ugbeya-an, wọ je yan nene ohwo ro djo oma-a,

²⁵ wo de rhe yono uruemu rọye, wọ da vwe ufi gba oma wẹn.

²⁶ Wọ dia ọvo vwẹ usun rẹ ihwo re rara unu-u, re ria esarobọ rẹ esa-a.

²⁷ Wo vwo obo wọ vwọ hwa osa-a, kẹ a kparẹ owẹ nẹ ehwa wẹn e mi muọ reyọ?

²⁸ Wo kporo ughwru rẹ awanre rẹ esẹ wẹn vwọ ghare otọ-ọ.

²⁹ Wọ mrẹ ohwo rọ riẹn iruo rọye? o che mudia vwẹ obaro rẹ ivie; o che mudia vwẹ obaro rẹ erharhe rẹ ihwo-o.