Isẹ 20 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Udi vwẹ ohwo jehwe, udi ọgangan nẹrhẹ ohwo phihọ ohọnre; ohwo rẹ udi sun ghwru yo vwo ọhọ-ọ.

² Irhivwẹ rẹ ophu rẹ ovie deri ọ họhọ eguango rẹ okpohrokpo; ohwo rọ kpare ophu rọye ọ vwẹ arhọ rọye hwa osa.

³ Ohwo ro tephe kẹ ohọnre mu oma rọye phihọ ọghọ, ẹkẹvuọvo ẹkpa kẹkpa djẹ ẹghwọ eghwọ.

⁴ Ọvwiẹrẹ voro vwẹ ọke evwru-u; kọ guọnọ vwẹ ọke orhọ yọ gbẹ mrẹ vu-un.

⁵ Iroro rọ udu rẹ ohwo pha kokodo djigbri kerẹ ame, ẹkẹvuọvo ohwo ro vwo ẹruọ se vo vwọ.

⁶ Ihwo buebu vwẹ unu ghwoghwo ọghọ emuo rayen, ẹkẹvuọvo ohwo ro vwo omamọ rẹ esegbuyota kono sa mrẹ?

⁷ Ọvwata rọ yan vwẹ idjerhe ọsọso, ebruba dia kẹ emọ rọye vwobọ.

⁸ Ovie ro tidia ekete re de brorhiẹn ẹro o vwo vughe umiovwo.

⁹ Kono sa vwẹ obọ sa udu tanẹ, Udu me fọnro, ni mi ru umwemwu-u?

¹⁰ Ovwanvwọn vẹ uwan oghoghẹre na ejobi te ena te ena ẹgua kẹ Ọrovwohwo.

¹¹ Tobọ uruemu rẹ omotete ọvo ri dje phia, se obo ro ruẹ shephihọ eyẹ ọ chọre.

¹² Orhọn ro nyo ẹme kugbe ẹro ro mrorẹ, Ọrovwohwo ọvo re ma ayen ivẹ na.

¹³ Wo siogba rẹ ovwerhẹ-ẹ, wọ da rhe dia ovwiogbere; rhiẹ ẹro wẹn phihọ ku wọ cha mrẹ emu ọ re.

¹⁴ O yovwiri-i, o yovwiri-i, eriyin ohwo rọ dẹ emu ta, ẹkẹvuọvo ọ da yanran nu, kọ yan oma.

¹⁵ Oro vẹ omamọ rẹ eragha e pha buebu, ẹkẹvuọvo ẹbẹrunu rẹ erianriẹn epha yoyovwi kerẹ irhu.

¹⁶ Reyọ ewun rẹ ohwo na siẹ rẹ ohwo da re esarobọ kẹ ọrhorha, gba yọnrọn ijọpha na siẹ rẹ ohwo da re esarobọ kẹ ohwo rẹ isiorho.

¹⁷ Emu rẹ ophiẹnvwe miẹmiẹ vwẹ unu rẹ ohwo, ẹkẹvuọvo ukuko rọye ugbunu rọye kọ cha vọn vẹ ekpẹn.

¹⁸ Iroro e vwo ru obo re gbare; aghwanre kọye e vwo phiẹ ofovwi kparobọ.

¹⁹ Ohwo rọ ta ọpata vẹn umẹ, vwẹ ọtiọye na wọ rha vwẹ oma te ohwo ro muẹ eta ta-a.

²⁰ Ohwo da harhẹ ọsẹ eyẹ oni rọye, urhukpẹ rọye ko che fun ghene vwẹ evun rẹ ebri hwi.

²¹ Uku ra vwẹ okpakpa ghare che se vwo ebruba vwẹ obọ-ọ.

²² Wọ vwẹ evun tanẹ, Me cha choja rẹ umwemwu yena-a; hẹrhẹ Ọrovwohwo na, ọye ọvo cha chọ wẹ uko.

²³ Uwan vẹ ovwanvwọn oghoghẹre egua ke Ọrovwohwo oma, uchunu rẹ efian yovwiri-i.

²⁴ Ọrovwohwo re vwanvwan ichiyi rẹ ohwo kẹ, komavọ ohwo sa vwọ riẹn idjerhe rọye?

²⁵ Ufi kẹ ohwo ro mu tanẹ, Ọnana ọfuanfon, rẹ otọ da fọ nu ko che roro ive rọye.

²⁶ Ovie rọ ghwanre sa vwẹ ẹro vughe iruimwemwu, ọ me gua idjighere wan enu rẹ ayen.

²⁷ Erhi rẹ ohwo ọye urhukpẹ rẹ Ọrovwohwo na, rọ vwọ mrẹ otọ rẹ evun rọye ejobi.

²⁸ Ọghọ vẹ evun ẹfuọn re nẹrhẹ ovie tọn, ọvwata kọye rha yọnrọn ekete rọyẹ.

²⁹ Ẹgba ọye urinrin rẹ imighene, esha kọyẹ rha urinrin rẹ ọghwo.

³⁰ Ehwe rọ wan ohwo oma djẹ umwẹmwu kufia, ẹfafa kọyẹ rha hworhẹ otọ rẹ evun.